MI CILIMA 49
49
1Jakobo den yini o bijaba ki yedi ba:
«Taani mani ke n baa waani yi yaala n faadi ki ye yi kuli yendo yendo yaa po.
2Taani mani ki cengi, yinba Jakobo bijaba,
Yi baa Isalele maama.
3Fini Lubena, n bijakpelo
A tie n fidu leni n paalu yaa bonluonka-kpiala.
A tugi li yuli ti jigidi yaa po,
A go tugi li yuli u paalu moko yaa po.
4A pia mi jama nani mi ñima yeni.
Ama a kan go yaa tie liiga yua,
Kelima a den doni a baa duanu po.
A den doni yeni, ki joagini n duanu.
5Simeyono leni Lefi tie kpelo leni waalo.
Bi jugisiemu tie mi poagilima yaa tuonsoantiadi.
6N naano n da kua bi juogu nni.
N yantiali n da taani bi taanli nni
Kelima bi pabienli nni, bi den ku bi niba.
Bi paadinyema nni, bi den jia a naatona gadibanjiini.
7Bi pabienli n tua ti solindi yaa bonla.
Kelima li poagili bi niba.
Bi pafiima moko n tua ti solindi kelima mi pia i nunkuomi.
N baa paadi ba Jakobo yaaba siiga,
N baa yadi ba Isalele yaaba siiga.
8Juda, a baa baa ti pagidi a waamu leni a kpeliba kani.
A nuu baa mubini a yibalinba bunkpana.
A waamu leni a kpeliba baa gbaani ki pugi a.
9Juda tie nani li yangbanbili yeni.
N bijua, a ña ŋan ku yaa yandi kani.
O poali o duna ki labini nani o yangbanlo yeni
O tie nani o yangbanñua, ŋme n baa fidi ki fiini o?#Coa 24.9; Doa 5.5
10Li bali yaa gbiamu kan foagidi Juda kani,
O badiciamo yaa gbiamu kan fuadi o taana nni.
Hali yua n die o n baa cua,
Bi niba kuli n baa tuo yua.
11O baa loli o ŋunbo i duven tiidi nni,
Ki loli o ŋunbiga yaa benu n ŋani ki cie i beni kuli kani.
O ŋuudi o kpalibu leni mi damanma.
12O nuni moani kelima mi daama n moandi o nuni.
Mi naaŋanma mo n pendi o ñina.
13Sabulono baa yaa ye mi ñincianma yaa boanjaali kani,
O baa yaa ye ti ñinbiadi kuli boanjaali kani.
O bianu baa tandi ki pundi Sidoni kunkunu po.
14Isakala tie yaa ŋunbo n pa
Ki duandi a yandiena nni.
15O nua ke wan duani yaa kaanu mani opo.
O nua ke mi diema ŋani boncianla.
O tuo ki ga li tugili.
O tuo ki baa soani li yonbituonli.
16Dana baa jia ti buudi leni o niba
Kelima o tie Isalele yaaba yaa buoli siiga buoyendu.
17Dana baa yaa tie wa yo u sanu nni.
O baa yaa tie waalabili yo u sankunu,
Yua n ñidi o taamo taajentinda,
Ke yua jagi o n lu ki yandi ki baa yanyanli.
18N dugi a yaa *faabima po, Li Miali Diedo.
19Gada baa sua ke bi sanjaba gaani ki cebini o.
Ama o baa pua ba ki deli ba.
20Asela mo yaa kpaandi n ŋani boncianla,
O baa kuadi bi badicianba po yaa jiema n ŋani.
21Nefitali tie yaa pialo n die o yuli ku muagu nni.
O maadi yaa maama n ŋani bonŋanla.
22Josefi tie yaa tibu n luoni bonŋanla yaa benu.
Yaa tibu n luoni bonŋanla ki se li ñinbunli kani yeni yaa benu yo.
O beni kpedi ki yiini u bilinu po.
23Bi den cidi o ki toani o i piemi.
A dabantuada den fii opo leni ki nanga.
24Ama o yaa dabanli den se ki pa bonŋanla.
O nii den paagi kelima Jakobo n ŋua yua
Tie U Paaciamu Kuli Daano.
Li tie yene ke o tua Isalele yaaba yankpaalo leni bi tanciangu.
25Li tie a baa yaa Tienu yua n todi a yaa tuonli.
Li tie U Paaciamu Kuli Daano yaa tuonli wani yua n baa seligi a,
Leni yaa sela n ñani tanpoli po ki jiidi,
Leni yaa sela n tie tiipo yaa ñima,
Leni yaa sela n tie ti madi bi puoba leni ti yandi kuli po.
26A baa yaa sela baa kpedi ki pendi n baanba yaa sela kuli,
Hali ki ban pundi yaa juana n kan bodi yaa tanpojoma.
Laa sela n jiidi Josefi yaa yuli po,
Wani yua n tugi li yuli o kpeliba leni o waalo yaa siiga.
27Benjamina tie o fuasangbanlo yua n ŋmani.
Ku tiŋaagu, o ŋmani wan cuo yaala,
Ku yenjuogu o boagidi wan baa yaala.»
28Bani n tie yaaba n den tua Isalele yaaba yaa piiga n buoliedi. Lani n tie bi baa n den yedi yaala wan den gaali ba yaa yogunu. O den gaali ba, yua kuli leni o yaa gaali n den tie maama.
Jakobo kuuma
29Lanwani o den ñani bipo yaa ñoabonli n tie na: «N yaa kpe yaa yogunu, yin taani nni leni n yaajanba. Yin piini nni yaa tanlongu n ye Heta yua Efilona yaa kuanu nni. 30Li tie yaa tanlongu n ye Makipela yaa kuanu nni ki tiegi Mamile, Kanana diema nni. U tie Abalahama n den da yaa kaanu Heta yua Efilona kani ke li tua o kula kaanu.#Cil 23.3-20 31Bi den piini Abalahama leni o pua Sala lankani. Bi go den piini Isaaka leni o pua Lebeka lankani. N go piini Lea moko lankani.#Cil 25.9-10; 35.29 32Bi den da laa kuanu leni yaa tanlongu n ye likani Heta yaa bijaba kani.» 33Jakobo n den ñani laa ñoabonli kuli o bijaba po ki gbeni, o den tandi o taana o duanu po, ki kpe ki kuni o danba kani.#JTT 7.15
Jakobo piinma boginli
Currently Selected:
MI CILIMA 49: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
