MATIYO 10

Yezu ka ciden tan ni fila tɔgɔw

(Mar 3.16-19; Luka 6.14-16)

1Yezu y'a ka kalanden tan ni fila wele. A ye see d'u ma ka jinaw gwɛn ka bɔ mɔgɔw la, ani ka banabagatɔ sifa bɛɛ kɛnɛya.

2A ye mɔgɔ tan ni fila minw kɛ cidenw ye, olu tɔgɔ filɛ: Ciden fɔlɔ tɔgɔ ko Simɔn, u b'a wele Piyɛri fana, n'ale dɔgɔcɛ Andere, Zebede ka dencɛ fila, Zaki n'a dɔgɔcɛ Zan, 3Filipi ni Baritelemi, Toma ni Matiyo wusuruminɛla, Tade ni Alife ka dencɛ Zaki, 4Simɔn Zelɔti ni Zuda Isikariyɔti min ye Yezu don a juguw bolo.

Yezu b'a ka kalandenw ci

(Mar 6.7-11; Luka 9.2-5; i ka Luka 10.3-12 filɛ)

5Yezu y'o mɔgɔ tan ni fila ci tuma min na, a y'a fɔ u ye ko: “Aw kana taa siya wɛrɛw fɛ. Aw kana taa Samari mara dugu si la. 6Nga, Isirayɛliden minw bɛ i n'a fɔ sagatununinw, aw ka taa olu fɛ. 7N'aw taara, aw ye waajuli kɛ ko Sankolo tigi ka masaya waati surunyana. 8Aw ye banabagatɔw kɛnɛya, ka suuw kunun, ka kunatɔw kɛnɛya, ka jinaw gwɛn ka bɔ mɔgɔw la. Ne y'o koow kɛ see d'aw ma gwansan, o la, aw fana k'o kɛ mɔgɔw ye gwansan.

9“Aw kana taa ni sanu ni wari ye. 10Aw kana dugutaaminan ta, aw kana duloki filanan ta, aw kana sanbara fila ta, aw kana bere ta, bari baarakɛla ka kan n'a ka dumuni ye. 11N'aw sera dugu min kɔnɔ, duguba lo wo, dugudennin lo wo, mɔgɔ min sɔɔn ka nyi, aw y'o tigi yɔrɔ nyini ka jigi a fɛ. Aw ye to yen fɔɔ aw ka bɔ o dugu nin kɔnɔ. 12N'aw bɛna don luu min kɔnɔ, aw k'a fɔ ko Ala ka hɛrɛ kɛ o luu kɔnɔ mɔgɔw ye. 13N'u sɔnna ko aw ka jigi u fɛ, aw ye duba min kɛ u ye, u bɛna o hɛrɛ sɔrɔ. Nga n'u banna ko aw tɛ jigi u fɛ, aw tun ye duba min kɛ u ye, u tɛna o hɛrɛ sɔrɔ. 14Ni luu min mɔgɔw ma sɔn aw ka jigi u fɛ, walima ni dugu mɔgɔ minw banna k'aw lamɛn, aw bɔtɔ yen, hali u ka buguri min nɔrɔla aw seen na, aw k'o furan k'o to yen.#10.14 O taamasinyɛ nin b'a yira ko u y'u niin bɔ u ka koo la, bari u banna Yezu ka kibaru la. I bɛ se k'o filɛ fana Luka 9.5 ni Kɛw 13.51 la. O kɔ, aw ye bɔ yen. 15Tinyɛ na, ne b'a fɔ aw ye, ko Ala bɛna dinyɛ mɔgɔw kiti loon min na, o dugu mɔgɔ nunu ka tɔɔrɔ bɛna tɛmɛ Sodɔmukaw ni Gomɔrikaw ta kan.

Yezu ye kuma minw fɔ sini tɔɔrɔ koo la

(Mar 13.9-13; Luka 12.11-12; 21.12-19)

16“Ayiwa, ne b'aw ci i n'a fɔ sagaw waraw cɛma. O la, aw ka kɛ yɛrɛkɔlɔsibagaw ye i n'a fɔ saa, aw ka koo ka nɔgɔya i n'a fɔ jɛnɛtugan.

17“Aw k'aw yɛrɛw kɔlɔsi bari mɔgɔw bɛna aw minɛ ka taa n'aw ye kititigɛlaw fɛ. U bɛna aw bugɔ ni golokami ye u ka Alabatosow kɔnɔ. 18U bɛna aw minɛ ka taa n'aw ye faamaw ni masaw fɛ bari aw ye ne ka kalandenw ye. O bɛna kɛ sababu ye aw bɛna ne koo fɔ u ye, ani siya wɛrɛw ye. 19N'u taara n'aw ye kititigɛlaw fɛ, aw kana jɔɔrɔ aw ka kuma fɔta, n'a fɔcogo fana na. Ni kuma sera aw ma tuma min na, aw ka kan ka kuma min fɔ, Ala bɛna o don aw daa la, 20bari aw bɛna kuma min fɔ, o tɛna kɛ aw yɛrɛ ka kuma ye, nga Faa Ala ka Nii Senuman le bɛna o don aw daa la. 21Mɔgɔ dɔw bɛna kɛ sababu ye u balimaw bɛ faga. Dɔw bɛna u deenw faga. Deen dɔw bɛna wili u wolobagaw kama k'u faga. 22Mɔgɔ bɛɛ bɛna aw kɔniya ne kɔsɔn. Nga ni mɔgɔ min munyuna fɔɔ ka se a laban ma, o tigi le bɛna kisi. 23Ni mɔgɔw bɛ aw tɔɔrɔ dugu dɔ la, aw ye boli ka taa dugu wɛrɛ la. Tinyɛ na, ne b'a fɔ aw ye ko aw tɛna Isirayɛli duguw bɛɛ kɛ nyɔgɔn kan ka ban ni Mɔgɔ Dencɛ ma segi ka na. 24Kalanden si man fisa n'a ka karamɔgɔ ye. Baaraden si fana man fisa n'a ka kuntigi ye. 25Kalanden ka kɛ i n'a fɔ a ka karamɔgɔ, baaraden fana ka kɛ i n'a fɔ a ka kuntigi. Ni mɔgɔw ye sotigi yɛrɛ wele ko Sutana, u bɛna tɔgɔ minw la a ka somɔgɔw la, olu bɛna juguya.

