MATIYU 24
24
1Jesu n den ñani U Tienu diegu nni ki cuoni ki caa, o ŋoadikaaba den nagini ki baa waani o U Tienu diegu dieciama. 2Jesu den yedi ba: «Yi nua laa bonla kuli? N waani yi i moamoani, ke baa tanyenli kan sieni ki yaa maa li lieli po, ke a kuli naa padi ki baa.»
Yaa fala n baa ti cua mi juodima yogunu
(Mak 13.3-13; Luk 21.7-19)
3Jesu n den ka *Olifie Tiidi juali po, o ŋoadikaaba den cua bani bi bebe ki yedi o: «Waani ti laa bonla n baa ti cua yaa yogunu, leni yaa sinankeeni n baa waani ti a cuama leni ŋanduna juodima yogunu.»
4Jesu den goa ki yedi ba: «Fangi mani yi yula ke niloba n da boandi yi. 5Kelima bi niba boncianla baa ti cua n yeli nni ki yedi: ‹Mini n tie *U Tienu n Gandi Yua.› Lani bi baa boandi bi niba boncianla. 6Yi baa gbadi ke bi maadi bu toabu maama, ki go maadi bu toabu laabaalo maama. Da yagi mani yi yama, kelima laa bonla baa cua tiladi. Ama li da kan tua mi juodima ka. 7U nibuolu baa fii ki tuogi leni nibuoto, mi diema mo baa fii ki tuogi leni dietoama. Mi koncianma leni mi tindigibima baa tiendi i kaantiami. 8Laa bonla kuli da tie nani u maditugukoanu cilima bebe yene.
9Laa yogunu bi baa yaa wangi yi fala, ki go kpaani yi. I nibuoli kuli baa nandi yi kelima n yeli po.#Mat 10.22 10Li baa tua li tingbali bonla niba boncianla. Bi baa janbidi biyaba ki nandi biyaba. 11Bi sawalipua-faadanba baa fii boncianla, ki boandi bi niba boncianla. 12Mi biadima n baa pugini maama po, niba boncianla buama baa wadi. 13Ama yaaba n juuni hali mi juodima baa tindi.#Mat 10.22 14*U Tienu diema Laabaaliŋamo na da baa kpa pundi ŋanduna kuli nni, ki tua siedi i nibuoli kuli po. Lani yaa pendi mi juodima baa cua.
Ti caginbiaditi
(Mak 13.14-23; Luk 21.20-24)
15Lanwani yi yaa ti laa ke yaa cagindi n baa wudi bi niba gbani ye u *kaangagidiŋamu nni, o sawalipualo Danieli n den maadi yaadi yaa maama, yua n cogi n kpaagi bonŋanla.#Dan 9.27; 11.31; 12.11 16Laa yogunu yaaba n baa ye Jude nni n sani ki gedi a juana po. 17Yua n ye o doangu yuli po,#24.17 Jude nni bi den maa yaa diena n tie a dietanpoala ki maa a yuli po goanjenjenga ki gaani. Lipo tie ban baa fidi ki kali ki boe ki je, ki go duani naani. n da jiidi ki kua deenni ki baa taa yaa tiadi n ye lienni.#Luk 17.31 18Yua n ye u kuanu po mo n da lebidi ki guani o denpo ki baan taa o tiayekaadi. 19Fala baa ye leni yaa puoba n punbi, leni yaaba n da ŋaandi laa dana nni. 20Mia mani U Tienu ke yi nuama n da tua ku fawaagu yogunu, yaaka mi *fuodima daali. 21Kelima fala baa yabidi laa yogunu hali maama ke o buolu daa tieni ki cili ŋanduna cilima ki pundi hali moala. O buolu kan go tieni mo.#Dan 12.1; Doa 7.14 22U Tienu yaa bi wadi laa dana nisaaloba kuli kan bi tindi, ama kelima wan gandi yaaba po, o baa wadi laa dana.
