Luka 7

A Yeezu sanɩ nɩ sojarɩ kʋba nɩ-kpɛ̃ɛ kãw tõ-tõ-bie

(Mat 8:5-13)

1A Yeezu na tɩ ƴɛ̀r à á ŋá za kʋ̀ a nɩbɛ baar'a, ʋ cen nɩ Kafarnawɔm. 2Zɩ̃ kɛ́ sojarɩ kʋba nɩ-kpɛ̃ɛ kãw tɩ tɛr'ɩ tõ-tõ-bie ʋ ɩ bàal ŋmaar vʋʋrʋ: a ʋ tõ-tõ-bi-mimi-mʋ̃ɔn tɩ n'ʋ. 3Ʋ na tɩ wõ bɛ manɛ a Yeezu yele a, ʋ tõ n a Zifʋ mɩnɛ nɩ-kore bɛ mɩnɛ a ʋ zie, kɛ́ bɛ tɩ zɛlɩ ʋ k'ʋʋ wa faa a ʋ tõ-tõ-bie. 4A nɩ-kore bɛl tɩ ta n a Yeezu zie zɛlɛ ʋ suwle taa yere nɩ: «Ʋ sɛwnɩ na kɛ́ fʋ sõw ʋ, 5ʋ nɔnɛ nɩ a tɩ bʋʋrɛ nɩbɛ, ɛ́ ʋlɛ n'ʋ ŋmãa a tɩ puoru-dĩo kʋ̀ tɩ.» 6A Yeezu nɩ a bɛl za tɩ lãw na lo a sɔ́r cere, ʋʋ bɛ tɩ cãà zãá nɩ a yir ɛ, ɛ́ a sojarɩ kʋba nɩ-kpɛ̃ɛ tõ a ʋ bárɩ bɛ mɩnɛ bɛ wa yel a Yeezu: «Sore e, ta dɩ tuo bàlɛ fʋ tʋɔra ɩ, ɩ̃ bɛ sɛwnɩ kɛ́ fʋ kpɛ a ɩ̃ yir pʋɔ ɩ. 7Al ƴãw n'a mãa mɩŋa nyɛ̃ ɩ̃ bɛ sɛwnɩ a fʋ zie waa ɩ, ɛcɛ ƴɛ̀r ƴɛ̀r-bi-been yõ a ɩ̃ tõ-tõ-bie sanɩ. 8Mãa n'ɩ ŋa tɛr nɩ-bɛrɛ, ɛ́ mɩ̀ dɩ nɩ-kpɛ̃ɛnʋ sojarɩ zu, mɩ̀ yel ŋa: “Cen”, ʋ cen, ɛ́ yel ƴen sob: “Wa”, ʋ wa, ɛ́ yel a ɩ̃ tõ-tõ-bie: “Ɩ bom ŋa”, ʋ ɩ.» 9A Yeezu na tɩ wõ a ƴɛ̀r-bie á ŋá a, ʋ nɔ̃w nɩ a sojarɩ kʋba nɩ-kpɛ̃ɛ nɛ yele, ʋʋ tɩ lɩɛb'a yel a zu-sɛbla na tuur ʋ a: «Mãa n'ʋ yere kʋ̀rɛ nyɩ, a Ɩsɩrayɛl bʋʋrɛ nɩbɛ tɛɛ za pʋɔ a, ɩ̃ bɛ nyɛ̃ a naaŋmɩn-sàwfʋ ŋa tɔ ɩ.» 10A nɩbɛ bɛl bɛ na tɩ tõ a, na tɩ lɛb kul a yir a, bɛ tɩ nyɛ̃ nɩ a tõ-tõ-bie ʋ ɩ nɩ-kpɛ̃w.

