LUKA 1
1
Kitabu sɛbɛnkun
1Koo minw kɛra an fɛ, mɔgɔ dɔw y'a daminɛ ka olu kibaru sɛbɛn. 2O koow kɛra minw nyana kabini u daminɛtuma, n'u nana kɛ Ala ka kuma fɔbagaw ye, olu y'o koow lakali an ye cogo min na, u sɛbɛnbagaw y'o sɛbɛn ka kɛnyɛ ni olu ka seereya ye. 3Ne fana ye sɛgɛsɛgɛli kɛ kosɛbɛ o koow bɛɛ la kabini u daminɛtuma, o le y'a to, ne miirila ko a ka nyi ne fana k'o koow sɛbɛn k'u tugutugu nyɔgɔn na e ye, kɔrɔ Tewofili, 4waasa i k'a lɔn ko u y'i kalan koo minw na, ko tinyɛ yɛrɛyɛrɛ lo.
Mɛlɛkɛ dɔ bɛ Zan batizelikɛla woloko fɔ
5Zude mara masacɛ Erɔdi ka tile la, sarakalasebaga dɔ tun bɛ yen min tɔgɔ ko Zakari. Abiya tɔgɔ lara sarakalasebaga minw ka jɛnkulu la, olu dɔ tun lo. A muso buruju bɔra sarakalasebagaw kuntigi Arɔn na. A tɔgɔ tun ko Elizabɛti. 6U fila bɛɛ tilennin tun bɛ Ala nyakɔrɔ, u tun bɛ Matigi ka sariyaw bɛɛ labato a nyaa ma. 7Deen si tun t'u fɛ, bari Elizabɛti tun kɛra muso wolobali ye, ka fara o kan, u fila bɛɛ tun kɔrɔla.
8Loon dɔ, Zakari tun bɛ sarakalasebaga baara la n'a ka jɛnkulu mɔgɔw ye Alabatosoba kɔnɔ, bari u ka baara kɛ loon tun lo. 9Ka kɛnyɛ ni sarakalasebagaw ka landa ye, u tun bɛ to ka mɔgɔ kelen woloma, ale bɛ don Alabatosoba yɔrɔ senuman na ka wusulan jɛni, o wolomani kɛnyɛna Zakari ma. 10Ka Zakari to wusulan jɛni na, jama bɛɛ tun bɛ Ala dalili la Alabatosoba lukɛnɛ na.
11Matigi ka mɛlɛkɛ dɔ y'a yɛrɛ yira Zakari la, o mɛlɛkɛ lɔnin tun bɛ kinibolo nyafan fɛ wusulan jɛniyɔrɔ la. 12Zakari y'o ye tuma min na, a hakili nyagamina, a siranna kosɛbɛ. 13Nga mɛlɛkɛ y'a fɔ a ye ko: “Zakari, i kana siran, bari i ka dalili minɛna. I ka muso bɛna dencɛ wolo i ye, i k'a tɔgɔ la ko Zan. 14A woloko bɛna kɛ nisɔndiya dafanin ye i fɛ, ani mɔgɔ caaman nisɔn bɛna diya a koo la. 15A bɛna kɛ mɔgɔba ye Matigi nyakɔrɔ. A tɛna duvɛn, walima minnifɛn fariman si min. Nii Senuman bɛna to a fɛ kabini a wolotuma na. 16A bɛna kɛ sababu ye Isirayɛlidenw caaman bɛna segi ka sɔn u Matigi Ala ma. 17A bɛna taama Nii Senuman barika la Ala nyakɔrɔ ni sebagaya ye, o min nyɔgɔn tun dira kira Eli ma, waasa ka faaw ni u deenw kaan bɛn. A bɛna mɔgɔ murutininw hakili yɛlɛma k'a kɛ mɔgɔtilenninw hakili ye. A bɛna jama labɛn k'a bila Matigi ye.”
18Zakari ye mɛlɛkɛ nyininga ko: “Ne bɛ se ka la o la cogo di ko tinyɛ lo, bari ne ni n muso bɛɛ kɔrɔla.”
19Mɛlɛkɛ y'a jaabi ko: “Ne ye Gabiriyɛli ye. Ne le bɛ lɔ Ala nyakɔrɔ k'a ka ciiw lamɛn. A ye ne ci ka na nin kibaru diman nin fɔ i ye. 20Ayiwa, i bɛna kɛ bobo ye, fɔɔ ka taa se nin koow kɛwaati ma, bari i ma la ne ka kuma na, k'a sɔrɔ o koow bɛna kɛ n'u kɛlon sera.”
21O y'a sɔrɔ jama tun bɛ Zakari kɔnɔna. U tun kabakoyara, bari a mɛnna ka tɛmɛ Alabatosoba yɔrɔ senuman na. 22Nga Zakari nana bɔ tuma min na, a ma se ka kuma u fɛ. U y'a faamu ko a ye yelifɛn dɔ ye Alabatosoba yɔrɔ senuman kɔnɔ. A kumana u fɛ n'a bolo ye. A tora boboya la.
