Luka 10

A Yeezu tõ n a ʋ po-tuurbɛ lɩz'a ata nɩ pie nɩ ayi

1À á ŋá pùorí, a Sore tɩ kaa na ír nɩbɛ lɩz'a ata nɩ pie nɩ ayi a ʋ po-tuurbɛ pʋɔ, ɛ́ tõ bɛ ayiri yiri a ʋ nidaa, a ten al za pʋɔ, nɩ a ziir al za ʋl mɩŋa na tɩ cere a. 2Ʋ tɩ yel bɛ na: «A bʋ̃-dieri na sɛw deb a yãwmɛ nɩ sɩza, ɛ́ a tõ-tõ-biir bɛ zɛ̃ bom ɛ. Nyɩ zɛlɩ a púo sob ʋ ƴãw tõ-tõ-biir bɛ cen tɩ de a bome. 3Nyɩ cen! Ɩ̃ tone nyɩ na mɛ̃ péli wɛ-baar sɔgɔ a. 4Nyɩ ta de libie ɩ, nyɩ ta de kɔr nɩ nafawr ɛ, ɛ́ ta nɩɩnɛ a sɔ́r zu puore nɩbɛ ɩ. 5Yir nɛ za pʋɔ nyɩ nãà wa kpɩɛr a, nyɩ de niwn yel: “A yir ŋa, ʋ tɛr ƴã-ɓaarʋ!” 6Nɩr wa be be nɔnɛ a ƴã-ɓaarʋ a, a nyɩ ƴã-ɓaarʋ na cen nɩ a ʋ zie, alɛ bɛ ɩ lɛ a, ʋ na lɛb'a wa a nyɩ zie. 7Nyɩ be a yir nɛ pʋɔ, dɩrɛ ɛ́ nyúur a alɩ bome nɛ bɛ nãà wa kʋ̀rɛ nyɩ a: a tõ-tone sɛwnɩ nɩ a ʋ sã-ya. Nyɩ ta cɔlɛ a yie ɩ. 8Tẽw nɛ za pʋɔ nyɩ nãà wa kpɛ ɛ̀ bɛ de nyɩ sãanʋ a, nyɩ dɩrɛ a alɩ bome nɛ bɛ nãà wa kʋ̀rɛ nyɩ a. 9Nyɩ sanɛ a bàalbɛ a be, ɛ́ yere kʋ̀rɛ a tẽw dem: “A Naaŋmɩn Naalʋ ta nyɩ na.” 10Ɛcɛ tẽw nɛ za pʋɔ nyɩ nãà wa kpɛ bɛ bɛ de nyɩ a, nyɩ yi a laɩ pʋɔ tɩ yel: 11“A nyɩ tẽw uuru tɛɛ za na pàw a tɩ gbɛ́ɛ a, tɩ tɛbr a na bɛrɛ kʋ̀rɛ nyɩ. Ɛcɛ nyɩ bãwnɩ a, a Naaŋmɩn Naalʋ ta na.” 12Mãa n'ʋ yere kʋ̀rɛ nyɩ, a ƴɛ̀rʋ-maalʋ bibir wa vɩɛ a, a Sodɔm tẽw dem dɔwrʋ na siwr'a gãw a tẽw nɛ dem.»

A ten al na bɛ sàw de a Yeezu a

(Mat 11:20-24)

13«We ãɩ, Korazin i! We ãɩ, Bɛtɩsayida a! A nɔ-ɓãa-yele á ŋá na maalɩ a nyɩ pʋɔ a, alɛ tɩ ɩ mɛ̃ a maal'ɩ a Tɩ́ɩ̀r nɩ Sɩdɔ̃ ten pʋɔ a, a ten á ŋá nɩbɛ nãá lɩɛb'ɩ a bɛ ɩb koro za, su vʋɔrɩ pɛnɛ ɛ́ ŋmɛ tãpɛlʋ#10:13 Su vʋɔrɩ pɛnɛ ɛ́ ŋmɛ tãpɛlʋ: À ŋá n'a bɛ mɩ́ ɩ wul kɛ́ bɛ bɔbr'a kɛ́ bɛ lɩɛbɩ a bɛ ɩb.. 14Alɛ so, a ƴɛ̀rʋ-maalʋ bibir, a Tɩ́ɩ̀r nɩ a Sɩdɔ̃ ten dem kʋ̃ nyɛ̃ dɔwrʋ sɛw a nyɩɩm ɛ. 15Ɛ́ fʋ̃ʋ, Kafarnawɔm ɩ! Fʋ tɩɛr kɛ́ fʋ na zɛw nɩ fʋ tʋɔra do tɩ tɔ salom bɩɩ? Fʋ na siw na, siw tɩ ta a kpɩmɛ tẽw.» 16A Yeezu tɩ cãà na lɛb yel a ʋ po-tuurbɛ: «Sob nɛ na bɛrɛ wone a nyɩ ƴɛ̀rʋ a, a ɩ̃ ƴɛ̀rʋ n'a ʋ bɛrɛ wone, ɛ́ sob nɛ na zawrɩ nyɩ bɛr a, mãa n'ʋ ʋ zawrɩ bɛr. Ɛcɛ sob nɛ na zawrɩ mɛ̃ bɛr a, a sob nɛ na tõ m a n'ʋ ʋ zawrɩ bɛr.»