A Yeezu sɩ̃w nɩ pɔw-kʋɔr kãw bidɛb na tɩ kpi a

11Al pùorí, a Yeezu tɩ cen nɩ tẽw kãw bɛ na bʋɔlɛ kɛ́ Nayin a. A ʋ po-tuurbɛ nɩ nɩ-yaga yaga tɩ bɩɛlɛ ʋ na. 12Ʋ na tɩ tarɛ a tẽw dɩ̃dɔr ƴãw a, bɛ nyɛ̃ nɩ nɩbɛ na tuo kũu cere nɩ ũufʋ a: pɔw-kʋɔr kãw bidɛb-been tɩ n'ʋ. A tẽw nɩbɛ yaga tɩ bɩɛlɛ nɩ a pɔw nɛ. 13A Sore na tɩ nyɛ̃ ʋ a, a ʋ nɩbaalʋ tɩ kpɛ ʋ nɩ yaga ʋ yel ʋ: «Ta kone ɩ!» 14Al pùorí, ʋ taw ta tɔ a daga, a kũu-tuorbɛ tɛw àr. A Yeezu tɩ yel'a: «Pɔlbile e, mãa n'ʋ yere kʋ̀rɛ fʋ, ìr!» 15A kũu tɩ ìr'a zɩ̃ ɛ́ ƴɛ̀rɛ. A Yeezu tɩ lɛb'a de ʋ kʋ̀ a ʋ mã. 16Dɛ̃bɩ̃ɛ tɩ nyɔw nɩ a nɩbɛ za. Bɛ tɩ danɛ nɩ a Naaŋmɩn yere nɩ: «naaŋmɩn-ƴɛ̀r-manɛ kpɛ̃ɛ kpɛ̃ɛ be n a tɩ sɔgɔ, ɛ́ a Naaŋmɩn jɩ́r'ɩ a ʋ nɩ-bʋʋrɛ kaa.» 17A Yel ŋa a Yeezu na tɩ maalɩ a, tɩ yi na làarɩ a Zude tẽw nɩ a ʋ tẽ-kõkowe za.

A Yeezu ƴɛ̀rɛ nɩ a Zã-Bati ƴɛ̀rʋ a nɩbɛ zie

(Mat 11:2-19)

18A Zã po-tuurbɛ tɩ wa na wa manɩ a yele á ŋá za kʋ̀ a bɛ zu-sob. A Zã tɩ bʋɔl'ɩ a ʋ po-tuurbɛ ayi 19wa tõ bɛ a Sore zie, kɛ́ bɛ tɩ sowr'ʋ: «Fʋ̃ʋ n'ɩ a Kɩrɩta na na wa a, bɩɩ tɩ cãà cɛlɛ nɩ-yũo?» 20Bɛ tɩ ta n a Yeezu zie yel ʋ: «Zã-Bati tõ tɩ nɩ a fʋ zie, kɛ́ tɩ wa sowri fʋ: “Fʋ̃ʋ n'ɩ a Nɩ-kabra na na wa a, bɩɩ tɩ cãà cɛlɛ nɩ-yũo?”» 21A ʋlɩ pɛr nɛ pʋɔ, a Yeezu tɩ sanɩ nɩ nɩ-yaga bàalʋ nɩ a bɛ nɩ-kɔwlʋ, diw kɔ̃tɔ̃-faar bɛr bɛ, ɛ́ ɩ zɔn yaga lɛb nyɛrɛ. 22Al pùorí, ʋ tɩ sɔw na yel a nɩbɛ a Zã na tõ a: «Nyɩ cen tɩ manɩ a yele á ŋá nyɩ na nyɛ̃ ɛ́ wõ a kʋ̀ a Zã: a zɔn nyɛrɛ na, a wʋbr cere dẽdẽ, a kɔn lɛb'a vɩɛl, won lɛb'a wone, nɩ-kũuni lɛb'a vʋʋrɛ, a nan dem wone a Yel-nʋ̃ɔ̀, 23ɛ́ zu-nʋ̃ɔ̀ sob'ɩ a sob nɛ na kʋ̃ʋ zawrɩ a ɩ̃ sàw-deb bɛr a.»

24A nɩbɛ bɛl a Zã na tɩ tõ a, na wa lɛb kul a, a Yeezu nyɔw nɩ a Zã ƴɛ̀rʋ ƴɛ̀rɛ a zu-sɛbla zie yere nɩ: «Bʋ̃ʋ n'ʋ nyɩ cen a wɛja-kpalɛ pʋɔ kɛ́ nyɩ tɩ nyɛ̃? Bàa-kɛkɛr sɛsɛb na fure damnɛ a n'ʋ ʋ? 25Bʋ̃ʋ n'ʋ nyɩ cen tɩ nyɛ̃ mɔ̃? Nɩr na su dɛpaal-bome a n'ʋ ʋ? Ɛcɛ a dɛpaal-kpar-suurbɛ nɩ a nʋ̃ɔ̀-wonbɛ a, na-mɩnɛ yie pʋɔ n'a bɛ mɩ́ kpɩɛr. 26Ɛ́ bʋ̃ʋ n'ʋ nyɩ nɩ̃ɛ cen tɩ nyɛ̃? Naaŋmɩn-ƴɛ̀r-manɛ n'ʋ ʋ? Ʋ̃ʋ, mãa n'ʋ yere kʋ̀rɛ nyɩ, ʋ zuo nɩ naaŋmɩn-ƴɛ̀r-manɛ. 27Ʋl ƴãw n'a bɛ sɛb kɛ́:

“Nyɛ̃, ɩ̃ tone nɩ a ɩ̃ tõ-tõ-bie a fʋ nidaa,

ʋ na cɔbrɩ nɩ a sɔ́r bɛr fʋ#7:27 Nyɛ̃ Mal 3.1 nɩ Ety 23.20..”»

