Yele-za-pɛr-tib 10
10
A nɩ-bʋʋrɛ bʋʋrɛ na be a tẽw zu a
(1Bi-yel 1:5-23)
1A Kʋ̃ɔ-paalʋ-kpɛ̃ɛ pùorí a, a Nowe bidɛbr Sɛ́m, Kam nɩ Zafɛtɩ tɩ dɔw nɩ bibiir. Nyɛ̃ a Nowe bidɛbr bʋʋrɛ yée.
2Zafɛtɩ bidɛbr'ɩ bɛ ŋa: Gomɛɛr, Magɔgɩ, Madaɩ, Yavan, Tubal, Mesɛkɩ nɩ Tɩrasɩ. 3Gomɛɛr bidɛbr'ɩ bɛ ŋa: Asɩkenaazɩ, Ɩrɩfatɩ nɩ Togarma. 4Yavan bidɛbr'ɩ bɛ ŋa: Elisa, Tarsisɩ, Kitim nɩ Orodanim. 5Bɛl zie n'a a nɩbɛ tĩ bʋ́r yaarɩ kpɩɛr a kʋ̃ɔ-kpɛ̃ɛ-sɔgɔ-ten pʋɔ. Ŋa za tɩ kpɩɛr'ɩ a ʋ tẽw, tu n a ƴɛ̀r-pɛ-bʋʋrɛ ʋ na ƴɛ̀rɛ a, ɛ́ kpɩɛr nɩ-bʋʋrɛ kãw pʋɔ tu n a ʋ dɔwlʋ.
6Kam bidɛbr'ɩ bɛ ŋa: Kusɩ, Mɩsɩrayim#10:6 Mɩsɩrayim: A Eziptɩ tẽw bɩɩ a bɛlɩ dem na kpɩɛr a ʋ pʋɔ a nɛbɛ a Ebre mɩnɛ tɩ bʋɔlɛ a Mɩsɩrayim. Nyɛ̃ Kan-nɛ́ɛ 13., Putɩ nɩ Kanãa. 7Kusɩ bidɛbr'ɩ bɛ ŋa: Seva, Hawila, Savita, Araema nɩ Saviteka. A Araema bidɛbr: Saba nɩ Dedan. 8Kusɩ mɩ̀ tɩ n'ɩ a Nemirodi sãà. A Nemirodi n'ʋ tɩ ɩ a dɛb-gãdaa dãw-niwn sob a tẽw zu. 9A Nemirodi tɩ ɩ n nabawl-kara a Sore zie. Alɛ so bɛ mɩ́ yel kɛ́: «Nabawl-kara a Sore zie mɛ̃ Nemirodi a.» 10A ʋ naalʋ-tẽw tẽ-bɛrɛ n'ɩ á ŋá: Babɛl, Ɛrɛkɩ, Akadɩ nɩ Kaline na be a Mezopotami tẽw a. 11A Nemirodi tɩ yi n a tẽw ŋa pʋɔ cen Asiiri tɩ ŋmãa Nɩnɩɩvʋ, Erehovɔtɩ-Ɩɩr, Kala 12nɩ Eresɛn na be a Nɩnɩɩvʋ nɩ a Kala tẽ-kpɛ̃ɛ cara pʋɔ a.
13Mɩsɩrayim tɩ n'ɩ a Ludɩ, Eyinam, Lehavʋ, Nafituwa, 14Patʋrɔsɩ, Kasilua nɩ Kafɩtɔɔr ten dem sãàkʋm-kʋra. A Kasilua tẽw dem pʋɔ n'a a Filisɩtɛ̃ mɩnɛ yi.
