KƐWALIW 17

Mankan min wilila Tesaloniki Pɔli ni Silasi nunu kɔsɔn

1Pɔli ni Silasi nunu bɔra ka tɛmɛ Anfipoli ani Apoloni, ka se Tesaloniki. Alabatoso tun b'o yɔrɔ Zuwifuw fɛ. 2Pɔli taara u fɛ yen lafinyɛlon na, i n'a fɔ a tun bɛ deli k'a kɛ yɔrɔ tɔw la cogo min na. A ye lɔgɔkun saba kɛ u fɛ, ka to ka nyɔgɔn sɔsɔ ka Ala ka kuma fɔ u ye lafinyɛlon o lafinyɛlon. 3A y'o kɔrɔ fɔ u ye, k'a gwɛ ko Ala tun ka kan k'a ka Mɔgɔwolomanin min ci ka na, k'o ye Yezu ye. Ko ale Pɔli bɛ min ka koo fɔra u ye, ko ale lo. Ko wajibi tun lo, a tun ka tɔɔrɔ, ka sa, ka kunun. 4Zuwifuw mɔgɔ damani, ani girɛki minw bɛ siran Ala nya, olu caaman, ni faamamuso dɔw lara kuma nunu na. Olu nɔrɔla Pɔli ni Silasi la. 5Nga, o ma diya Zuwifu tɔw ye. Olu wilila ka bɛn ni mɔgɔkolon dɔw ye o yɔrɔ la, waasa ka dugu nyagami. U wilila ka mankan daminɛ ka dugu bɛɛ wurubata, ka taa Zazɔn ka soo k'u bɛ Pɔli ni Silasi minɛ ka taa n'u ye kiti tigɛyɔrɔ la. 6U ma Pɔli ni Silasi sɔrɔ yen minkɛ, u ye Zazɔn ni kalanden dɔw minɛ yen ka taa n'u ye u ka nyamɔgɔw fɛ, k'a fɔ yen ko: “Mɔgɔ minw ye yɔrɔw bɛɛ nyagami, u sera an fɛ yan. 7Zazɔn le ye u ka jatigi ye. O mɔgɔ nunu si tɛ an ka Ɔrɔmu masacɛba ka sariyaw fɛ. U ko masacɛba wɛrɛ bɛ yen, n'o tɔgɔ ko Yezu.” 8O mankan nin ye kititigɛlaw ni jama bɛɛ hakili nyagami. 9U ye wariba la Zazɔn n'a tɔnyɔgɔnw kunna. U y'o di, u sɔrɔla k'u bila. #17.9 U bɛ wari la mɔgɔ kunna k'a bali koo dɔ kɛli ma. N'o tigi ye faamaw ka fɔta labato, u bɛn'a ka wari segi a ma. N'u tun t'a fɛ mɔgɔ dɔ ka koo dɔ kɛ, u tun b'o tigi karaba ka wari dɔ sara, n'a ye koo nin dabila, wari nin bɛ segi ka di a ma tugu.

Pɔli ni Silasi bɛ taa Bere

10O loon bɛ sufɛ, Tesaloniki kalandenw bɔra ni Pɔli ni Silasi ye k'u ka taa Bere. U sera yen tuma min na, u taara Zuwifuw ka Alabatoso kɔnɔ. 11Olu ka koo tun ka di ni Tesaloniki Zuwifuw ta ye. U sɔnna Ala ka kuma ma ni dusunyuman ye. Loon o loon, u tun bɛ nyɔgɔn fɛ ka to ka Ala ka kuma sɛgɛsɛgɛ k'a filɛ ni Pɔli ka kuma nunu ye tinyɛ ye. 12Zuwifu caaman lara Yezu la yen, ani faamamuso caaman, ni cɛɛ caaman lara a la girɛkiw cɛma. 13Nga Tesaloniki Zuwifuw y'a mɛn ko Pɔli taara Ala ka kuma fɔ Berekaw ye fana dɔrɔn, u wilila ka taa yen. U ye jama kɔnɔnasu, janko mankan bɛ wili. 14O yɔrɔ kalandenw fana ye Pɔli bila sira fɔɔ bada la o yɔrɔnin bɛ. Nga, Silasi ni Timote nunu tora a kɔ yen. 15Mɔgɔ minw tun y'a bila sira, olu sera n'a ye fɔɔ Atɛni dugu kɔnɔ. Olu kɔsegituma, a y'a fɔ u ye k'u ka ta'a fɔ Silasi ni Timote ye k'u ka banba ka na ale sɔrɔ Atɛni joona.

