MI CILIMA 42
42
1Jakobo n den gbadi ke *ŋalikama ye Ejipiti nni, o den yedi o bijaba: «Be yaa po ke yi se ki diidi yiyaba?» 2O den yedi: «Diidi, n gbadi ke ŋalikama ye Ejipiti nni. Gedi mani lipo ki ban da tipo ŋalikama ke tin yaa ye ki da kpe.»#JTT 7.12 3Josefi yaa kpeliba bonba piiga den gedi Ejipiti ki baa n da ŋalikama. 4Jakobo naa den cedi ke Benjamina, Josefi waalo yegi leni ba, kelima o den jie ke bonbiadiliba n da tieni o. 5Jakobo bijaba den cua Ejipiti nni ki baa da ŋalikama ki taani leni yaaba n den cua kuli, kelima mi koma den ye Kanana diema nni kuli.
Josefi tieni nani waa bani o kpeliba yeni
6Josefi den diedi mi diema, wani n den kuadi ŋalikama mi diema yaaba kuli po. Josefi yaa kpeliba den cua ki gbaani ki pugi o. 7Josefi den laa o kpeliba ki bandi ba, ama o den tieni nani ke o tie o nilamo bikani. O den maadi yaa maama n pa ki yedi ba: «Yi ñani le?» Bi den goa ki yedi: «Ti ñani Kanana diema nni ki cua ki baa da mi jiema.» 8Josefi den bandi o kpeliba, ama bani, bi naa den bandi o. 9Josefi den tiadi wan den dangi yaa dangidi bipo ki yedi ba: «Yi tie dodiidiba, yi cua ki baa diidi ki le yaa kaani n tadi mi diema nni.»#Cil 37.5-10 10Bi den goa ki yedi: «Yeni kaa ba, ti diedo! A naacenba cua ki bua da ŋalikama yo. 11Tikuli tie jayendo yaa bijaba, ti cua leni li papienli. A naacenba naa tie dodiidiba kaa ba.» 12O den yedi ba: «Yeni kaa ba! Yi cua ki baa diidi ki le mi diema nni yaa kaani n tadi. Yi li cua lani yaa po yo.» 13Bi den goa ki yedi o: «Tinba a naacenba, ti tie piiga n bila lie. Tikuli tie jayendo yaa bila Kanana diema nni. Diidi ku waajuogu ye leni ti baa dinla po, yendo mo naa go ye.» 14Josefi den yedi ba: «N bi yedi yi, yi tie dodiidiba. 15Diidi tin baa biigi yi maama. Hali *Falono yaa miali po, yi kan fii nekanba se yi waajuogu cua. 16Soani mani niyendo yi siiga wan gedi ki woli yi waalo. Yinba, yi baa ye nekanba ki tie kpaada. Tin baa biigi yi maama yeni. N baa bandi yi yaa maadi i moamoani. Lani yaaka hali Falono yaa miali po yi tie dodiidiba.» 17O den taani ki kuani bikuli li kpaadidieli nni dana taa. 18Li dataali daali Josefi den yedi ba: «Tieni mani min baa waani yi yaala, lani yi baa ye. N jie U Tienu. 19Yi yaa tie nimoanba, yendo yi siiga n kali ki yaa lo li kpaadidieli nni, yinba yin fii ki gedini ŋalikama yi denpo yaaba po, 20ki ban cuani yi waajuogu ke lan doagidi ke yi maadi moamoani, ke yin da ti kpe.» Bi den tieni yeni.
21Lanwani bi den yedi biyaba: «I moamoani, ti den tudi ti waalo po, kelima ti den laa o naano yaa yanyagidi ke o den miadi ti sugili, ama ti naa den cengi o baa waamu. Li tie lani yaa po ke o naa falaciamo cua tikani.» 22Lubena den yedi ba: «Mii den yedi yi yin da tieni bonbiadila ki biga po? Ama yi naa den cengi n maama baa waamu. Diidi moala bi go buali ti o soama.»#Cil 37.21-22 23Baa den bani ke Josefi gba bi maama kelima o den maadi bipo leni o soagindo. 24O den foagidi bikani ki ban buudi.
Jakobo bijaba guani Kanana diema nni
O go den cua ki maadi leni ba. Lanwani o den ñani bi siiga Simeyono ki teni ke bi luoni o li kpaadidieli nni bi nintuali.
25Josefi den puogi ke ban gbieni bi kpalipadi ŋalikama ki go yedi ke ban guani yua kuli ligi o kpalipiagu nni ki go pa ba mi jiema u sanu po. Bi den tieni yeni. 26Bi den tuni bi ŋunbi ŋalikama ki fii. 27Ban den jiidi yaa kaanu ki baa duani ku ñiagu, yendo bi siiga den loti o kpalipiagu ki baa pa o ŋunbo mi jiema. O den laa i ligi ke yi ye o kpalipiagu ñoabu nni. 28O den yedi o lieba: «Bi guani n ligi! Diidi i ye n kpalipiagu nni.» Bikuli tugusoama den sani ke bi digibi ki yedi biyaba: «U Tienu tieni tipo be n yeni?»
29Bi den goa kuni bi baa Jakobo kani Kanana diema nni ki waani o yaala n den tieni ba kuli. 30Bi den yedi: «O ja yua n tie mi diema yaa diedo den maadi leni ti yaa maama n pa ki tama ke ti tie dodiidiba. 31Ti den yedi o: ‹Ti tie nimoanba, tii tie dodiidiba kaa ba. 32Ti tie piiga n bila lie, jamadiyendo yaa bijaba. Yendo naa go ye, ku waajuogu ye leni ti baa dinla Kanana diema nni.› 33O ja yeni, yua n tie mi diema yaa diedo den yedi ti: ‹Diidi min baa bandi yi yaa tie nimoanba maama. Ŋa mani yendo yi siiga leni nni ki taa yaala n baa dini yi denpo yaaba ki fii ki kuni ki goa ki cuani yi waajuogu nekanba. 34Yeni n baa bandi ke yii tie dodiidiba, ke yi tie nimoanba. N baa guani yi yi kpelo, lani yi baa fidi ki yaa tiendi u kpendu mi diema nni yin bua maama.› »
35Ban den ñani bi ŋalikama bi kpalipadi nni yaa yogunu, bi den sua ke yua kuli yaa ligi den gbiabi ki ye o kpalipiagu nni. Bikuli, bani leni bi baa den laa bi ligi ke i gbiabi, ke ti jawaandi den cuo ba. 36Bi baa Jakobo den yedi ba: «Yi fie nni n bila kuli. Josefi naa go ye, Simeyono naa go ye, ke yi go bua ki taa Benjamina mo. Laa bonla kuli goa ki baa n yaa yuli po.» 37Lubena den yedi o baa: «N yaa guani apo Benjamina ŋan kpa n bijaliediba. Piani nni o, n baa guani o a kani.» 38Jakobo den yedi: «N bijua kan yegi leni yi hali abada kelima o kpelo den kpe, wani bebe n sieni. Bonbiadila yaa tieni o yin caa yaa yogunu u dogu, yi baa teni n yukobipiendi n jiidi mi kuuma kaanu leni li paboanli.»
Jakobo tuo ke Benjamina n yegi leni o kpeliba
Currently Selected:
MI CILIMA 42: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