15Kanãa tɩ dɔw nɩ Sɩdɔ̃, a ʋ bi-dãw, ɛ́ dɔw Hɛtɩ. 16A Hɛtɩ tɩ n'ɩ a Zebizitɩ#10:16 Zebizitɩ: A bɛlɩ dem na kpɩɛr a Zebi tẽw a nɛbɛ bɛ bʋɔlɛ a Zebizitɩ. A Zebi tɩ ɩ n a Zerizalɛm tẽw yo-kʋra, a lɛn daar a Daviir na bɛ tɩ zɛb de ʋ sɛr a., a Amoritɩ, a Gɩrgasitɩ 17a Hivitɩ, a Arkitɩ, a Sinitɩ, 18a Avaditɩ, a Semaritɩ nɩ a Hamatitɩ mɩnɛ sãàkʋm-kʋra. A pùorí a, a Kanãa tẽw dem yie dɔwlʋ tɩ bʋ́r'a yaarɩ a ziir za, 19ɛ́ a bɛ tẽw tɩ tĩ Sɩdɔ̃ ɛ́ cen Geraar lowr tɩ tɔ Gaza, ɛ́ mɩ̀ lɛb cen Sodɔm, Gomɔɔr, Adima nɩ Sevoyim lowr tɩ tɔ Lesa. 20A Kam bidɛbr'ɩ a bɛ ŋa na bʋ́r bʋ́r tu n a bɛ dɔwlʋ nɩ a bɛ ƴɛ̀rʋ a, a bɛ ten pʋɔ nɩ a bɛ bʋʋrɛ pʋɔ a.
21A Sɛ́m na ɩ a Zafɛtɩ kpɛ̃ɛ a mɩ̀ tɩ dɔw nɩ bidɛbr. Ʋlɛ n'ɩ a Ebɛɛr nɩ a ʋ bʋʋrɛ sãàkʋm-kʋra. 22Sɛ́m bidɛbr'ɩ bɛ ŋa: Elam, Asuur, Arpakisadɩ, Ludɩ nɩ Aram. 23A Aram bidɛbr'ɩ bɛ ŋa: Usɩ, Hul, Getɛɛr nɩ Masɩ. 24Arpakisadɩ tɩ dɔw nɩ Sela, ɛ̀ Sela dɔw Ebɛɛr. 25A Ebɛɛr tɩ dɔw nɩ bidɛbr ayi: a dãw-niwn sob dɩ kɛ́ Pelɛgɩ, a pɛr lɛ kɛ́: “Bʋ́rʋ”. Bʋ̃ʋ n'ʋ vɛ̃, a ʋ daar'a a tẽw zu nɩbɛ tɩ bʋ́r bʋ́r. A ʋ yɛb tɩ dɩ na kɛ́ Yɔkɩtan. 26Yɔkɩtan tɩ dɔw nɩ Almodadɩ, Selɛfʋ, Hasarmawɛtɩ, Yera, 27Hadoram, Uzal, Dikɩla, 28Oval, Avimayɛl, Saba, 29Ofɩɩr, Hawila, Yovavʋ. A Yɔkɩtan bidɛbr'ɩ a bɛ ŋa za. 30A bɛ kpɛb zie tɩ be n Mesa nɩ a Sefaar tan vuo na be a saa-pɛrɩ́ a cará. 31A Sɛ́m bidɛbr'ɩ a bɛ ŋa na bʋ́r bʋ́r tu n a bɛ dɔwlʋ nɩ a bɛ ƴɛ̀rʋ a, a bɛ ten pʋɔ nɩ a bɛ bʋʋrɛ pʋɔ a.
32A Nowe bidɛbr dɔwlʋ n'ɩ à à ŋá na tu a lɛ a dɔwfʋ na dɔw tu taa a, nɩ a nɩ-bʋʋrɛ bʋʋrɛ a. A nɩ-bʋʋrɛ za na yaarɩ be a tẽw zu a kʋ̃ɔ-paalʋ-kpɛ̃ɛ pùorí a, bɛl zie n'a bɛ yi.
Currently Selected:
Yele-za-pɛr-tib 10: DBDC
Highlight
Share
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