23Zakari ka baara kɛlonw dafara loon min na, a segira ka taa soo. 24O koow tɛmɛnin kɔ, Zakari muso ye kɔnɔ ta. Nga, a y'o kɔnɔ dogo fɔɔ kalo duuru. 25A tun b'a fɔ a yɛrɛ kɔnɔ ko: “Matigi ye koo min kɛ ne ye, a filɛ: A ye ne yɔrɔ filɛ sisan ka ne ka maloya koo bɔ n kuun na mɔgɔw bɛɛ nyana.”
Mɛlɛkɛ dɔ bɛ Yezu woloko fɔ
26Elizabɛti kɔnɔ kalo wɔɔrɔnan na, Ala ye mɛlɛkɛ Gabiriyɛli ci Galile mara dugu dɔ la min tɔgɔ ko Nazarɛti. 27A y'a ci yen ka taa sunguru dɔ fɛ min tɔgɔ tun ko Mariyamu. A maminɛnin tun bɛ Yusufu fɛ, min buruju bɔra masacɛ Dawuda la. 28Mɛlɛkɛ sera Mariyamu fɛ k'a fɔ a ye ko: “I ni ce, i koo diyara Ala ye, Matigi Ala b'i fɛ.”
29O kuma nin ye Mariyamu hakili nyagami, a y'a yɛrɛ nyininga k'o foli sifa kɔrɔ ye mun ye. 30Mɛlɛkɛ y'a fɔ a ye ko: “Mariyamu, i kana siran, bari i koo diyara Ala ye. 31A filɛ, i bɛna kɔnɔ ta ka dencɛ wolo, i k'a tɔgɔ la ko Yezu. 32A bɛna kɛ mɔgɔba ye, a bɛna wele Setigi Ala Dencɛ. Matigi Ala bɛn'a kɛ masa ye i n'a fɔ a faa Dawuda. 33A bɛna sigi masaya la Isirayɛlidenw kunna fɔɔ tuma bɛɛ, a ka masaya tɛna ban abada.”
34Mariyamu ye mɛlɛkɛ nyininga ko: “Ne bɛna se ka kɔnɔ ta cogo di, k'a sɔrɔ ne ma cɛɛ lɔn fɔlɔ.”
35Mɛlɛkɛ y'a jaabi ko: “Nii Senuman bɛna jigi i kan, Setigi Ala bɛn'a ka setigiya yira i la. O kama, i bɛna Deen senuman min wolo, o bɛna wele Ala Dencɛ. 36A filɛ, i balimamuso Elizabɛti fana ye kɔnɔ ta a n'a ka kɔrɔya bɛɛ, a kalo wɔɔrɔnan ye nin ye. A bɛna dencɛ wolo, ale min tun bɛ jati muso wolobali ye. 37O bɛɛ bɛna kɛ bari Ala tɛ dɛsɛ foyi la.”
38O la, Mariyamu y'a fɔ a ye ko: “Ne ye Matigi ka jɔnmuso ye, i y'a fɔ cogo min na, Ala m'a kɛra ne ye ten.” O kɔ, mɛlɛkɛ bɔra a kɔrɔ ka taa.
Mariyamu bɛ taa bɔ Elizabɛti fɛ
39O tile fila nin na, Mariyamu wilila ka teliya ka taa dugu dɔ la Zude mara la, kuluw ka ca yɔrɔ min na. 40A taara don Zakari ka soo kɔnɔ ka Elizabɛti fo. 41Elizabɛti ye Mariyamu ka folikan mɛn tuma min na, deen lamagara a kɔnɔ. Nii Senuman barika la, 42Elizabɛti kabara k'a fɔ ko: “I ye nɛɛma sɔrɔ Ala fɛ ka tɛmɛ musow bɛɛ kan, ani deen min bɛ i kɔnɔ, o fana ye nɛɛma sɔrɔ. 43Ne ye jon ye fɔɔ ne Matigi bamuso yɛrɛ bɛ na bɔ ne fɛ? 44A filɛ, ne ye i ka folikan mɛn tuma min na, ne deen lamagara nisɔndiya fɛ ne kɔnɔ. 45I ye dubaden ye, bari mɛlɛkɛ ye Matigi ka kuma min fɔ i ye, i lara a la k'o bɛna kɛ.”
Mariyamu ka tandoli dɔnkili
46O la, Mariyamu ko:
“Ne bɛ Matigi bonya n dusukun na,
47ne nisɔn diyanin bɛ n Kisibaga Ala kɔsɔn,
48bari, a y'a hakili to a ka jɔnmuso majiginin na.