23Laa yogunu nilo yaa yedi yi: ‹U Tienu n Gandi Yua ye ne,› yaaka: ‹O ye nepo,› yin da daani o maama. 24Kelima a tuonanda yaaba n yedi ke bi tie U Tienu n gandi yaaba leni bi sawalipua-faadanba baa fii ki yaa tiendi sinankeenciami leni li bonlidikaala, hali ke bi yaa bi baa fidi, bi bi baa boandi baa U Tienu n gandi yaaba moko. 25N tuodi ki waani yi laa bonla. 26Lanwani, bi yaa ti yedi yi: ‹O ye li fuali nni,› yin da gedi. Bi yaa ti yedi yi: ‹O wuo a diena nni,› yin da daani ma.#Luk 17.23-24 27Kelima nani mi tañigima n yen ña puoli ki yendi ki poandi ki gedi hali nintuali maama, o *Ja Bijua cuama baa tua yene. 28Li bonkpienla n ye naani kuli, i kaabi baa taani lankane.#Luk 17.37
O Ja Bijua cuama
(Mak 13.24-27; Luk 21.25-28)
29Laa dana fala yaa pendi yaa yogunu, u yienu baa biigi, o ŋmaalo mo kan go yendi, a ŋmabila baa ña tanpoli ki baali, tanpoli paaciami mo baa digibi.#Esa 13.10; 34.4; Esk 32.7; Jl 2.10; 3.4; Doa 6.12-13 30Lani, o Ja Bijua sinankeeni baa doagidi tanpoli, ŋanduna nibuoli kuli baa mua. Bi baa le ke o Ja Bijua ye ti tawadi nni ki kpendi leni u paaciamu leni ti kpiagiciandi.#Dan 7.13; Sak 12.10-14; Doa 1.7 31O baa soani o malekinba leni kakaci ban yaa piebi ki taani U Tienu n gandi yaaba ŋanduna kaannaadi kuli nni, ki cili nepo yaa bianu ki yaa caa hali u poyu.
Bu kankanbu kpanjama
(Mak 13.28-31; Luk 21.29-33)
32Bandi mani bu kankanbu kpanjama n bangi yaala. Bu beni yaa faadi ki cili ki bundi, yi bani ke ku siagu nagidi. 33Li go tie yene, yi yaa ti laa laa bonla kuli, yin bandi ke o Ja Bijua nagini, ki ye bu buliñoabu kani. 34N waani yi i moamoani ke mi naa nifiima kuli kan pendi ke laa bonla kuli ki tieni. 35Tanpoli leni ki tinga kuli baa pendi, ama n maama kan pendi hali abada.
U Tienu bebe n bani o Ja Bijua cuama yogunu
(Mak 13.32-37; Luk 17.26-30,34-36)
36Oba kuli ki bani laa bonla n baa ti cua yaa daali leni yaa yogunu, baa tanpoli malekinba ki bani, baa Bijua, se Baa bebe. 37Lan den tie maama Nowe yogunu, li go baa tie yeni o Ja Bijua cuama yogunu.#Cil 6.5-8 38Hali ki tabolinkaaga n daa den cua, bi nisaaliba den di ki go ñu, ki taani bi puoba, ki puuni bi bisiaba bi jaba, hali Nowe n den ti kua ku ñinbiaciangu nni yaa daali. 39Baa den faami liba kuli po hali ki tabolinkaaga n den ti cua ki koadi bikuli. Li baa go tie yene o Ja Bijua cuama yogunu.#Cil 7.6-24 40Laa yogunu niba lie baa ye u kuanu nni, bi baa taa yendo ki ŋa yendo, 41puoba lie baa naani li naali nni, bi baa taa yendo ki ŋa o lielo. 42Lani yaa po yin yaa gu mani, kelima yii bani yi Diedo n baa cua yaa daali. 43Yin bandi bonŋanla ke o diedaano yaa bi bani li conconli n baa cua ku ñiagu yaa yogunu, o bi baa gu ki kan cedi wan cibi o dieli.#Luk 12.39-40 44Yeni, yi moko n bogini ki yaa gu, kelima o Ja Bijua baa cua yin ki daani o yaa yogunu.
O naacendugika leni o naacenbiado
(Luk 12.41-48)
45Ŋme n tie yaa naacendugika n pia mi yanfuoma, ke o canbaa guuni o o niba ke wan yaa tendi ba mi jiema li yogunu yaa pundi? 46Li pamanli ye leni laa naacemo, o canbaa yaa kpeni ki sua ke o tiendi yeni. 47N yedi yi i moamoani, o canbaa baa guuni o o piama kuli. 48Ama o yaa tie naacenbiado ki yedi o pali nni: ‹N canbaa waagi mi kpenma,› 49ki cili ki yaa pua o naacenlieba, ki di ki go ñu leni a dañogaada, 50laa naacemo canbaa baa kpeni wan ki daani o yaa daali leni wan ki faami yaa yogunu. 51O baa teni ban pua o hali ki poagili o, ki gedini o ki ban taani leni pala lie danba a bubula leni mi ñincegima n baa ye naankani.
Powandiana piiga kpanjama
Currently Selected:
MATIYU 24: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
