Jan 3

Jesu maadi leni Nikodemi

1Niyendo den ye ke bi yi o Nikodemi, ki tie Farisieni, ki go tie Jufinba yudanba siiga yendo. 2O den cua Jesu kani ku ñiagu ki yedi o: «Canbaa, ti bani ke a tie U Tienu n soani yaa bando, kelima oba kuli kan fidi ki tieni ŋan tiendi yaa bancianma na, kali U Tienu n ye leni yua.»

3Jesu den guani ki yedi o: «N yedi a i moamoani, o nilo yàá mali milie,#3.3 Nekanba “maa milie” yeni go baa fidi ki yedi Gireki maama nni “mali tanpoli.” o kan fidi ki le U Tienu diema.» 4Nikodemi den guani ki yedi o: «O nilo yaa kpeligi, o baa tieni lede ban guani ki maa o? Naani o baa fidi ki go kua o naa tugu nni, wan go maa o milie?»

5Jesu den guani ki yedi o: «N yedi a i moamoani, o nilo yàá mali mi ñima leni U Tienu Fuoma Yua po, o kan kua U Tienu diema nni. 6O nisaalo n mali yua kuli tie nisaalo, ama U Tienu Fuoma n mali yua kuli pia U Tienu Fuoma miali. 7N yaa yedi a ke li tie tiladi yikuli n guani ki maa miliema, lan da paki a. 8U faalu#3.8 Nekanba faalu yeni yeli tie yenma Gireki maama nni leni U Tienu Fuoma Yua. figi wun bua naani ke a gba u sagimu, ama ŋaa bani wun ñani naani, bi wun caa naani. Li tie yenma leni ban mali yua mi Fuoma paalu po.» 9Nikodemi den guani ki buali o: «Laa bonla baa fidi ki tieni lede?» 10Jesu den yedi o: «Fini yua n tie Isidayeli yaaba siiga bangikaciamo, ŋaa bani laa bonla? 11N yedi a i moamoani, ti maadi tin bani yaala, ki tiendi siedi tin laa yaala po, ama yii tuodi ki gaani ti siedi. 12N maadi yi yaala n tie ŋanduna nni bonla maama, ama yii dugi mi po. Lanwani, n yaa maadi yi yaala n tie tanpoli bonla maama, yi baa gaa lede ki dugi mi po? 13Oba kuli daa doni tanpoli, kali yua n ñani tanpoli po ki jiidi. Lani n tie o Joa Bijua.

14Nani Musa n den taa o kumoanwa, ki fiini ki caani o ku daagu po mi fanpienma nni maama, li tie tiladi ban yugidi o Joa Bijua moko yeni. #Coa 21.9. 15Lani n tie ke yua n tuo ki daani o kuli, n baa yaa miali n kan gbeni. 16U Tienu den bua ŋanduna yaaba bonŋanla, hali ki puni o Bonjayenyenga, ke yua n daani o kuli n da bodi, ama wan yaa pia yaa miali n kan gbeni. 17U Tienu naa den soani o Bijua ŋanduna nni ke wan jia ŋanduna yaaba buudi ka, ama ke wani U Tienu n faabi ba, kelima o Bijua yaa po. 18Bi kan jia yua n daani o buudi, ama yua n kaa daani o, U Tienu tuodi ki jia o buudi, kelima waa tuo ki daani U Tienu Bonjayenyenga. 19Line n tie ban baa jia bi niba buudi yaala yaa po: Mi yenma cua ŋanduna nni. Ama bi nisaaliba bua li biigili ki cie mi yenma, kelima bi tuona bia. 20Yua n tiendi yaala n bia kuli, nani mi yenma. O kan cua mi yenma kani, kelima waa bua mi yenma n doagidi wan tiendi yaa tuonbiada. 21Ama yua n tiendi i moamoani n bili yaala kpendi mi yenma kani, ke lan doagidi ke wan tiendi yaala tie U Tienu n bili yaala.»

Jan Batisi n go tieni yaa siedi Jesu po

22Lani n pendi, Jesu leni o ŋoadikaaba den gedi Jude diema tinbuona nni. O den ye likani leni ba danaba, ki batisi bi niba. 23Jan moko den ye Eno, yaa dogu n kuu leni Salima, ki batisi bi niba, kelima mi ñima ye likani ki yabi. Bi niba den kpendi o kani ke o batisi ba. 24Li den sua ke bi daa cuo Jan, ki kuani o li kpaadidieli nni. #Mat 14.3; Mrk 6.17; Luk 3.19-20.

25Jan ŋoadikaaba siiga bi tianba den nia leni Jufi yendo yaala n tie mi wali-ŋanbima bogida maama po. 26Bi den cua Jan kani ki yedi o: «Canbaa, diidi ki le, yua n den ye leni a Jurden boanduoli, ŋan den tieni yua yaa po siedi yeni, o batisi bi niba, ke bi niba kuli caa o kani.» 27Jan den guani ki yedi ba: «O nilo kan fidi ki baa li bonla, li yàá tie U Tienu n puni o yaala yaa ka. 28Yinba yi ba tie siedi ke n yedi: ‹Mii tie U Tienu n Gandi Yua, ama U Tienu soani nni o liiga.› #Jan 1.20. 29Yua n die o puocaano tie o puocaano calo. Ama o puocaano calo danli, yua n ye o kani ki cengi o, pali mani boncianla o yaa gbadi o puocaano calo nialu. Nmoko pia laa pamancianli buolu yo, ke li dagidi cain. 30Li tie tiladi wani n yaa pugidi, mini mo n yaa wadi.

31Yua n ñani tanpoli ki jiidi cie bi niba kuli. Yua n ñani ki tinga nni, tie ki tinga nni yua, ki maadi ki tinga nni bonla yaa maama. Yua n ñani tanpoli po ki cua, 32tiendi siedi wan laa yaala leni wan gbadi yaala likani po. Ama oba naa dugi o siedi po. 33Die yua n dugi o siedi po, saa i moamoani, ke U Tienu tie moamoandaano. 34U Tienu n soani yua maadi U Tienu n maadi yaa maama, kelima wani U Tienu n puuni o o Fuoma ke o gbie o niinni. 35Baa U Tienu bua o Bijua, ki dini o li bonla kuli bali ke o die. #Mat 11.27; Luk 10.22. 36Yua n tuo ki daani Bijua kuli pia yaa miali n kan gbeni. Ama yua n kaa tuo ki daani Bijua, o kan le laa miali. U Tienu pabienli bebe n baa sedi o yuli po.»

Currently Selected:

Jan 3: BGP

Highlight

Copy