Kabini sisan, mɔgɔw bɛn'a fɔ waati bɛɛ ko ne ye dubaden ye,
49bari Setigi ye kobaw kɛ ne ye, a tɔgɔ ka senu.
50Minw bɛ siran Ala nya k'a bonya,
a bɛ makari olu la waati bɛɛ.
51A ye kabakow kɛ n'a bolo barikaman ye,
a ye yɛrɛbonyalaw hakili nyagami.
52A ye fanga bɔsi faamaw na ka faantanw kɛ mɔgɔbaw ye.
53A ye fɛnnyuman caaman di kɔngɔtɔw ma ka fɛntigiw bolo lakolon bila ka taa.
54A nana ni dɛmɛ ye Isirayɛli jama ma, o min y'a ka jɔɔnw ye,
55k'a hakili to a ka nyumanya la Ibrayima n'a kɔmɔgɔw faan fɛ,
i n'a fɔ a tun y'a daa di an faaw ma cogo min na.”
56Mariyamu tora Elizabɛti fɛ ka kalo saba nyɔgɔn kɛ, o kɔ, a segira ka taa soo.
Zan batizelikɛla woloko
57Elizabɛti jigi loon nana se, a ye dencɛ wolo. 58A siginyɔgɔnw n'a ka mɔgɔw y'a mɛn minkɛ ko Matigi y'a ka makari bonya a faan fɛ, u nisɔn diyara ka fara Elizabɛti kan. 59A tile seegi, deen kɛnɛkɛnɛlon sera. U nan'a kɛnɛkɛnɛ, u tun b'a fɛ k'a facɛ tɔgɔ la a la ko Zakari. 60Nga a bamuso y'a fɔ ko: “Ayi, a tɔgɔ bɛna la ko Zan.”
61U y'a jaabi ko: “I ka mɔgɔ si tɔgɔ tɛ ten.” 62U ye deen faa nyininga bobow ka kuma cogo la ko a b'a fɛ tɔgɔ jumɛn ka la a deen kan.
63Zakari ye walaka nyini u fɛ k'a sɛbɛn o kan ko: “A tɔgɔ ko Zan.” U bɛɛ kabakoyara. 64O yɔrɔnin bɛ, Zakari ka boboya banna, a y'a daminɛ ka kuma ka Ala tando. 65U ka mara mɔgɔw bɛɛ siranna, Zude mara kuluyɔrɔ bɛɛ mɔgɔw tun bɛ o koow lakali nyɔgɔn ye yen. 66Mɔgɔ minw mana o kibaru mɛn, u bɛɛ tun bɛ miiri a la k'u yɛrɛ nyininga ko: “O tuma na, deen nin bɛna kɛ mun le ye sa?” Tinyɛ na, Matigi Ala tun b'a fɛ.
Zakari ka tandoli ni kiraya dɔnkili
67Nii Senuman barika la, deen facɛ Zakari ye kiraya kuma fɔ ko:
68“Tandoli ka kɛ Matigi ye, Isirayɛli ka Ala,
bari a y'a janto a ka mɔgɔw la k'u hɔrɔnya.
69A ye kisibaga barikaman lawili an ye,
a y'a bɔ a ka jɔncɛ Dawuda buruju la,
70i n'a fɔ a tun ye o kuma don a ka fɔlɔfɔlɔ kiraw daa la cogo min na
71ko a bɛna an kisi an juguw ma,
k'an tila ka bɔ an kɔniyabagaw bɛɛ bolo.
72O cogo la, a makarila an faaw la,
a y'a hakili to a ka layidu la.
73A tun ye layidu ta an Faa Ibrayima ye, tinyɛ na,
74ko a bɛna an tila an juguw la,
waasa an jaa gwɛlɛyanin ka baara kɛ ale ye
75a ka an jati mɔgɔ senumanw ni mɔgɔtilenninw ye an sii bɛɛ la.
76E kɔni, ne deen,
i bɛna wele Setigi Ala ka kira,
bari i bɛna taama Matigi nyakɔrɔ k'a ka sira labɛn.
77I bɛna kisili sira yira a ka mɔgɔw la u ka kojuguw yafali seen fɛ,
78an ka Ala ka makari n'a ka nyumanya barika la.
A bɛna kɛnɛ ci an ye ka bɔ sanfɛ i n'a fɔ tile bɔtɔ kɛnɛ,
79ka yeelen bɔ dibi la mɔgɔw ye,
ni minw bɛ siran saya nya,
ani k'an bila hɛrɛ sira kan.”
80Ayiwa, Zan tun bɛ kɔgɔra, n'a hakili bɛ bonya ka taa. A tora kongo kɔnɔ fɔɔ ka taa se a yɛrɛ yira loon ma Isirayɛlidenw na.
Currently Selected:
LUKA 1: JULNT94
Highlight
Share
Copy
Want to have your highlights saved across all your devices? Sign up or sign in
Jula New Testament © Bible Society of Burkina Faso, 1994.
