Jan 19

1Lani, Pilati den teni ke bi toatieba taa Jesu ki pua o i baliji. 2Bi toatieba den taa i konkoni ki piani nani ki badifogiliga yeni, ki cibini o, ki go golini o bu kpalimoanbu. 3Bi den kpendi o kani ki tua: «Ti fuondi a, fini Jufinba bado!» Bi go den pabini o.

4Pilati go den ñani ki gedi Jufinba kani ki yedi ba: «Diidi, n baa teni ban ñani o yi kani, ke yin bandi ke mii laa ke o tieni liba, yaala n pundi min cuo o.» 5Lani, Jesu den cua bi kani ki ciibi i konkoni, ki goli bu kpalimoanbu. Pilati den yedi ba: «No mani o joa na.»

6Bi kopadicianba yudanba leni bi jiidikaaba n den laa Jesu, bi den tiani: «Joani o li dapoanpoanli po! Joani o li dapoanpoanli po!» Pilati den yedi ba: «Yinba yi ba n taa o ki joani o li dapoanpoanli po, kelima mini, mii laa ke o tieni liba, yaala n pundi min cuo o.» 7Jufinba den guani ki yedi o: «Tinba wani pia li bali maama. Laa bali maama mo yaa po, li bili ke li pundi wan kpe, kelima o den yedi ke o tie U Tienu Bijua.»

8Pilati n den gbadi laa maama, o den jie ki pugini. 9O go den kua o bujiali kani ki buali Jesu, ki yedi: «A ñani lepoe?» Jesu naa den guani o maamiba kuli. 10Lani yaa po, Pilati den yedi o: «A yie ke a kan guani mine liba? Naani ŋaa bani ke n pia li bali ki faabi a, bi ki joani a li dapoanpoanli po?» 11Jesu den guani ki yedi o: «A kan baa n po baliba, bi yàá den puni a li tanpoli po. Li tie lani yaa po, ke yua n den cuo nni ki teni a, pia i tagili ki cie ŋa.»

12Ki cili laa yogunu, Pilati den lingi wan baa faabi Jesu maama. Ama Jufinba den tiani: «A yaa faabi o naa nilo, ŋaa tie Sesari #19.12 Sesari: Bundima tie bi badiba badiciamo. danli. Yua n yedi ke o tie bado kuli, o fiini mi yiema Sesari po.»

13Pilati n den gbadi laa maama, o den ñani Jesu niinpo, ki kali u bujiali kaanu po, ke u ye yaa kaanu n yi “Ti Tanpabidi luolu,” Hebilu maama nni, u yi Gabata. 14Laa daali den tie mi Pendima jaanma boginli daali, ke li bua ki pundi u yensiinu. Pilati den yedi Jufinba: «Diidi mani yi bado.» 15Bi den tiani: «Kpa o! Kpa o! Joani o li dapoanpoanli po!» Pilati den yedi ba: «Min joani yi bado li dapoanpoanli po bi?» Bi kopadicianba yudanba den guani ki yedi o: «Tii pia baditoa, kali Sesari.» 16Lanwani, Pilati den teni ba Jesu, ban ban joani o li dapoanpoanli po. Lani, bi den taa Jesu ki gedini o.

Bi joani Jesu li dapoanpoanli po

(Mat 27.32-44; Mrk 15.21-32; Luk 23.26-43)

17Jesu den bugi o dapoanpoanli, ki ñani u dogu nni ki ban caa ban yi yaa kaanu “ku Yukuokuogu kaanu.” Hebilu maama nni, bi yi u Goligota. 18Lankane ke bi den joani o li dapoanpoanli po. Bi go den joani nibilie a dapoanpoana po, yendo o jienu, yendo o ganu, ke Jesu mo ye siiga nni.

19Pilati den diani i diani ki tabini li dapoanpoanli yuli po. Yaala n den diani n tie ne:

“Jesu, Nasareti yua, Jufinba bado.”

20Jufinba boncianla den cogi i diani yeni, kelima ban den joani Jesu li dapoanpoanli po naankani den kuu leni u dogu. Li den diani Hebilu, Laten leni Gireki maama nni kuli. 21Lani yaa po, bi kopadicianba yudanba den yedi Pilati: «Ŋan da diani “Jufinba bado,” ama ŋan diani ke o yedi ke o tie Jufinba bado.» 22Pilati den guani ki yedi ba: «Min diani yaa maama, n diani ma.»