An ka kan ka siran jon le nya?

(Mar 8.38; Luka 12.2-7)

26“Aw kana siran mɔgɔ si nya. Fɛndogonin si tɛ yen, min tɛna bɔ kɛnɛ kan. Gundo si tɛ yen, min tɛna mɛn. 27Ni n ye min fɔ aw ye dogo la, aw k'o fɔ kɛnɛ kan. N'u ye min ;nunu;nunu aw tulo kɔrɔ, aw k'o wango la. 28Mɔgɔ minw bɛ se k'aw faga n'u tɛ se ka foyi kɛ aw la lahara, aw kana siran olu nya. Ala min bɛ se k'aw faga ka tila k'aw don jahanama na, aw ka siran ale dɔrɔn nya. 29Kɔnɔnin fila bɛ se ka sɔrɔ dɔrɔmɛ kelen. Nga, o n'a ta bɛɛ, u si tɛ sa n'aw Faa Ala ma sɔn. 30Aw kunsigi yɛrɛ, Ala b'o bɛɛ daa lɔn. 31O kama, aw kana siran. Aw ka fisa ni kɔnɔnin caaman ye Ala nyakɔrɔ.

Ka sɔn, walima ka ban Yezu la

(Luka 12.8-9)

32“Ni mɔgɔ min y'a fɔ mɔgɔw nyana ko ale ye ne ka mɔgɔ ye, ne fana bɛn'a fɔ n Faa Ala nyana k'o tigi ye ne ka mɔgɔ ye. 33Nga, ni mɔgɔ min banna ne la mɔgɔw nyana, ne fana bɛna ban o tigi la n Faa Ala nyana.

Yezu ka koo bɛna mɔgɔw bila nyɔgɔn na

(Mar 8.34-35; Luka 12.51-53; 9.23-24)

34“Aw kana miiri ko ne nana ni hɛrɛ ye dinyɛ na. Ne ma na ni hɛrɛ ye, nga ne nana kɛlɛ le don mɔgɔ ni nyɔgɔn cɛ. 35Ne nana ka dencɛ n'a facɛ bila nyɔgɔn na, ka denmuso n'a bamuso bila nyɔgɔn na, ka furumuso n'a biranmuso bila nyɔgɔn na. 36I ka mɔgɔw bɛna kɛ i juguw ye.

37“Ni mɔgɔ min b'a facɛ walima a bamuso kanu ka tɛmɛ ne kan, o tigi tɛ se ka kɛ ne ka kalanden ye. Mɔgɔ min b'a ka dencɛ walima a ka denmuso kanu ka tɛmɛ ne kan, o tigi tɛ se ka kɛ ne ka kalanden ye. 38Ni mɔgɔ min tɛ sɔn ka tɔɔrɔ munyu ka tugu ne kɔ, o tigi tɛ se ka kɛ ne ka kalanden ye. 39Ni mɔgɔ min b'a fɛ ka koo bɛɛ kɛ waasa a kana sa, o tigi bɛna sa. Nga, ni min sara ne kɔsɔn, o tigi bɛna sini hɛrɛ sɔrɔ.

Yezu ye kuma min fɔ tɔnɔ sɔrɔko la

(Mar 9.37,41; Luka 9.48; 10.16; Zan 13.20)

40“Ni mɔgɔ min ye aw minɛ ka nya, o tigi ye ne minɛ ka nya. Mɔgɔ min ye ne minɛ ka nya, o tigi ye ne cibaga fana minɛ ka nya. 41Ni mɔgɔ min ye kira minɛ ka nya, a ka kiraya kɔsɔn, o tigi bɛna kira ka sara nyɔgɔn sɔrɔ. Ni mɔgɔ min ye mɔgɔnyuman minɛ ka nya, a ka nyumanya kɔsɔn, o tigi bɛna mɔgɔnyuman ka sara nyɔgɔn sɔrɔ. 42Tinyɛ na, ne b'a fɔ aw ye ko ne ka kalanden minw lɔyɔrɔ ka dɔgɔ mɔgɔw nyana, ni min ye jii suma di olu dɔ ma, bari ne ka kalanden lo, hali ni filen nyaa kelen lo, o tigi bɛn'a tɔnɔ sɔrɔ.”

Currently Selected:

MATIYO 10: JULNT94

Highlight

Copy