Luki 5

Jesu yini o ŋoadikakpiaba

(Mat 4.18-22; Mrk 1.16-20)

1Dayenli Jesu den se Jenesareti ñincianma jaali po, ke ku niligu lindi o ki ŋabi ki miabi o, ki bua ki gbadi U Tienu maama. #Mat 13.1-2; Mrk 3.9-10; 4.1. 2O den laa ñinbiadilie u ñinkunu ke bi jankpaanba ñani lienni ki ŋuudi bi taali. 3O den kua ñinbiayengu nni, Simon yaa yaagu, ki mia o ke wan piadi leni li wali waamu. Lani, Jesu den kali ku ñinbiagu nni ki bangi ku niligu.

4Wan den maadi ki gbeni, o den yedi Simon: «Suagi ki pundi mi ñima n ñua naani, ki lu yi taali ki kpaani i jami.» 5Simon den guani ki yedi o: «Canbaa, ti den dua ki tuuni ñiamungu kuli, tii baa puu, ama ŋan yedi yeni, n baa lu i taali.» #Jan 21.3. 6Ban den luni, bi den cuo i jami boncianla hali ke bi taali cenli, #Jan 21.6. 7ke bi kabini bi jankpaanlieba yaaba n ye ku ñinbialiegu nni, ke ban cua ki todi ba. Bi den cua ke bi gbieni ti ñinbialiediti yeni kuli, hali ke ti bua ki mia. 8Simon Pieli n den laa lani, o den gbaani Jesu nintuali ki yedi: «N Daano, foagidi n kani kelima n tie tuonbiadi daano.» 9O den maadi yeni kelima ti jawaandi cuo o, wani leni yaaba n ye leni o kuli, kelima ban den cuo i jami boncianla maama po. 10Li go den tie yeni Sebede bijaba Jaki leni Jan po, bani Simon jankpaanlieba. Jesu den yedi Simon: «Da jie liba. Nani ŋan lingi i jami maama, dinla liiga a baa yaa lingi bi niba U Tienu po yene.» 11Ban den gedini bi ñinbiadi li wali kani, bi den ŋaa likuli ki ŋoadi o.

Jesu ŋanbi o gbaado

(Mat 8.1-4; Mrk 1.40-45)

12Jesu n den ye doyendu nni, o joa den ye likani ke o gbanandi kuli tie gbaadima. Wan den laa Jesu, o den labini o kani ki mia o ki yedi o: «N Daano, a yaa bua, a baa fidi ki ŋanbi nni.» 13Jesu den tandi o nuu ki sii o, ki yedi: «N bua, ŋanbi.» Lanyogunu mi gbaadima den gbeni o po. 14Jesu den yedi o ke wan da togidi niloba yaala n tieni, ki go yedi o: «Gedi ki ban waani a yuli o kopadiciamo, ki padi a ŋanbima padili, nani Musa n den bili maama, lan tua bi po siedi ke a ŋanbi.» #Lev 14.1-32.

15Jesu yeli den ña ki pugidi. Bi niba boncianla den kpendi o kani, ki bua ki cengi o maama, ki go bua wan paagi ba bi yiani po. 16Ama Jesu den maani ki ña ki caa a fuana nni ki ban jaandi.

Jesu paagi o joa yua yaa gbanandi n kpe

(Mat 9.1-8; Mrk 2.1-12)

