MI CILIMA 35
35
1U Tienu den yedi Jakobo: «Fii ki gedi Betela ki ban yaa ye lankani. Lankani a baa maa li *padibinbinli U Tienu yua n den doagidi a kani yaa po, ŋan den tiini a kpelo Esayu yaa yogunu.»#Cil 28.11-17
2Jakobo den yedi o diegu nni yaaba leni yaaba n den ye leni o kuli: «Ñani mani i *buli yi n ye yikani, ŋanbi yiba ki lebidi yi tiadi. 3Ti baa fii ki gedi Betela. Lankani n baa maa li padibinbinli U Tienu yua n den cengi n miabu n falaciamo daali po, yua n den ye leni nni min den goadi yaa goada nni kuli.»
4Bi den teni Jakobo yaa buli n den ye bi nuu nni kuli ki go puni o bi tubilenlena. Jakobo den piini likuli yaa tibu n yi telebinti kani, yaabu n kuu leni Sikema. 5Lan den pendi bi den fii. U Tienu den teni ke ti jawaanciandi den cuo yaa dogi n den lindi ba kuli, ke baa den tuo ki ŋoadi ki deli Jakobo bijaba.
6Jakobo leni yaaba n den ye leni o kuli den pundi Lusa, yu n go yi Betela Kanana diema nni. 7O den maa li padibinbinli lankani ki yini laa kaanu El-Betela kelima li den tie lankane ke U Tienu den doagidi o kani wan den sani o kpelo kani yaa yogunu.
8Lebeka wubido Debola den kpe ke bi den piini o Betela sena tiidi kani, ke bi den yini laa tibu a bubula yaa sena.
9U Tienu go den doagidi Jakobo kani, wan den ñani Padana-Alama ki guani yaa yogunu ki seligi o.
10U Tienu den yedi o:
«A yeli tie Jakobo
Bi kan go yini a Jakobo,
Ama a yeli baa yi Isalele.»
Wan den puni o yaa yeli den tie Isalele.#Cil 32.28
11U Tienu den yedi o:
«N tie U Tienu yua n pia u paalu kuli.
Ŋan yaa maa a bila ki pugidi.
U nibuolu leni i nibuoli boncianla baa ña a niinni,
Bi badiba baa ña a tugu nni.
12N baa pa ŋa min den puni Abalahama leni Isaaka yaa diema,
N baa pa mi naa diema
A yaa yaabila a puoli po.»#Cil 17.4-8
13U Tienu den fii ki doni tanpoli wan den maadi leni o naankani. 14Jakobo den maa li bontiadikaala U Tienu n den maadi leni o naankani yeni, yaa bontiadikaala n tie a tana. O den cabi mi ñima lankani ki wuli mi kpama li yuli po. 15Jakobo den yini laa kaanu Betela, U Tienu n den maadi leni o naankani.#Cil 28.18-19
Benjamina madi leni Lasela mo yaa kuuma
16Bi den fii Betela ke laa go den sieni ke li foagi ban pundi Yufilata ke Lasela den mali. O madi den paagi opo boncianla. 17Hali ke o da ye o madifala siiga o madimaanlo den yedi o: «Ŋan da jie, kelima a go baa bonjaga.»
18Yaa yogunu ke o den bua ki cabi o naano kelima o den baa kpe, o den yini o Benoni, yaali n bundi li paboanli biga. Ama o baa den yini o Benjamina yaali n bundi n nijienu biga.
19Lasela den kpe ke bi den piini o Yufilata yaa sanu po yu n go yi Betelema. 20Jakobo den sieni li bontiadikaala o kuli po. Lasela yaa kuli yaa bontiadikaala yeni baa ye hali dinla.
21Isalele den fii lankani ki tii o gbandieli Migidali-Edela yaa liiga. 22Hali ke Isalele n da den ka laa diema nni, Lubena den gedi ki duani leni Biliha o baa potuado. Isalele den gbadi laa laabaali. Jakobo bijaba den pundi piiga n bonba lie.#Cil 49.4 23Lea yaa bijaba den tie Lubena, Jakobo bijakpelo, leni Simeyono leni Lefi leni Juda leni Isakala leni Sabulono. 24Lasela yaa bijaba den tie Josefi leni Benjamina. 25Lasela yaa potuado Biliha yaa bijaba den tie Dana leni Nefitali. 26Lea yaa potuado Silipa yaa bijaba den tie Gada leni Asela. Bani n tie Jakobo bijaba, ban den mali opo yaaba Padana-Alama dogu nni.
27Jakobo den pundi o baa Isaaka kani, Mamile dogu, Kilijati-Aliba yeni, yu n go yi Ebiloni, Abalahama leni Isaaka n den kali naankani.#Cil 13.18 28Isaaka yaa bina den pundi bina kobiga n piinii. 29O den podi ki guo a dana ki kpe ki kuni o danba kani. O bijaba Esayu leni Jakobo den piini o.
Esayu gedi ki ban kali Edomi diema nni
Currently Selected:
MI CILIMA 35: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
