Luki 7

Jesu paagi bi toatieba yudaano naacemo

(Mat 8.5-13)

1Jesu n den maadi yaa niba n cengi o yaa maama n tie ne kuli ki gbeni, o den kua Kafarnawum dogu nni.

2Minteela kobiga yudaano yendo den ye likani, ki pia o naacemo ke o tie o po nimoano, ke o yia hali ki bua ki kpe. 3O yudaano yeni n den gbadi ke bi maadi Jesu maama, o den soani Jufinba nikpela bi tianba o kani ke ban mia o wan cua ki faabi o naacemo. 4Bi den pundi Jesu kani ki mia o ki moandi ke wan da yie, ki yedi: «O joa yeni pundi ŋan ŋanbi o po, 5kelima o bua ti buolu. Wani n maa ti po li bali maama bangima dieli.» 6Jesu den yegi leni ba ki caa. Wan den kuli bi toatieba yudaano diegu, o den tuogi wan den soani o danlinba yaaba o kani, ke ban yedi o: «N Daano, da coagi a yuli, mii pundi ŋan kua n diegu nni. 7Lani yaa po n teni, ke mii sua ke li pundi min cua a kani mini n ba. Maadi mayenma bebe, n naacemo baa paagi. 8Mini yua ke toaba die nni, nmoko pia min die yaa toatieba. N yen yedi one: ‹Gedi,› wan gedi, ki yedi one: ‹Cua na,› omo n cua. N yen yedi n naacemo: ‹Tieni line,› wan tieni.» 9Jesu n den gbadi laa maama, li den tie o po bonlidinkaala, die ki nan mangi o. O den jigidi ki yedi yaa niligu n ŋua o: «N waani yi ke ba Isidayeli yaaba siiga, n daa laa yaa dandancianli n ye ne buolu.» 10Wan den soani yaaba n lebidi ki pundi denpo, bi den sua ke yaa naacemo n bi yia yeni paagi.

Jesu faadi li kpepuoli bijua

11Lani n pendi, Jesu den gedi Nayina dogu nni. O ŋoadikaaba leni niba boncianla den yegi leni o. 12Jesu n den nagini u dogu bilinciamu buliñoajabu, o den tuogi yaaba n ñani lienni ki tugi o tinkpilo ki baa n piini. Yua n kpe yeni den tie o naa tugu nni bonjayenyenga, ke o naa mo tie kpepuoli. U dogu nni yaaba boncianla den yegi leni o. 13O Diedo n den laa o naa, mi ninñima den cuo o, ke o yedi: «Da buudi.» 14O den nagini ki sii ku tinkpikpaku. Yaaba n tugi den sedi. O den yedi: «O jawaalo na, n yedi a: ‹Fii.› » 15Lani, yua n kpe yeni den fii ki kali ki maadi. Jesu den teni o o naa. 16Li fangicianli den cuo laa niba kuli, ke bi kpiagidi U Tienu ki tua: «O saawalipuaciamo fii ti siiga. U Tienu goandi o buolu.» 17Jesu n den tieni yaala yeni kuli yaa maama den yadi Jude nni kuli leni yaa tinmu n lindi kuli.

Jan Batisi soani o tondiba Jesu kani

(Mat 11.2-19)

18Jan ŋoadikaaba den togidi o laa bonla kuli. 19O den yini bi siiga ŋoadikaabilie ki soani ba Jesu kani, ke ban yedi o: «Naani a tie yua n den baa cua bi, bi ti da go baa guu nitoa yo?» 20Bi jaba yeni n den pundi Jesu kani bi den yedi o: «Jan Batisi n soani ti a kani, ke tin buali a fini n yaa tie tin guu yua yaa cuama, bi, ti da go baa yaa guu nitoa yo?» 21Lanyogunu, Jesu den paagi a yiama, a tadima leni mu cicibiadimu n die yaaba, ki go noadi a juama boncianla. 22O den guani ki yedi Jan tondiba: «Guani mani ki ban togidi Jan yin gba ki go nua yaala: A juama noadi, a waba cuoni, a gbaada ŋanbidi, a woma gba, bi tinkpiba faadi, a luoda mo gba o Laabaaliŋamo. #Esa 35.5-6; 61.1. 23Li pamanli ye leni min kaa tie yua yaa po tingbali bonla.»

24Jan tondiba n den ñani Jesu kani yaa yogunu, o den maadi ku niligu Jan maama ki yedi: «Yi den gedi mi fanpienma po ki ban laa be? Yua n tie nani u faalu n liebi yaa ñinmuagu bi? 25To, yi nan den gedi ki ban laa be? Yua n bobi ti tiaŋandi bi? Diidi ki le mani, yaaba n yie ti tiaŋandi ke bi yema kuli ŋani wani ye bi badicianba diedi nne. 26Yi nan den li gedi ki ban laa be? O saawalipualo bi? Yeni de! Ama n waani yi ke yin ban laa yua cie ba saawalipualo. 27Wani yaa po yo ke li diani ki yedi:

‹Diidi, n soani n tondo a liiga,

Ke wan ŋanbi a sanu.› #Mal 3.1.

28N go yedi yi ke pua n mali yua kuli, yua n cie Jan ki ye. Ama yua n wa ki cie bikuli U Tienu n diema nni, wani n yabi ki cie o.

29Yaa niba n den cengi o leni bi lubigaaba kuli den saa U Tienu moamoani, ki cedi ke Jan batisi ba. #Mat 21.32; Luk 3.12. 30Ama Farisieninba leni li bali maama bangikacianba n den yie ke Jan kan batisi ba yeni, bi den yie U Tienu n den jagi ki bili bi po yaale.»

31Jesu den pugini ki yedi: «N baa nandi moala ne niba leni be? Bi naani leni be? 32Bi naani leni yaa bila n kaa ki daaga nni ki yi biyaba ki tua:

‹Ti piebi yi po mu yelimu,

Ke yii jeli ki ciaga.

Ti yiini yi po i kuyani,

Ke yi naa mua i kumoe.›

33Jan Batisi cua, waa di jiema, waa ñu duven mo, ke yi tua: ‹O pia ki cicibiadiga.› 34O Joa Bijua mo cua ki di ki go ñu ke yi tua: ‹Diidi ki le, o tie jiejiedo leni dañolo, ki tie bi lubigaaba leni i tagibiadi danba kuli yaa danli.› 35Yaaba n tuo U Tienu yanfuoma kuli saa i moamoani ke mi tiegi.»

Yaa pua yaa tuona n bia baa sugili

36Farisieninba siiga yendo den yini Jesu wan je leni o. Jesu den kua o diegu nni ki kali u saajekaanu kani. 37O pua den ye u dogu nni ke o tagu bia. Wan den bandi ke Jesu ye Farisieni yeni deni ki di, o den taa yaa tanli n yi alibati yaa buteliga ke ki gbie leni tulale, #Mat 26.7; Mrk 14.3; Jan 12.3. 38ki cua ki sedi Jesu puoli po o taana kani ke o kpaagi li bonkalikaala po. O pua yeni den buudi ke o nunsiidi cuudi ki soangi Jesu taana ke o duuni a leni o yudi, ki waliti a ki sogi a tulale.#7.38 O pua den doagidi yeni ke o kpiagidi Jesu, ki biidi o pali o tuonbiadi po. 39Yaa Farisieni n den yini Jesu n laa lani, o den yedi o yama nni: «One yaa bi tie saawalipualo moamoani, o bi baa bandi yaa pua n siigi o na, n tie yua leni o tagu n tie maama. O bi baa bandi ke o tie tagibiadu daano.»

40Lani, Jesu den yedi Farisieni yeni: «Simon, n pia mi maama ki baa maadi a.» Simon den guani ki yedi o: «Canbaa, maadi.» 41Jesu den yedi: «O pandinlo den ye ki pia pandanbilie. One den kubi o po kujapiena kobimuu, o lielo mo kujapiena piimuu. 42Ban kaa den pia liba ki baa pa yeni, o den cabi bani nibilie yeni kuli bi pana. Bani nibilie yeni siiga, ŋme n baa yaa bua o ki cie oyua?» 43Simon den guani ki yedi o: «N tama wan cabi yua ke o panli yabi ki cie yene.» Jesu den yedi o: «A saa i moamoani.» 44Lani, o den gbegi ki diidi o pua yeni ki go yedi Simon: «A laa o pua na? Min kua a diegu nni, ŋaa puni nni ñima ke n nigidi n taana, ama wani, o nigidi n taana leni o nunsiidi, ki go duuni a leni o yudi. 45Ŋaa gobini nni leni mi buama, ama wani, hali min kua, o li waliti n taana yo, kaa cedi. 46Ŋaa wuli n yuli po kpama,#7.46 Lani kuli tie Jufinba n baa kpiagi o caano maama. ama wani, o sogi n taana tulale yua yaa dunga n pa. 47Lani yaa po, n yedi a ke wan bua nni boncianla yeni doagidi ke o baa sugili o tuonbiadi yaadi n yabi po. Yua n baa sugili yaa tuonbiadi n wa po mo, bua waamu bebe.» 48O den yedi o pua mo: «A baa a tuonbiadi sugili.» 49Yaaba n den taani ki di leni o den maliti bi pala nni: «One tie ŋme ki puuni sugili ti tuonbiadi po?» 50Jesu go den yedi o pua yeni: «A dandanli faabi a, fii ki yaa kuni leni mi yanduanma.»

Currently Selected:

Luki 7: BGP

Highlight

Copy