Matie Sɛbɛ 11
11
A JÃ-BATII NƖBƐ Ʋ NA TƲ̃ A JEEJU SƐ
(Lu 7.18-35)
1A lɛ a *Jeeju na jaan a ʋ *par-tuurbe pie-nʼayi baar, ʋ yi na cen a Jufisɩ ten pʋʋr a ƴɛrɩ̃ jaanfʋ nɩ a ƴɛrɩ̃ hierfʋ ɩnɛ.
2Ɩ̃-cɛ a mɩnɛ a Jã na cãa a kasu pʋɔ, ɩ̃ wõ a ala a *Kirisi na maala, ʋ tʋ̃ na a ʋ par-tuurbe 3a ba cen na soor ʋ:
“Fʋ̃ʋ ɩ a ʋlɔ na waara, mɩɩ sɩ cãa cɛlɛ nɩ-kpee?” 4A Jeeju yel ba:
“Nyɩ́ cen na yel a Jã a ala nyɩ na nyɛ ɩ̃ mɩ wõ: 5a jɔn nyɛrɛ na, a gbɛɛ ir cere, a kɔn mɩ pɔlɔ, a won wono, a kũusɩ jawra, ɩ̃ a nãw deme mɩ pɔwrɔ a Ƴɛr-Son. 6Nũɔ be na a ʋlɔ jie a ɩ̃ maalfʋ na ma cɛ ʋ wa.”
7A mɩnɛ a Jã par-tuurbe na lɩɛb cere, a Jeeju nyɔw na a Jã ƴɛrɩ̃ ɩ̃ ƴɛrɛ a nɩbɛ yele nɩ:
“Bõ nyɩ cen na ꞌwuor a be a wɛkar pʋɔ? Ci kakɩr a sɛsɛb na dama mɩɩ? 8Ɩ̃-cɛ bõ ʋlɔ nyɩ cen na ꞌwuor? A daba na ƴaarɩ̃ cẽcẽ-vɛlɛ ʋ mɩɩ? Ɩ̃-cɛ a bala na ma ƴaarɩ̃ a cẽcẽ-vɛlɛ, jamana yir ba ma be. 9Ɩ̃ bõ ʋlɔ nyɩ cen na ꞌwuor? A Naaŋmɩn ƴɛr-hiere nyɩ cen na ꞌwuor mɩɩ? Ɔɔ, a lɛ ʋ, ɩ̃-cɛ ʋ gãw na a ƴɛr-hiere bar. 10A Jã ʋlɔ ɩ̃ ɩ a ʋlɔ ba na dãa sɛb a Naaŋmɩn Sɛbɛ pʋɔ yele: ‘Nyɛ, ɩ̃ na tʋ̃ na nɩrɛ ʋ de nĩe cen, na pɛl a sɔr a fʋ ɩnɛ.’ 11Yel-mɩ̃ɛ ɩ̃ yele nyɩ, nɩrɛ kãw ma be be ba na dɔw ka a tẽw pʋɔ na gãw a Jã-Batii wa. Ɩ̃-cɛ a ʋlɔ na nyɩrɩ̃ pab a saa juu fãw pʋɔ gãw ʋ na. 12Wa nyɔw nɩ a Jã-Batii daar wa ta nɩ a ƴɛ̃ƴɛrɩ̃, a saa juu fãw be na a gborgbor deme jie, ɩ̃ ba ma faa ʋ na a nɩbɛ jie. 13A-na-ɩ a Naaŋmɩn ƴɛr-hierbe nɩ a ƴɛr-kpɛn ƴɛrɩ̃sɩ a jaa, a Jã ba ƴɛr wa bɛw. 14Ɩ̃ a ala ɩ nyɩ na tʋɔ na sɔw a ɩ̃ ƴɛrɩ̃, a Jã ʋlɔ ɩ na a Eli na dãa sