Jesu Tondiba Tuona 5

Ananiasi leni o pua Safira

1Ama niyendo, ban yi yua Ananiasi leni o pua Safira den kuadi bi kuanu, 2ki juogi ki wuoni i ligi boagidima. O den cuani yii n sieni ki bili Jesu tondiba kani. 3Pieli den yedi o: «Ananiasi, be n teni ke Sutaani gbieni a pali ke a pua U Tienu Fuoma Yua mi faama, ki wuoni u kuanu yeni ligi boagidima? 4Ŋan daa bi kuadi u, wuu den tie a yaa yu ka? Ba ŋan kuadi u ki gaa yaa ligi, yii tie a yi ka? Be n teni ke a tia a pali nni, ki tieni ŋan tieni yaala na? Ŋaa pua bi niba ka mi faama, a pua ma U Tiene.» 5Ananiasi n den gbadi laa maama, o den baa ki kpe. Ti jawaanciandi den cuo yaaba n gbadi laa maama kuli. 6Bi jawaaba den fii ki bobini o bu kpalibu, ki taa o ki ban piini.

7Li den waagi nani leedotaa, ke Ananiasi pua kua, kaa bani yaala n tieni. 8Pieli den buali o: «Naani yin den kuadi u kuanu yaa ligi bianu nna?» O den guani ki yedi: «Yini n yeni.» 9Lani, Pieli den yedi o: «Be n teni ke yi taani ki juogi ki bua ki biigi o Diedo Fuoma? Diidi ki le, yaaba n ban piini a calo kpendi, bi pundi bu buliñoabu kani, bi baa taa amoko.» 10Lanyogunu liga, o pua yeni den baa Pieli taana kani ki kpe. Bi jawaaba den kua ki sua ke o kpe. Bi den taa o ki ban piini o o calo kani. 11Ti jawaanciandi den cuo Kilisiti Nitaanli kuli leni yaaba n den gbadi laa bonla kuli.

Jesu tondiba tiendi mi bancianma

12Jesu tondiba den tiendi bi niba siiga sinankeeninba leni mi bancianma boncianla. Yaaba n daani kuli den maani ki taagi kaanyendu U Tienu diegu nni, Salomon janli kani. 13Nitoaba kan den tuo ki taani leni ba. Ama bi niba kuli den jigindi ba boncianla. 14Bi niba boncianla, bi jaba leni bi puoba kuli, den pugidi ki daani o Diedo. 15Bi niba den kpendinni a yiama i sani nni ki duandi ba i duani leni ti duankaadi po, ke Pieli yaa tagini ki baa pendi, ba o jinjingu n yini bi tianba po. 16Yaa niba n yabi den ña Jerusalemi dobila nni moko, ki kpendinni bi yiama leni mu cicibiadimu n ye yaaba yaa niinni, ki yagini bi yama. Bikuli den paagi.

Bi waani Jesu tondiba fala

17Lani, li nunponbiadili den cuo bi kopadicianba bado leni yaaba n ye leni o, lani n tie Sadusieninba. 18Bi den cuo Jesu tondiba ki kuani li kpaadidieli nni. 19Ama ku ñiagu o Diedo maleki den luodi li kpaadidieli buliñoana ki ñani ba lienni, ki yedi ba: 20«Gedi mani ki ban sedi U Tienu diegu nni, ki yaa wangi yaaba n ye lienni li miali maama ne kuli.» 21Ban gbadi lani, bi den kua U Tienu diegu nni ku tiŋaapanpangu, ki cili ki bangi bi niba.

Bi kopadicianba bado leni yaaba n ye leni o n den cua, bi den yini Isidayeli yaaba nikpela kuli, bi cancantieba taanli po. Bi den soani li kpaadidieli po ke ban cuani Jesu tondiba. 22U Tienu diegu jiidikaaba n den gedi li kpaadidieli po, baa ban laa ba. Bi den guani ki cua ki yedi: 23«Ti pundi ki laa ke li kpaadidieli lo bonŋanla, ke li jiidikaaba se a buliñoana kani, ama tin luodi, tii laa ba niyendo lienni.» 24U Tienu diegu jiidikaaba yudaano leni bi kopadicianba yudanba n den gbadi laa maama, li den wudi ba ke bi bungi yaala n baa yuandi ki tieni. 25Niyendo den cua ki yedi ba: «Diidi ki le, yin den kuani yaa jaba li kpaadidieli nni yeni, se U Tienu diegu nni ki bangi bi niba.»

26Lani, U Tienu diegu jiidikaaba yudaano leni o lieba den gedi ki ban cuani Jesu tondiba kaa tieni ba paalu, kelima bi den jie bi yula po, ke bi niba n da ti lugidi ba a tana. 27Ban den cuani ba, bi den kuani ba bi cancantieba yeni kani. Bi kopadicianba bado den buali ba ki yedi: 28«Ti den kuani yi cain ke yin da go bangi bi niba laa yeli nni. Ama diidi ki le, yi teni ke yi bangima yeni gbieni Jerusalemi, ki go bua ki teni ke laa joa soama n baa ti yula po.»

29Pieli leni o tondilieba den guani ki yedi ba: «Li tie tiladi tin tuo ki yaa tiendi U Tienu n yedi yaala, ki cie bi nisaaliba n yedi yaala. 30Yin den joani Jesu yua ku daagu#5.30 Wan yedi: «Joani ku daagu po» yeni, ki naa yedi: «Joani o li dapoanpoanli po» tie ke o togidi Mi Tiadima 21.23. po ki kpa o, ti yaajanba Tienu fiini o bi tinkpiba siiga. 31U Tienu kpiagi o ki teni ke o ye o jienu kani ki tie Yudaano leni Candaano, kelima o bua Isidayeli yaaba n lebidi bi pala, wan pa ba sugili bi tuonbiadi po. 32Ti tie siedinba laa bonla kuli po, U Tienu Fuoma Yua, U Tienu n puni yua yaaba n tuo ki ŋua o maama kuli, moko tieni lipo siedi.»

33Bi cancantieba n den gbadi laa maama kuli, bi pala den beni ke li kandi, ke bi bua ki kpa Jesu tondiba. 34Ama bi siiga yendo yua n tie Farisieni, ki yi Gamalieli#5.34 Gamalieli: Gamalieli den tie U Tienu maama bangikaciamo lanyogunu. O den tie mi diema cancantieba siiga yua. Poli go den baa o bangima o yaa kane. Diidi Jesu Tondiba Tuona 22.3., ki tie li bali maama bangikaciamo, ki go tie bi niba kuli n jigini yua, den fii li taancianli siiga ki yedi ke ban ñani Jesu tondiba hali lan yeni waamu. 35Lani, o den ledi ki yedi: «Yinba Isidayeli yaaba, fangi mani yi yula leni yin bua ki tieni bi naa jaba yaala. 36Laa waagi ke ban den yi yua Tudasi, den fii ki jigini o yuli ke o tie niciamo, ke yaa niba n bua ki pundi niba kobinaa den taani ki ŋoadi o. Bi den kpa o, ke yaaba n tuo ki ŋua o kuli den yadi, ke liba kuli ki sieni. 37O yaa puoli, li coali yogunu, Galile yua Juda den fii ki baa bi niba ke bi ŋoadi o. Omoko den kpe, ke yaaba n tuo ki ŋua o kuli yadi. 38Lanwani, yaala n tie ne yaa po, n kadi ki yedi yi ke yin da tieni bi naa jaba liba, cedi mani ban gedi. Ban jagi yaala leni ban tiendi yaala yaa ñani bi nisaaliba kani, li baa bodi. 39Ama li yaa ñani U Tienu kani, yi kan fidi ki bolini la. Li go baa fidi mo yin ti sua ke yi kua U Tienu biili nni.»

40Bi cancantieba taanli yaaba den gaa o tundi, ki yini Jesu tondiba. Bi den teni ke bi pua ba i baliji, ki yie bi po leni u paalu ke ban da go maadi Jesu yeli nni, ki ŋaa ba.

41Jesu tondiba n den ñani bi cancantieba taanli kani, bi den mangi bi pala leni U Tienu n sua ke li pundi ban le i fe o Diedo yeli po. 42Daali kuli U Tienu diegu nni leni bi niba diedi nni kuli, bi den bangi bi niba ki wangi ba Jesu Kilisiti Laabaaliŋamo, kaa cedi.

Currently Selected:

Jesu Tondiba Tuona 5: BGP

Highlight

Copy