A po-tuurbɛ lɩz'a ata nɩ pie nɩ ayi yi n a bɛ tome zie lɛb wa

17A po-tuurbɛ lɩz'a ata nɩ pie nɩ ayi tɩ lɛb'a wa, ɛ́ cɩlɛ bɛ za. Bɛ tɩ yere na: «Sore e, a kɔ̃tɔmɛ tɛɛ za sàwr'ɩ a tɩ nʋɔr a fʋ yúor ƴãw.» 18A Yeezu tɩ yel bɛ na: «Ɩ̃ mɩ́ tɩ nyɛ̃ nɩ a Sɩtaana ʋ yi a salom zu wa lo mɛ̃ saa na nyɩwrɩ a. 19Nyɩ nyɛ̃, nyɩɩm'a, ɩ̃ kʋ̀ nyɩ nɩ fãw kɛ́ nyɩ mɩ́ nɛb a wɩɩr nɩ a nan ŋmɛr, ɛ́ kʋ̀ nyɩ fãw kɛ́ nyɩ tʋ̃ɔ́ a dɔ̃ sob kpɛnʋ bʋʋrɛ za, ɛ́ bom za kʋ̃ tʋ̃ɔ́ ɩ nyɩ faa ɩ. 20Ɛcɛ nyɩ ta cɩlɛ nyɩ na dɩrɛ naalʋ kɔ̃tɔ̃-faar zu a ɩ, nyɩ cɩlɛ bɛ na sɛb a nyɩ yée ƴãw a tẽ-vla pʋɔ a.»

A Yeezu wul'ɩ a ʋ po-tuurbɛ sob nɛ na n'ɩ a Naaŋmɩn a

(Mat 11:25-27, 13:16-17)

21A pɛr nɛ pʋɔ, a Vʋʋrʋ Sõw tɩ ɩ na nʋ̃ɔ̀ ɩrɛ a Yeezu yaga za ʋ yel: «Ɩ̃ danɛ fʋ na, ɩ̃ Sãà a, salom nɩ tẽw za Sore e, fʋ na sɔwlɩ a yele á ŋá a bɛlɩ dem na tɛr yã a zie, nɩ a bɛlɩ dem na zànɩ bãw a zie, ɛ́ wul a a bibi-pʋrmɛ a. Ʋ̃ʋ, ɩ̃ Sãà a, fʋ na nɔnɛ a n'a fʋ ɩ à à ŋá.»

22«A ɩ̃ Sãà de nɩ bom za ƴãw a ɩ̃ nũú, ɛ́ nɩr za bɛ bãw ãa n'ɩ a Bie a bɛ ɩ a Sãà n'ʋ ɛ, mɛ̃ nɩr za na bɛ bãw ãa n'ɩ a Sãà a bɛ ɩ a Bie n'ʋ a, nɩ sob nɛ a Bie na sàw wul a.»

23A Yeezu tɩ lɩɛb'a yel kʋ̀ a ʋ po-tuurbɛ tɛwr: «Zu-nʋ̃ɔ̀ dem'ɩ a bɛlɩ dem mimie na nyɛrɛ a yele á ŋá nyɩ na nyɛrɛ a. 24Ɩ̃ sɩrɩ na yere kʋ̀rɛ nyɩ, naaŋmɩn-ƴɛ̀r-manbɛ yaga nɩ na-mɩnɛ yaga tɩ bɔbr'a kɛ́ bɛ nãá nyɛ̃ a nɔ-ɓãa-yele á ŋá nyɩ na nyɛrɛ a, ɛ́ bɛ nyɛ̃ a ɩ, bɛ tɩ bɔbr'a kɛ́ bɛ wõ a nɔ-ɓãa-yele á ŋá nyɩ na wone a, ɛ́ bɛ wõ a ɩ.»

Ãa n'ɩ a ɩ̃ tɔ sob? A Samaari tẽw nɩ-vla zʋkpar

25Lɛ n'a Naaŋmɩn wulu bãw-bãw-kara kãw tɩ ìr ŋmãa a Yeezu pùor sowr'ʋ: «Wul-wul-kara a, bʋ̃ʋ n'ʋ ɩ̃ na ɩrɛ páw a nyɔ-vʋʋrʋ na be kʋralɛ a?» 26A Yeezu yel ʋ: «Bʋ̃ʋ n'ʋ bɛ sɛb a Naaŋmɩn wulu sɛbɛ pʋɔ? Bʋ̃ʋ n'ʋ fʋ mɩ́ kanɩ a ʋ pʋɔ?» 27A sob nɛ tɩ sɔw na: «“Fʋ na nɔnɛ nɩ a Sore fʋ Naaŋmɩn nɩ a fʋ socir za, nɩ a fʋ sɩ́ɛ za, nɩ a fʋ fãw za nɩ a fʋ tɩɛrʋ za”, ɛ́ “nɔnɛ a fʋ tɔ sob mɛ̃ a fʋ mɩŋa a#10:27 Nyɛ̃ Wl-ayi 6.5 nɩ Lev 19.18..”» 28A lɛ n'a a Yeezu yel ʋ: «Fʋ sɔw nɩ vla! Ɩrɛ a lɛ ɛ́ fʋ na tɛr'ɩ a nyɔ-vʋʋrʋ.»