23Yaa toatieba n den joani Jesu li dapoanpoanli po, den taa o tiadi ki boagidi kaaninaa, ke minteeli kuli den baa kaanyendu. Bi den taa o liadicianli moko, yaali n ki den pia ñialu, kelima li den tie cabiyenli, ki cili tanpoli, ki jiidi hali tinga. Bi den yedi biyaba: 24«Tin da padi li, tin toa li tiatia, ki le yua n baa baa li.» Lani, li den tieni ke yaala n diani i Diani nni n tieni ki dudi:

«Bi boagidi n tiayiekaadi bi siiga,

Ki toa tiatia n liadicianli po.»

Lani n tie bi toatieba n den tieni yaala. #Ps 22.28.

25Jesu naa, o naa waalo, Kilopa pua Mariyama leni Mariyama, Magidala dogu yua den se ki nagi Jesu dapoanpoanli. 26Jesu n den laa o naa leni wan bua yaa ŋoadika ke o se leni o, o den yedi o naa: «Pua, no a bijua.» 27Lani, o den yedi o ŋoadika yeni: «No a naa.» Lanyogunu liiga, laa ŋoadika den kubi Jesu naa o denpo.

Jesu kuuma

(Mat 27.45-56; Mrk 15.33-41; Luk 23.44-49)

28Li yaa puoli, Jesu n den bani ke li bonla kuli tieni ki dudi, o den yedi: «U ñuñuunu pia nni.» O den yedi yeni ke yaala n diani i Diani nni n tieni ki dudi. #Ps 22.15; 69.21. 29Ku ñintiagu den se likani, ki gbie leni mi ñinmiligima. Niyendo den taa u tuogu ki pagini mi niinni, ki tuuni isope benu, ki gedini Jesu ñoabu kani. 30Jesu n den fua mi ñinmiligima yeni, o den yedi: «Likuli tieni ki dudi.» Lani, o den tibini o yuli, ki cabi o naano ki kpe.

Bi muu Jesu logili

31Li sua ke li tie li boginli daali, ke li baa fii ki faa ki yaa tie U Tienu fuodima daali, yaali n gagidi ki tie jaancianma. Jufinba naa den bua a tinkpila n yaa ye a dapoanpoana po landaali. Lani, bi den mia Pilati wan teni ban kuakua yaaba n ye a dapoanpoana po taana#19.31 Li den tie ban kpe tonma po yo., ki ñani ba likani. 32Lani yaa po, bi toatieba den gedi likani ki kua o nikpialo taana leni o nilielo ya, ban den joani yaaba a dapoanpoana po leni Jesu. 33Ama ban den pundi Jesu kani ki sua ke o peli ki kpe, baa den kua o taana. 34Bi toatieba siiga nni yendo den muu Jesu logili li kpaanli. Lanyogunu mi soama leni mi ñima den ñani likani. 35Yua n den laa lani kuli n tieni siedi lipo. O siedi tie moamoani. O go bani ke o maadi moamoani. O tieni siedi yeni ke yimoko n tuo ki ŋoadi Jesu, ki dugi o po. 36Lani kuli den tieni yeni, ke i Diani n kua:

«Bi kan kua o kpaba siiga ba yenli.» #Ñam 12.46; Coa 9.12; Ps 34.20.

37I Diani go yedi kaanto:

«Bi baa diidi ban den muu yua.» #Sak 12.10; Doa 1.7.

Jesu piinma

(Mat 27.57-61; Mrk 15.42-47; Luk 23.50-56)

38Lani n pendi, Alimate dogu yua Josefi, yua n den tie Jesu ŋoadika, ama ŋasiili nni, kelima o den jie Jufinba, den mia Pilati ke wan pa o u sanu wan taa Jesu o tinkpilo ki piini. Pilati den puni o u sanu, ke o gedi ki ban taa o tinkpilo. 39Nikodemi, yua n den kpa cua Jesu kani ku ñiagu moko den taani leni Josefi, ki cuani mili leni alowesi ki kali kali ke li kpiagu den pundi kilo piitaa. #Jan 3.1-2. 40Bi jaliediba yeni den taa Jesu o tinkpilo, ki fini o a cabipiena, ki taani leni tulale yua n pia u nuulumanu, nani Jufinba n maani ki tiendi maama. 41U kuanu den nagi ban den joani Jesu li dapoanpoanli po naankani. Yaa takuli n tie takupanli, ke bi daa kuani tinkpilo kuli lienni, den ye u kuanu yeni niinni. 42Nani lan den tie Jufinba n baa bogini mi fuodima daali po yaa daali, ke li takuli mo ye koanma nni yeni, bi den kuani Jesu o tinkpilo laa takuli nni.

Currently Selected:

Jan 19: BGP

Highlight

Copy