28«Ɩ̃ yere na kʋ̀rɛ nyɩ, a pɔwbɛ bʋ̃-dɔwrɩ za pʋɔ a, kãw za bɛ ɩ kpɛ̃ɛ zuo a Zã ɩ, ɛcɛ a Naaŋmɩn Naalʋ pʋɔ nɩ-pʋrɩ za zuo nɩ a Zã. 29A nɩbɛ za nɩ a zuru-yar-dierbɛ tɩ bɛr'a wõ a ʋ ƴɛ̀rʋ, bɛ tɩ nyɛ̃ na bãw kɛ́ a Naaŋmɩn tɛr'ɩ yel-mɩŋa, ɛ́ ƴãw a Zã kʋ̀ bɛ a suob. 30Ɛcɛ a Faarizɩ̃ɛ mɩnɛ nɩ a Naaŋmɩn wulu bãw-bãw-karɩ zawr'ɩ a Naaŋmɩn pʋ-tɩɛrʋ ʋ na tɛr a bɛ ƴãw a, ɛ́ bɛ sàw a Zã kʋ̀ bɛ a suob ɛ.»

31A Yeezu tɩ yel a ƴãw pʋɔ: «Ãa n'ʋ ɩ̃ pãa na de a dɩ̃a nɩbɛ bɛ ŋa man nɩ a? Ãa n'ʋ bɛ pãa ŋmɛ̃ taa nɩ a? 32Bɛ ŋmɛ̃ na mɛ̃ bibiir na zɩ̃ a nɩ-yaga tuor-taa zie bʋɔlɛ taa yere nɩ: “Tɩ ŋmɛ n bàwr-bɩnɛ, ɛ́ nyɩ bɛ sɛb ɛ, tɩ ŋmãa nɩ lãwnɩ, ɛ́ nyɩ bɛ sɔw ɛ!” 33Yel-mɩŋa sɩza n'a, Zã-Bati wa na, bɛ wa dɩrɛ ɩ, ɛ́ bɛ nyúur ɛ, ɛ́ nyɩ yere kɛ́: “Kɔ̃tɔ̃-ìre n'ʋ.” 34A Nɩsaal Bie wa na, wa dɩrɛ ɛ́ nyúur, ɛ́ nyɩ yere kɛ́: “Bʋ̃-dɩ-nɔ̃wnɛ nɩ dã-nyúure n'ʋ, zuru-yar-dierbɛ nɩ yel-bier-maalbɛ bá n'ʋ.” 35Ɛcɛ a bɛlɩ dem za na sàw tu a Naaŋmɩn yã-bãwfʋ a, bɛ nyɛ̃ na bãw k'ʋʋ tɛr'ɩ yel-mɩŋa.»

