JESU TONDIBA TUONA 4
4
1Pieli leni Jan n da den maadi leni bi niba yeni, bi kopadicianba leni U Tienu diegu guudikaaba yudaano leni*Sadusieninba den cua likani. 2Bi pala den beni kelima Pieli leni Jan bangi bi niba ki wangi ba ke bi tinkpiba kuli baa fii kelima Jesu den fii bi tinkpiba siiga. 3Bi den cuo ba ki kuani ba li kpaadidieli nni hali lan baa fii ki fa, kelima u yienu den bua ki baa. 4Baa yeni, yaaba n den cengi bi maama siiga boncianla den daani Jesu, ke bi coali den bua ki pundi niba tudamuu (5 000).
5Lan den fii ki fa Jufinba yudanba leni bi nikpeliba leni li *bali maama bangikaaba den taani Jelusalema. 6Bi kopadicianba bado Hana, leni Kayifa, leni Jan, leni Alesanda leni yaaba n sieni ki tie bi kopadicianba yudanba kuli. 7Bi den teni ke Pieli leni Jan sedi bi siiga ke bi buali ba: «U laa paalu yaa po yo, bi ŋme yaa yeli nni ke yi tieni yeni?»
8Lani U Tienu Fuoma Yua den gbieni Pieli ke o den yedi ba: 9«Yinba bi paatieba leni Isalele nikpeliba, yi buali ti dinla yaa tuonŋanli n tieni o naa wabo po maama fuuli, leni lan ga maama ke o paagi. 10To, yinba yaaba n ye ne kuli, leni Isalele yaaba yaaba n sieni kuli, yin bandi mani ke li tie kelima Nasaleti yua Jesu Kilisiti yaa yeli po, yin den joani yua li *dapoanpoanli po, ke U Tienu fiini o bi tinkpiba siiga, ke yaa ja n tie na paagi cain ki se yi nintuali. 11Wani Jesu n tie:
Yinba bi tanmaaba n den luni yaa tanli,
Lini n tua li tanpuuli tanjigi.#Pis 118.22
12Mi *tindima ki ye nitoa kuli kani, kelima yetoali kuli ki ye ŋanduna nni tin baa tindi kelima yaali yaa po tiladi.»
13Bi *cancannikpeliba yeni n den laa Pieli leni Jan n pia yaa papaali, li den paki ba kelima bi bani ke bi tie taliginba kaa kua cogu. Bi den bandi ke bi tie yaaba n den taa ki ye leni Jesu. 14Ban den nua ke yaa ja n paagi yeni se Pieli leni Jan kani, baa den fidi ki guani ba liba. 15Bi den teni ke bi ñani bi cancannikpeliba taanli nni, ke bi ledi ki juogi ki yedi: «Ti baa tieni bi naa jaba lede? 16Kelima Jelusalema yaaba kuli bani ke bi tieni mi bancianma, ti moko nan kan fidi ki nia. 17Ama ke laa maama n da yadi bi niba siiga ki pugini, tin fu leni ba ki yie bipo ke ban da go maadi oba kuli laa yeli nni.»
18Lani, bi den goa ki yini ba ki yie bipo cain ke ban da go maadi bi ki bangi bi niba Jesu yeli nni. 19Pieli leni Jan den goa ki yedi ba: «Biigi mani ki le li yaa tiegi U Tienu po ke tin tuo yi yaa maama ki cedi wani U Tienu yaama. 20Kelima ti kan fidi ki cedi ki kan maadi tin laa ki go gbadi yaala.» 21Bi cancannikpeliba go den funi leni ba ki yuandi ki ŋa ba. Baa den laa ban baa cuo ba yaala yaa po, kelima bi niba kuli den kpiagidi U Tienu kelima yaala n den tieni po. 22Kelima ban den tieni yaa ja po mi bancianma ke o paagi den kpeligi ki cie bina piinaa.
Li dandanli yaaba jaandi
23Pieli leni Jan n den faabi ki ñani, bi den gedi bi lieba po ki ban waani ba bi kopadicianba yudanba leni bi nikpeliba n yedi ba yaala kuli. 24Ban den gbadi lani, bi den taani yanyenma ki jaandi ki mia U Tienu ki yedi: «Ti Diedo, fini n den tagi tanpoli, ki tinga, mi ñincianma leni yaala n ye mi niinni kuli.#Ñam 20.11; Neh 9.6; Pis 146.6 25A den maadi, ke U Tienu Fuoma Yua teni ke ti yaaja Dafidi a naacemo soagini a maama ki yedi:
‹Be n teni ke bi nilanba fii ki tiendi ku fuugu?
Ke i nibuoli mo pia laa yantiabiada?#Pis 2.1-2
26Ki tinga badiba kuli fii ki sedi.
Bi badijaba mo taani ki tuu ñoayenbu
Ki fii ki sedi o Diedo
Leni wan Gandi Yua po.›
27Moamoani o bado *Elodo leni gufeneeli Ponisa Pilata den taani yanyenma leni yaaba n kaa tie Isalele yaaba leni Isalele yaaba kuli u naa dogu nni, ki juogi ban baa tieni maama ki cuo fini U Tienu yaa naacen-gagidiŋamo Jesu, ŋan Gandi Yua.#Mat 27.1-2; Mak 15.1; Luk 23.1,7-11; Jan 18.28-29 28Ban den taani yeni, bi den tieni ŋan den tuodi ki bili yaala kelima a paaciamu leni a yanjagili po. 29Moala o Diedo, cengi ban funi leni ti maama, ki paagi tinba a naacenba tin yaa wangi a maama leni li papaali. 30Tandi a nuu ke tin yaa taagi a naacen-gagidiŋamo Jesu yeli ki paagidi bi niba ki tiendi sinankeeninba leni mi bancianma.»
31Ban den jaandi yeni, ban taani naankani den digibi. Bi den gbie leni U Tienu Fuoma Yua ke bi wangi U Tienu maama leni li papaali.
Li dandanli yaaba boagidi bi piama leni biyaba
32Yaaba n den daani kuli den pia yanyenma leni yanjagiyenli. Oba kuli naa den yedi ke wan pia yaala tie wani bebe n baa die yaala, nilo kuli den tuo ke o piama tua o lieba kuli po.#JTT 2.44-45 33Jesu tondiba den tiendi siedi wani o Diedo Jesu fiima bi tinkpiba siiga po leni u paaciamu. U Tienu sela mo den ye leni bikuli. 34Bi siiga luodo ki den ye kelima yaaba n den pia i kuani bi ti diedi kuli den kuadi ki kpendinni li ligi 35ki biliti Jesu tondiba taana kani. Bi den yen ñandi lienni ki boagidi ki tendi yua kuli nani o luoma n tie maama.
36Josefi, Jesu tondiba n den cili yua yaa yeli Banabasa, lan tie yua n paagidi bi niba pala. O den tie Lefi buolu yua ki ñani Sipila diema nni. 37O moko den pia u kuanu, ki kuadi ki cuani ki bili wan baa yaa ligi Jesu tondiba taana kani.
Ananiasa leni o pua Safila
Currently Selected:
JESU TONDIBA TUONA 4: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
