Mi cilima 37

Josefi togida

37—50

1Jakob den kaa Kanana diema nni, o baa mo n den kali naankani. 2Bine mo n tie Jakob bijaba. Josefi n den pia piiga n binalele, o den taani leni o kpeliba, ki kpaa li yangoli. Laa biga den ye leni o baa puoba Biliha leni Silipa bijaba. Josefi den wangi o baa, wan gbadi o kpeliba kani yaa mayuogidi kuli.

Josefi dangidi

3Isidayeli den bua Josefi ki cie o bijaba kuli, kelima o den baa o o nikpedi nni. O den tieni o po li liadiñoalincianli. 4O kpeliba den laa ke bi baa bua o ki cie bikuli, bi den cili ki nani o. Baa den fidi ki maadi o leni mi buama. 5Josefi den dangi ti dangidi, ki waani o kpeliba ke bi den nandi o ki pugini, kelima tini yaa po. 6O den yedi ba: «Cengi mani min den dangi yaa dangidi: 7Tikuli den ye u kuanu siiga ki luo ŋalikama baba. Lanwani, diidi mani, n yaa babili den fii ki sedi, ke yi yaa baba den lindi li, ki labini li nintuali.» 8O kpeliba den yedi o: «Naani a tama ke a baa diedi te? A tama ke a baa tua ti canbaa bi?» Bi go den nani o ki pugini, kelima o dangidi leni o maama po.

9O go den dangi ti dangidi, ki waani o kpeliba. O den yedi: «N dangi ke u yienu, o ŋmaalo leni piiga n ŋmabiyenga den labini n nintuali.»

10O den waani laa maama o baa leni o kpeliba kuli. O baa den funi leni o, ki yedi o: «Ŋan den dangi yaa dangidi yaa bundima tie be yo? Naani a tama ke tinba, mini, a naa leni a kpeliba baa cua ki gbaani ki pugi a?»

11O kpeliba den pia o po li nunponbiadili, ama o baa den tiani laa bonla, ki naa sundi.#JTT 7.9.

Josefi kpeliba kuadi o

12Josefi kpeliba den gedi Sikemi, ki kpaa bi baa yangoli. 13Isidayeli den yedi Josefi: «A kpeliba ye Sikemi ki kpaa li yangoli. Cua ne, min soani a bi kani.» Josefi den guani ki yedi o baa: «Mini nne.» 14Isidayeli den yedi o: «N mia ŋa, gedi ki le a kpeliba yaa ye leni laafia, ke li yangoli mo ye leni laafia, ki guani ki pa nni bi laabaalo.» Wan den soani o yeni, Josefi den fii Hebiron joaloangu nni, ki gedi Sikemi po. 15O joa den tuogi o ke o yaadi ku muagu nni. O den buali o: «A lingi be?» 16Josefi den yedi o: «N lingi n kpelibe. N mia ŋa ŋan waani nni ban kpaa bi yangoli naani.» 17Laa joa den yedi o: «Bi den ye nekanba, ama n den gbadi ke bi maadi ki tua: ‹Tin fii ki gedi Dotan.› » Josefi den ŋoadi o kpeliba ki laa ba Dotan po. 18Bi den laa o hali foagima. Hali ke o daa den nagini bi kani, bi den juogi ban baa kpa o maama. 19Bi den yedi biyaba: «Diidi ti dangidi daano n kpendi yeni! Cua mani moala tin kpa o, ki lu o caakuonliba nni. 20Ti baa waani ke bonbiiguba n ŋmani o. Li yaa puoli, ti baa le o dangidi n baa tua yaala.»

21Rubeni den gbadi lani kuli ki bili o yama nni ke o baa faabi Josefi. O den yedi ba: «Tin da ñani o miali ba.»

22Rubeni den yedi ba: «Yin da wuli mani mi soama. Lu o mani li naa caakuonli nni, yaali n ye mi fanpienma nni, ki da waani o fala leni yi nii. O den jagi ke o baa faabi o bi nuu nni, ki guani o o baa kani.»

23Josefi n den pundi o kpeliba kani, bi den landi o liadiñoalincianli, wan den la yaali yeni. 24Bi den taa o ki luni o li caakuonli nni. Laa caali den tie bonkuonli, kaa pia ñima. 25Lani n pendi, bi den kali ki baa je. Lanwani, bi den yaadi ki laa Isimayeli yaaba boncianla ke bi ñani Galaadi. Bi yuoyuodi den tugi yaa tibidi n pia u nuulumanu, mi kpama leni yaa daadi n yi mili, ki pia u nuulumanu, ban den caani yaala Ejipiti diema nni ki baa n kuadi. 26Lanwani, Juda den yedi o kpeliba: «Li baa yaa pia ti po mi laa fuome, ti yaa kpa ti waalo ki wuoni o soama? 27Cua mani tin kuadi o Isimayeli yaaba po, ki da waani o fala leni ti nii, kelima o tie ti waalo, ki taa leni ti ti gbanandi.» O kpeliba den cengi o maama. 28Madiani kpenkpenda n den pundi, bi den dadi Josefi ki ñani o li caakuonli nni, ki kuadi o Isimayeli yaaba po ki baa o po kujapiena piilie. Bi den taa o ki gedini Ejipiti. #JTT 7.9. 29Rubeni den guani ki cua li caakuonli yeni kani, ki sua ke Josefi naa go ye li niinni. 30O den padi o tiadi ki guani o waamu kani, ki yedi ba: «Ki biga naa go ye likani, nmo baa kua le?»

31Lanwani, bi den taa Josefi liadili, ki kodi li ŋuabuali, ki ñuagi li liadili yeni mi soama nni. 32Bi den soani li liadiñoalincianli yeni bi baa kani, ki teni ke bi yedi o: «Diidi tin den laa yaala. Bandi li yaa tie a bijua yaa liadili, bi li yàá tie lini.» 33Jakob den bandi li ki yedi: «Li tie n bijua yaa liadile. Bonbiiguba n ŋmani o. O toadi toadi Josefi bonjena jena.»

34Jakob den padi o tiadi, ki lani li paboanli tiadi, ki biidi o pali o bijua kuuma po, hali ke li waagi. 35O bijaba leni o bisiaba kuli den cua ki baa baagi o. Ama waa den bua ki gaa i baagi ba waamu. O den yedi: «Li baa yaa tie leni li paboanle ke n baa jiidi mi kuuma kaanu, ki pundi n bijua kani. O den buudi yeni o bijua po.»

36Madiani yaaba den kuadi Josefi Ejipiti nni Potifari po, yua n den tie o bado Faraon yaa koanbali, bi toatieba yudaano.

Currently Selected:

Mi cilima 37: BGP

Highlight

Copy