Pɔw kãw cir'ɩ parfɛ̃ ƴãw a Yeezu a Faarizɩ̃ɛ Sɩmʋ̃ yir

36 Faarizɩ̃ɛ kãw tɩ bʋɔl'ɩ a Yeezu k'ʋʋ wa bɛ lãw dɩ. A Yeezu tɩ kpɛ n a Faarizɩ̃ɛ nɛ yir zɩ̃ a dɩb ƴãw. 37Pɔw kãw tɩ yi n a tẽw pʋɔ wa kpɛ, yel-bier-maalɛ tɩ n'ʋ. Ʋ tɩ wõ na kɛ́ a Yeezu be n a Faarizɩ̃ɛ yir dɩrɛ, ɛ́ tɩ de parfɛ̃ na ƴãw kʋsɛ-pla kole pʋɔ a wa n, 38wa àr'ɩ a Yeezu zikurí, a ʋ gbɛ́ɛ ƴãw#7:38 Wa àr'ɩ a Yeezu zikurí, a ʋ gbɛ́ɛ ƴãw: A nɩbɛ mɩ́ tɩ gã nɩ nɩ lõbowr a niwn lɩɛb cɔw a bʋ̃-dɩrɩ., ɛ́ nyɔw kon, a mʋta-kʋ̃ɔ cire waarɛ a Yeezu gbɛ́ɛ, ʋ fɩɛlɛ nɩ a ʋ zukɔbɛ bɛrɛ, ɛ́ mɔwrɛ, ɛ́ zɩɛr a a parfɛ̃. 39A Faarizɩ̃ɛ nɛ na tɩ bʋɔlɩ a Yeezu a dɩb ƴãw a na tɩ nyɛ̃ a lɛ a, ʋ tɩɛr'ɩ ʋ pʋɔ: «A nɩr ŋa tɩ sɩrɩ ɩ naaŋmɩn-ƴɛ̀r-manɛ a, ʋ nãá bãw nɩ ãa n'ɩ a pɔw ŋa, nɩ nɩ-bʋ̃ʋ n'ɩ a pɔw ŋa na tʋɔr ʋ a, ʋ nãá bãw na kɛ́ yel-bier-maalɛ n'ʋ.» 40Ɛcɛ a Yeezu tɩ de nɩ a ƴɛ̀rʋ yel ʋ: «Sɩmʋ̃ ʋ, ɩ̃ tɛr'ɩ ƴɛ̀rʋ bɔbr k'ɩ̃ɩ ƴɛ̀r kʋ̀ b.» Ʋ sɔw: «Ƴɛ̀rɛ, Wul-wul-kara a.» 41A Yeezu yel ʋ: «Nɩr kãw tɩ tɛr'ɩ samɛ dem ayi. Kãw tɩ tɛr'ɩ a ʋ wɛr kɔbr anũu (500) san, ɛ́ kãw tɛr a ʋ wɛr lɩz'a ayi nɩ pie san. 42A bɛ kãw za na bɛ tɩ tɛr a na ya a, ʋ bɛr'ɩ bɛ za ayi a bɛ samɛ. A bɛ buor sob'ʋ na nɔ̃w ʋ zuo a ʋ tɔ?» 43A Sɩmʋ̃ tɩ sɔw na: «Ɩ̃ tɩɛrɛ kɛ́ a sob nɛ san na bɛrmɛ zuo a ʋ tɔ dem a n'ʋ.» A Yeezu tɩ yel ʋ na: «Fʋ jiel'ɩ vla.»

44Al pùorí, ʋ tɩ lɩɛb'ɩ a pɔw zie ɛ́ yel a Sɩmʋ̃: «Fʋ nyɛ̃ nɩ a pɔw ŋa a? Ɩ̃ kpɛ n a fʋ yir pʋɔ, fʋ bɛ kʋ̀ m kʋ̃ɔ ɩ̃ pɛ́w gbɛɛ ɩ, ɛcɛ ʋl a, a ʋ mʋta-kʋ̃ɔ n'a ʋ pɛ́w nɩ a ɩ̃ gbɛ́ɛ, ɛ́ fɩɛlɩ a nɩ a ʋ zukɔbɛ. 45Fʋ bɛ nyɔw mɛ̃ weri puori mɛ̃ ɩ, ɛcɛ ʋl a, ɩ̃ na dɛ kpɛ wa tɔ ka a, ʋ mɔwrɛ nɩ a ɩ̃ gbɛ́ɛ. 46Fʋ bɛ cir kãa-nyũu ƴãw a ɩ̃ zũú ɛ, ɛcɛ ʋl a, ʋ cir'ɩ parfɛ̃ ƴãw a ɩ̃ gbɛ́ɛ zu. 47Mãa wa yere kʋ̀rɛ fʋ k'ʋʋ páw nɩ a ʋ yel-bebe na yãwmɛ bɛ dɩ vuo a suur a, ʋ na wul nɔ̃wfʋ yaga a n'a so. Ɛcɛ sob nɛ bɛ na mɩ́ dɩ suur kʋ̀ blã a, ʋ mɩ́ wul'ɩ nɔ̃wfʋ blã.» 48Al pùorí, a Yeezu tɩ yel'ɩ a pɔw: «Fʋ páw nɩ a fʋ yel-bebe suur.» 49Ɛcɛ a bɛlɩ dem na tɩ lãw dɩrɛ nɩ a Yeezu a, tɩ tĩ na tɩɛrɛ bɛ pʋɔ: «Nɩ-bʋ̃ʋ n'ɩ a nɩr ŋa na sʋ̃ɔmɩ mɩ́ dɩ a yel-bebe suur a?» 50Ɛcɛ a Yeezu tɩ yel'ɩ a pɔw: «A fʋ naaŋmɩn-sàwfʋ faa fʋ na, cere nɩ ƴã-ɓaarʋ.»

Currently Selected:

Luka 7: DBDC

Highlight

Copy