29Ɛcɛ a Naaŋmɩn wulu bãw-bãw-kara nɛ na tɩ bɔbr k'ʋʋ wul a ʋ yel-mɩŋa a, ʋ tɩ lɛb'a sowri a Yeezu: «Ãa n'ɩ a ɩ̃ tɔ sob?» 30A Yeezu tɩ sɔw na: «Nɩr kãw tɩ yi n Zerizalɛm ɛ́ siwr Zeriko, tɩ lo sɔ́r zu nyãnyu-nɩ-kʋrbɛ zu, bɛ fa a ʋ bome za ɛ́ nyɔw a ʋ tɔr za pɔb tɩ ƴãw a baafʋ nɩ a kũu cara pʋɔ bɛr, ɛ́ tɔl cen. 31Zɩ̃ kɛ́ Naaŋmɩn bàwr-maalɛ kãw mɩ̀ tɩ lo n a sɔ́r siwr, tɩ nyɛ̃ ʋ, ɛ́ dɛ tɔl zi-yũo ɛ́ bɛr ʋ. 32Levitɩ kãw mɩ̀ lɛb cere tɩ ta a be, nyɛ̃ ʋ, mɩ̀ lɛb bɩɛ zi-yũo tɔl ɛ́ bɛr ʋ. 33Ɛcɛ Samaari tẽw dɛb kãw na tɩ cere ʋ yɔb zie a, wa ta na nyɛ̃ nɩr na gã a, ɛ̀ nɩbaalʋ kpɛ ʋ. 34Ʋ tɩ taw na ta de divɛ̃ pɛ́w nɩ a ʋ natɩɛ, ɩ kãá sɔ sɔ, ɛ́ 'lẽ pàw, ɛ́ ɓáw a bàal dɔwlɩ a ʋl mɩŋa bʋ̃-zɔmna zu cen nɩ sãanbɛ yir tɩ kaa ʋ zie. 35A bio daarɩ́, ʋ tɩ ír'ɩ salm-zɩɛ libi-ɓɛlɛ ayi kʋ̀ a yir sob ɛ́ yel: “De kaarɛ nɩ a bàal zie, ɛ́ fʋ̃ʋ wa ír libie dɔwlɩ a, mãa n'ʋ na ya a za a ɩ̃ lɛb-waa daar.”»

36«Fʋ̃ʋ na nyɛ̃ a, a nɩbɛ ata bɛ ŋa pʋɔ a, buor sob'ʋ ɩ a tɔ ɩb a nɩr ŋa na lo a nyãnyuwr nuru pʋɔ a zie?» 37A Naaŋmɩn wulu bãw-bãw-kara tɩ sɔw na: «A sob ŋa na zɔ a ʋ nɩbaalʋ a n'ʋ.» A Yeezu tɩ yel ʋ na: «Cen, ɛ́ mɩ̀ tɩ ɩrɛ a lɛ.»

Marta nɩ Marya de nɩ a Yeezu sãanʋ

38A Yeezu nɩ a ʋ po-tuurbɛ na tɩ lo a sɔ́r cere a, ʋ tɩ kpɛ n tẽw kãw pʋɔ. Pɔw kãw bɛ na bʋɔlɛ Marta a, tɩ de ʋ nɩ a sãanʋ a ʋ yir. 39A Marta tɩ tɛr'ɩ yɛb a yúor dɩ kɛ́ Marya. A Marya tɩ zɩ̃ n a Sore pile bɛrɛ wone a ʋ ƴɛ̀rʋ. 40A Marta ʋl tɩ páwr'a viire gʋɔr a sãan kaafʋ ƴãw. Ʋ wa taw na ta yel a Yeezu: «Sore e, a bɛ ɩrɛ fʋ yel za kɛ́ a ɩ̃ yɛb zɩ̃ ɛ́ bɛr mɛ̃ ɩ̃ cɔbrɛ a dɩb ɩ̃ yõ ɩ? Pãa ƴãw ʋ sõw mɛ̃ wɛ!» 41A Sore tɩ sɔw ʋ na yel: «Marta a, Marta a, fʋ bàlɛ nɩ fʋ tʋɔra yel-yaga ƴãw, 42ɛcɛ bʋ̃-been yõ n'ʋ fɛrɛ. A Marya n'ʋ kaa ír a vla zie, ɛ́ nɩr kʋ̃ faa ʋ a ʋ zie ɩ.»

Currently Selected:

Luka 10: DBDC

Highlight

Copy