17Dayenli Jesu den bangi bi niba U Tienu maama, Farisieninba leni li bali maama bangikacianba bi tianba den kaa likani. Bi den ñani Galile leni Jude dogi nni kuli leni Jerusalemi moko. O Diedo paalu den ye leni Jesu ke o paagidi a yiama. 18Diidi ki le, bi niba den tugi o joa ke o dua ku kaagu po, ke o gbanandi kpe. Bi den moandi ki baa kuani ki duani o Jesu nintuali. 19Ban kaa den baa ban baa tagini naani ki kuani o kelima bi niba yabinu po, bi den doni ku doangu yuli po ki cibi yaa bonli n yabi, ki kuani o leni wan dua yaa kaagu po kuli, ki jiini o ki duani li nitaanli siiga, Jesu nintuali. 20Jesu n den laa bi dandanli, o den yedi o joa yeni: «A baa a tuonbiadi sugili.» 21Li bali maama banda leni Farisieninba den bungi bi pala nni ki tua: «One tie ŋme ki maadi ki sugidi U Tienu nanda? U Tienu bebe yaa ka, ŋme n baa fidi ki pa bi niba bi tuonbiadi sugili?» 22Jesu den bani ban bungi yaala, ki guani ki yedi ba: «Be n teni ke yi bungi yi pala nni yeni? 23Maamilie na siiga, mile n dingi ki cie, ki yedi: ‹A baa a tuonbiadi sugili› bi, ki yedi: ‹Fii ki yaa cuone?› 24N bua yin le ki bandi ke o Joa Bijua pia li bali ŋanduna nni, ki pa bi niba bi tuonbiadi sugili.» Lane o den yedi yua yaa gbanandi n kpe yeni: «N yedi a, fii ki taa a kaagu ki yaa kuni.» 25Lanyogunu liga, o den fii ki sedi bikuli nintuali, ki taa wan bi dua yaa kaagu, ki ñani ki ban kuni, ki kpiagidi U Tienu. 26Li pakili leni li fangili den cuo bikuli, ke bi kpiagidi U Tienu ki tua biyaba: «Dinla ti laa yaala n pia ki lidiga.»

Jesu yini Levi ke o ŋoadi o

(Mat 9.9-13; Mrk 2.13-17)

27Lani n pendi, Jesu den ñani ki laa o lubigaalo ke bi yi o Levi, ke o kaa o tuonli kani ki gaani li lubili. Jesu den yedi o: «Ŋoadi nni.» 28O den fii ki ŋaa likuli ki ŋoadi o.

29Levi den taani bi niba o diegu nni, ki ŋanbi mi jecianma Jesu po. Bi lubigaaba leni nitoaba boncianla den kaa leni ba u saajekaanu kani. 30Farisieninba leni bi siiga yaaba n tie li bali maama banda den jaligidi Jesu ŋoadikaaba ki tua: «Be yaa po ke yi di ki go ñu leni bi lubigaaba leni i tagibiadi danba?» #Luk 15.1-2. 31Jesu den guani ki yedi ba: «Yaa niba n pia laafia ka bua lotoli, ama a yiama. 32Mii cua ki baa yini yaaba n tiegi ka, kali ti tuonbiadi danba ke ban lebidi bi pala.»

Mi ñoalolima maama leni kpanjatoama

(Mat 9.14-17; Mrk 2.18-22)

33Bi niba den yedi o: «Jan ŋoadikaaba leni tinba Farisieninba yaa yaaba kuli yen luo bu ñoabu ki go jaandi, ama a yaa yaaba wani nan di ki go ñu.» 34Jesu den guani ki yedi ba: «Naani yi baa fidi ki teni o puocaano calo danlinba n loli bu ñoabu o puocaano calo n da ye leni ba yaa yogunu? 35A dana kpendi ke bi niba baa cuo o puocaano calo ki ñani o bi siiga. Lanyogunu bi baa yaa luo bu ñoabu.»

36Jesu go den pua ba mi kpanjama ki yedi: «Niloba kan padi li liadipanli ki ñani ki cabijenga, ki baa biini li liadikpeli. O yaa tieni yeni, o padi li liadipanli ki go sua yaa cabijenga n ñani yeni mo kan yaa naani leni li liadikpeli.

37Niloba mo kan didi taa duvenpaano ki piagi ti dayuakpedi nni. O yaa tieni yeni, duvenpaano baa puuni ki teni ti dayuadi n padi duven n wuli, ti dayuadi yeni mo n bodi. 38Tiladi ban piagi duvenpaano ti dayuapandi nni. 39Yua n ñuni yaa duven n kpeligi mo kan go yaa bua ki ño yaa duven n paani, kelima o baa yedi: ‹Yaa duven n kpeligi mani ki cie.› »

Currently Selected:

Luki 5: BGP

Highlight

Copy