Pɔli bɛ taa Atɛni

16Ka Pɔli to a tɔnyɔgɔnw kɔnɔni na Atɛni, a ye joo caaman ye dugu nin kɔnɔ, a dusu gwanna. 17O la, a y'a daminɛ ka kuma ni Zuwifuw ni mɔgɔtuubininw ye Alabatoso kɔnɔ. Loon o loon, a tun bɛ taa forobayɔrɔ la ka kuma ni jama ye. 18Lɔnnikɛla dɔw tun bɛ yen, o bɛ u dɔw wele ko Epikiriyɛn, dɔw Etoyisiyɛn, olu yɛrɛ y'a daminɛ ka kuma ni Pɔli ye. Nga dɔw ko: “Kuma caaman tigi nin fana ko di?” Dɔw ko: “Nin bɛ Alasira kuraman dɔ le koo fɔra cɔ!” Bari Pɔli tun bɛ Yezu ni suuw ka kununko le fɔra. #17.18 Epikiriyɛn ye kalan sifa dɔ mɔgɔw tɔgɔ ye. Mɔgɔ min tun y'o kalan nin daminɛ, o tɔgɔ tun ko Epikiri, a saan 306 ni Yezu ma wolo fɔlɔ. A ka kalan tun sinnin bɛ dinyɛ ka nisɔndiyakow dama le ma. A tun ma l'a la ko Ala bɛ yen. #17.18 Etoyisiyɛn, o fana ye kalan sifa dɔ mɔgɔw tɔgɔ ye. Olu tun ko fɛɛn kelen kelen bɛɛ n'a ka Ala lo.

19O la, u y'a minɛ k'a sama ka taa n'a ye u ka koo nyanabɔyɔrɔ la. U y'a nyininga ko: “I bɛ mɔgɔw kalanna Alasira kuraman jumɛn na ten? 20Bari i bɛ mɔgɔw kalanna ni koo kuraman minw ye, an ma deli o la. An b'a fɛ e k'a nyafɔ an ye.” 21Tinyɛ ka fisa, Atɛnikaw n'u ka lonanw caaman tun bɛ u ka waati bɛɛ kɛ koo kuramanw kibaru lamɛnni n'a fɔli dama na dɔrɔn tuma bɛɛ. 22Pɔli lɔnin tora jama cɛma k'u jaabi ko: “Atɛnikaw, ne y'a lɔn ko aw banbanin lo batoli koo la kosɛbɛ. 23Bari, ne yaalatɔ aw ka dugu kɔnɔ, aw bɛ batoli kɛ yɔrɔ minw na, ne y'o caaman ye. N y'a sɛbɛnnin ye sɔnni kɛyɔrɔ dɔ yɛrɛ kan ko: ‘Batofɛn min cogo lɔnnin tɛ’. Aw bɛ fɛɛn batora, aw tɛ min cogo lɔn, ayiwa, ne nana o le cogo fɔ aw ye. 24Ala min ye dinyɛ n'a kɔnɔnafɛnw bɛɛ dan, ale min ye sankolo ni dugukolo ka masa ye, adamadenw ka bonlɔnin tɛ se ka kɛ a sigiyɔrɔ ye.

25“A m'a fɔ ko a mako bɛ adamaden ka bololafɛn na k'a yɛrɛ mako nya n'a ye fana. Bari ale lo bɛ nii, ani sii, ani fɛɛn tɔɔ bɛɛ di adamaden ma. 26Siyaw bɛɛ bɔra mɔgɔ kelen na a y'o min dan. A y'o siya nunu bɛɛ ka sigiyɔrɔw daan tigɛ, k'u ka sii sabaticogo fana daan tigɛ. 27A y'o kɛ, waasa u ka se ka ale Ala yɔrɔ nyini cogo bɛɛ la, n'u bɛ se k'a ye. Ala do yɔrɔ man jan an si la. 28An tonin bɛ nii na, ka sii sɔrɔ, ka kɛwaliw kɛ Ala barika la. Aw ka lɔnnikɛla dɔw yɛrɛ b'a fɔ ten, ko: ‘An ye a ka deenw ye yɛrɛ.’ 29Ayiwa, an kɛra Ala ka deenw ye minkɛ, an man kan k'a miiri ko Ala bɔnin bɛ joo sanulaman fɛ, walima warigwɛlaman, walima kabakurunyumanlɛsɛnin fɛ! O fɛɛn nunu bɛɛ ye an adamadenw ka miiriya, n'an ka bolo nɔɔ ye! 30Adamadenw ye kolɔnbaliya minw kɛ ka tɛmɛ, Ala tɛ o si jatira tugu. Nga, a b'a nyini mɔgɔw fɛ yɔrɔ bɛɛ, k'u ka nimisa ka faran u ka kojuguw la. 31O kama, a ye loon dɔ sigi. N'o loon nin sera, a ye mɔgɔ dɔ woloma ka ban, a bɛna o tigi bila ka adamadenw kiti ni tilenninya ye. A y'o tigi kunun a sanin kɔ janko k'a yira bɛɛ la, ko ale le bɛna mɔgɔw bɛɛ kiti.” 32Pɔli ye suu kununko kuma fɔ dɔrɔn, dɔw y'a daminɛ k'a lɔgɔbɔ. Dɔw ko: “An bɛna mɛnni kɛ i fɛ o koo la sinyɛ wɛrɛ.” 33O cogo la, Pɔli tɛmɛna k'u to yen. 34O bɛɛ n'a ta, mɔgɔ damani sɔnna ka la Yezu la, ka nɔrɔ Pɔli la. Olu cɛma, Denisi tun bɛ yen, n'o tun ye kititigɛlaw dɔ ye. Muso dɔ fana tun bɛ yen, o tɔgɔ tun ko Damarisi, ani mɔgɔ wɛrɛw.

Currently Selected:

KƐWALIW 17: JULNT94

Highlight

Copy