Jesu Tondiba Tuona 8

Soli faligi Jesu yaaba

1Landaali bi niba den cili ki wangi Kilisiti Nitaanli, yaaba n ye Jerusalemi o falabiado. Jesu tondiba yaa ka, yaaba n sieni kuli den yadi yadi Jude diema nni leni Samari diema nni. 2Yaa niba n fangi U Tienu den piini Etienni ki mua o po i kumoe boncianla. 3Soli den moandi ki baa bolini Kilisiti Nitaanli. O den koa ti diedi nni ki co bi jaba leni bi puoba kuli, ki kuandi ba li kpaadidieli nni. #JTT 22.4-5; 26.9-11.

Filipi wangi o Laabaaliŋamo Samari nni

4Yaaba n den yadi yadi yeni, den caa i kaani boncianla ki wangi U Tienu Laabaaliŋamo. 5Filipi den jiidi ki gedi yaa dogu n ye Samari diema nni ki wangi laa niba U Tienu n Gandi Yua maama fuuli. 6Bi niba boncianla n den gbadi Filipi n yedi yaala ki laa wan tiendi yaa bancianma, bi den cengi o yedima bonŋanla. 7Mu cicibiadimu den tangi ki ña mun ye yaaba yaa niinni. Yaaba yaa gbanandi n faani leni a waba boncianla moko den paagi. 8Li pamanli den tieni boncianla laa dogu nni.

9Li den sua ke o nilo ye u dogu yeni niinni ke li waagi, ki yi Simon. O den tiendi ti buligbandi ke li paki Samari yaaba, ki jigini o yuli ke o tie niciamo. 10Bi niba kuli, a bila leni a nikpela, den gaani o maama bonŋanla ki tua: «O naa joa n tie U Tienu paalu, ban yi yu u paaciamu.» 11Bi den cengi o maama kelima wan den tiendi yaa buligbandi den paki ba hali ke li waagi. 12Ama Filipi n den wangi ba U Tienu diema Laabaaliŋamo leni Jesu Kilisiti yeli, bi den daani o maama ke o batisi ba, bani bi jaba leni bi puoba kuli. 13Simon wani o ba den daani ke bi den batisi o. O den taabi Filipi ki nua wan tiendi yaa sinankeeninba leni yaa bancianma, ke li lidini o.

14Jesu tondiba yaaba n sieni Jerusalemi n den gbadi ke Samari yaaba gaa U Tienu maama, bi den soani bi kani Pieli leni Jan. 15Ban den pundi likani, bi den jaandi yaaba n daani po, ke ban baa U Tienu Fuoma Yua. 16U Tienu Fuoma Yua daa den jiidi bi siiga oba kuli po. Bi da den batisi ba o Diedo Jesu yeli nni bebe. 17Lani, Pieli leni Jan den maani bi po bi nii ke bi baa U Tienu Fuoma Yua.

18Simon n den laa ke bi baa U Tienu Fuoma Yua kelima bi tondiba maani bi po bi nii, o den cuani bi po i ligi ki yedi: 19«Pa mani mini moko laa paalu, ke min maani n nii yua yaa po, wan baa U Tienu Fuoma Yua.»

20Pieli den yedi o: «Fini leni a ligi kuli n bodi, kelima a tama ke a baa pa i lige ki baa U Tienu ŋanbili paabu. 21Ŋaa pia biinu leni ŋantaadoba kuli li naa tuonli nni, kelima a pali naa tiegi U Tienu nintuali. 22Lani yaa po, ŋan biidi a pali a yanjagibiadili po ki ŋaa li ki mia o Diedo li yaa baa tuo wan pa ŋa sugili ŋan pia yaa yanmaalima po. 23N nua ke li nunponbiadili gbie a niinni, ti tuonbiadi go loli a mo.» 24Simon den guani ki yedi: «Mia n po mani o Diedo, ke yin yedi yaala kuli n da cua n kani.»

25Pieli leni Jan n den tieni siedi o Diedo po ki go waani o maama likani, bi den fii ki guani Jerusalemi, ki wangi Samari dogi boncianla nni o Laabaaliŋamo.

Filipi leni Etiopi diema koanbali

26O Diedo maleki den maadi leni Filipi ki yedi o: «Fii ki gedi ganu po, ki pundi yaa sanu n ñani Jerusalemi ki caa Gasa dogu po, ki ŋoadi yaa sanu n poandi mi fanpienma nni yeni.» 27Filipi den fii ki gedi.

Li den sua ke Etiopi diema nilo, yua n tie moagiliga, Kandasi, Etiopi puobado koanbali, yua n den tie o ligikubilo, den gedi Jerusalemi ki baa n kpiagi U Tienu. 28Wan den lebidi ki baa guani o denpo, o den kaa i taami teligu#8.28 Lanyogunu po, yaaba n den pia li bali leni ti jigidi den koa i taami teliti nni ki caa ban bua ki gedi naani. nni ki cogi o saawalipualo Esayi tili. 29U Tienu Fuoma Yua den yedi Filipi: «Jaligi ki nandi yaa teligu n tie ne ki yegi leni gu.» 30Filipi den sani ki nagini gu ki gbadi ke Etiopi yua cogi o saawalipualo Esayi tili. O den buali o: «A gaa ŋan cogi yaala n bua ki yedi yaala bi?» 31O den guani ki yedi o: «N baa gaa lede ki bandi, nitoa yàá bundi n po?» Lani, o den mia Filipi wan do ki kali leni o teligu nni ban yegi.

32Wan den cogi i Diani nni naankani den maadi yaa maama n tie ne:

«Bi den dia o nani o pia yeni ki caani o u yankodikaanu po.

Nani ki pebiga n ŋmini yua n moagidi#8.32 moagidi: Bi tianba baa yedi lebi. o kobidi kani maama.

Waa den yaadi o ñoabu. #Esa 53.7-8.

33Bi den miidi o, ki jia o po yaa buudi n ki tiegi.

Ŋme n baa fidi ki togidi o puoliŋuani maama?

Kelima bi ñani o miali ŋanduna nni.»

34Ki moagiliga yeni den yedi Filipi: «N bua ŋan waani nni, o saawalipualo n maadi yua yaa maama. O maadi o yuli maama bi, bi nitoa yaama yo?» 35Filipi den cili leni laa dianu ki waani o Jesu Laabaaliŋamo.

36Ban den ŋua bi sanu ki suagi liiga, bi den pundi mi ñima kani. Ki moagiliga den yedi: «Diidi mi ñima. Be n yie n po ke n kan gaa mi batisima?» [ 37Filipi den guani ki yedi o: «A yaa daani leni a pali kuli, li baa fidi.» Ki moagiliga den guani ki yedi: «N daani ke Jesu Kilisiti tie U Tienu Bijua.»] 38O den waani yua n gobidi i taami teligu wan sieni gu. Filipi leni ki moagiliga den jiidi ki kua mi ñima nni, ke Filipi batisi o. 39Ban den ñani mi ñima nni, o Diedo Fuoma den taa Filipi ke ki moagiliga ki go laa o. Ki moagiliga den suagi liiga leni o sancenli ke o pali mani. 40Filipi den sua ke o ye Asoti dogu nni. O den ñani Asoti ki caa Sesare, ki wangi o Laabaaliŋamo wan tagini yaa dogi kuli hali ki ban pundi.

Currently Selected:

Jesu Tondiba Tuona 8: BGP

Highlight

Copy