MI CILIMA 22
22
1Laa bonla n den pendi, U Tienu den biigi Abalahama ki yini o ki yedi o: «Abalahama!» O den goa yedi o: «Mini n na.»#Ebl 11.17-19
2U Tienu den yedi: «Ŋan taa a bijua, a bijayenyendo, ŋan bua yua yeni, Isaaka, ki gedi hali Molija yaa diema nni ki padi o li *padijuukaali min baa waani a yaa juali kani.»#2Baj 3.1 3Abalahama den fii ku tiŋaapanpangu ki paani o ŋunbo li gaali, ki go taa naacenba lie leni o bijua Isaaka. O den yagidi ti daadi mi padifantama po ki fii ki baa gedi U Tienu n den waani o yaa kaanu. 4Li dataali, Abalahama den yaadi ki laa li kaanu hali foagima. 5O den yedi o naacenba: «Yin sedi mani nekanba leni o ŋunbo mini leni o jawaalo, ti baa gedi hali neponba ki ban kpiagi U Tienu. Li yaa pendi ti baa goa ki cua yi kani.»
6Abalahama den taa mi padifantama yaa daadi ki tuni o bijua Isaaka ki kubi mi fantama leni ki juga o nuu nni. Bani bonba lie kuli den cuoni ki caa. 7Isaaka den yini o baa. O baa den yedi o: «Mini na n bijua.» Lane Isaaka den goa ki yedi o: «Diidi mi fantama leni ti daadi nne, li padijuukaali pebiga mo nan ye le?»
8Abalahama den goa ki yedi o: «N bijua, U Tienu wani oba n baa pa li padijuukaali pebiga.» Bani bonba lie yeni kuli den suagi liiga. 9Ban den pundi U Tienu n den waani Abalahama yaa kaanu, o den maa li *padibinbinli ki maani ti daadi li padibinbinli po. O den loli o bijua Isaaka ki maani o yaa daadi n den maa li padibinbinli po.#Jak 2.21 10Lanwani Abalahama den tandi o nuu ki taa ki juga ki baa kodi o bijua. 11Lanyogunu Li Miali Diedo maleki den tiani tanpoli po ki yini o ki yedi o: «Abalahama! Abalahama!» O den goa ki yedi: «Mini na.»
12Maleki den yedi o: «Ŋan da sii o jawaalo yeni, ŋan da tieni o bonbiadiliba kuli kelima n bani moala ke a fangi U Tienu ke ŋaa yie ki baa pa nni a bijayenyendo.»
13Abalahama den yaadi ki laa li petonli o puoli po ke ku fatuugu kubi li yina. Abalahama den gedi ki cuo li petonli ki padi li li padijuukaali ki lebidi o bijua. 14Abalahama den yini laa kaanu «U Tienu baa pa ti tin luo yaala.» Lani n teni ke bi baa tua hali dinla: «Li Miali Diedo juali po o baa pa ti tin luo yaala.»
15Li Miali Diedo maleki go den tiani tanpoli po mi taaliema ki yini Abalahama ki yedi o: 16«Mini Li Miali Diedo n yedi mine: ‹Kelima a den tieni lankuli ki naa yie npo a bijua, a bijayenyendo,#Ebl 6.13-14 17n baa seligi a ki pugidi a puoliŋuani ban yaa yaba nani mi ñincianma boanjaali yaa tanbiima n de maama yeni. A yaa yaabila baa diedi bi yibalinba yaa buliñoana.#Ebl 11.12 18Ŋanduna nibuoli kuli baa baa li seli kelima a yaa yaabila yaa po, kelima a den tuo ki cengi n nialu.› »#JTT 3.25
19Abalahama den guani o naacenba kani ke bi fii ki taani ki kuni Beli-Seba po kelima bi den kaa laa dogu nne.
20Lan den pendi bi den yedi Abalahama: «Diidi Milika moko mali a bonjala a waalo Nahola po.» 21O bijakpelo n tie Utisi, o waalo Busa leni Alama yaa baa Kemuela, 22Keseda, Haso, Pilidasa, Jidilafa leni Betuela. Betuela den mali ki bonpuoga Peleka. 23Bani n tie Milika n den mali yaa bijaniidiba Abalahama yaa waalo Nahola po.
24Nahola potuado yua n yi Leuma moko den mali opo Tebaka, Gahama, Tahasa leni Maaka.
Sala kuuma
Currently Selected:
MI CILIMA 22: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
