Mi cilima 46

Jakob fii ki gedi Ejipiti diema nni

1Jakob den fii ki gedi leni wan den pia yaala kuli. O den pundi Beri-Seba dogu nni, ki padi a pada o baa Isaaka Tienu po. 2U Tienu den maadi leni Jakob li bonlekaala nni ku ñiagu, ki yedi o: «Jakob, Jakob.» Jakob den guani ki yedi o: «Mini nne.» 3U Tienu den yedi o: «N tie U Tienu, a baa Tienu. Ŋan gedi Ejipiti diema nni ki da jie, kelima n baa teni ŋan tua nibuociamu lankani. 4Mini n ba, n baa yegi leni a Ejipiti diema nni. Mini n ba, n baa teni ŋan ña likani, Josefi baa mubini a ŋan kpe.»

5Jakob den fii Beri-Seba kani. Isidayeli bijaba den teni ke bi baa Jakob, bi bila leni bi puoba jagini ti teliti, Faraon n den soani yaadi ki baa tugi ba. 6Bi go den gedini bi yangola leni ban den baa yaa piama kuli Kanana diema nni. Jakob den gedi Ejipiti diema nni, wani leni o puoliŋuani kuli.#JTT 7.15. 7O den taa o bijaba, o bijaba bila, o bisiaba, o bijaba bisiaba leni o diegu nni yaaba kuli, ke bi yegi leni o ki kua Ejipiti diema nni.

Jakob diegu yaaba

8Bine n tie Jakob bijaba, yaaba n den gedi Ejipiti: Jakob leni o bijaba.

Jakob bijakpelo n den tie Rubeni. 9Rubeni mo yaa bijaba n den tie Enoki, Palu, Hetisiloni leni Karmi. 10Simeon mo yaa bijaba den tie Yemueli, Yamini Ohadi, Yakini, Tisoari leni Kanana pua bijua Tisoari. 11Levi mo yaa bijaba den tie Gersoni, Kehati leni Merari. 12Juda mo yaa bijaba den tie Eri, Onani, Sela, Peretisi leni Sera. Ama Eri leni Onani den kpe Kanana diema nni. Peretisi mo yaa bijaba den tie Hetisiloni leni Hamula. 13Isakari mo yaa bijaba den tie Tola, Pufa, Yobi leni Simironi. 14Sabuloni mo yaa bijaba den tie Seledi, Elon leni Yaleeli. 15Bani n tie Lea n den mali yaa bonjala Jakob po Padan-Arami dogu nni, ki taani leni o bisalo Dina. O bijaba leni o bisiaba kuli den taani ki tua piitaa n nibitaa.

16Gadi mo yaa bijaba den tie Tisifiyoni, Hagi, Suni, Etisiboni, Eli, Alodi leni Aleeli. 17Aseri mo yaa bijaba den tie Yimina, Jisifa, Jifisi, Beria leni bi naataanpuoga Sera. Beria mo yaa bijaba den tie Heberi leni Malikieli. 18Bani n tie Silipa bijaba, Laban n den puni Lea yua. O den mali laa bonjala Jakob po. Bikuli den tie piiga n nibiluoba.

19Jakob pua Raseli mo yaa bijaba den tie Josefi leni Benjamen. 20Josefi den mali Manase leni Efrayimi Ejipiti diema nni, o pua Asinati yua n den tie Oni dogu nni kopadiciamo Poti-Fera bisalo n den mali o po yaaba.#Cil 41.50-52. 21Benjamen mo yaa bijaba den tie Bela, Bekeli, Asibela, Gera, Naamani, Ehi, Losa, Mupimi, Hupimi leni Ardi. 22Bani n tie Raseli bijaba, wan den mali yaaba Jakob po. Bikuli den tie piiga n nibinaa.

23Dan mo yaa bijua den tie Husimi. 24Nefitali mo yaa bijaba den tie Yatiseeli, Guni, Yetiseri leni Silemi. 25Bani n tie Biliha bijaba, Laban n den puni o bisalo Raseli yua. O den mali laa bonjala Jakob po, ke bikuli taani ki tie nibilele.

26Jakob diegu yaaba, yaaba n den ñani o tugu nni, ki yegi leni o ki kua Ejipiti diema nni kuli, den taani ki tie piiluoba n nibiluoba, ki daa taani Jakob bijaba puoba. 27Josefi den pia bijabilie, ke bi den mali ba Ejipiti diema nni. Lanwani, Jakob diegu yaaba kuli, yaaba n den kua Ejipiti diema nni den tie niba piilele.#JTT 7.14.

Jakob gedi Ejipiti diema nni

28Jakob den soani Juda ke o gaa o liiga ki gedi Josefi kani, ki waani o ke o cua ki jiidi Gosen diema nni. 29Josefi den doali o taami o teligu ki kua ki gedi Gosen, ki tuogi o baa Jakob. Wan den laa o yaa yogunu, o den sani ki bibi o ki buudi hali ke li waagi. 30Isidayeli den yedi Josefi: «Moala, ba n yaa ji kpe, n laa a nunga ke a baa ki ye.» 31Josefi den yedi o kpeliba leni o baa niba kuli: «N baa gedi ki waani Faraon ki yedi o yaama n tie ne: ‹N kpeliba leni n baa niba kuli, yaaba n den ye Kanana diema nni cua n kani. 32Laa jaba tie yankpaaba, kelima bi kubi a yangola. Bi cuani bi yandi leni ban pia yaala kuli.› 33Lanwani, Faraon yaa yini yi ki buali yin tuuni yaa tuonli, 34yin yedi o: ‹A naacenba li tie yankpaabe hali yaa yogu. Ti li baa ki tie bane hali moala nani ti baanba n den tie maama yeni.› Yi yaa tieni yeni, yi baa yaa ye Gosen diema nni, kelima bi yankpaaba kuli tie nani ti niyuogidi yene Ejipiti yaaba po.»

Currently Selected:

Mi cilima 46: BGP

Highlight

Copy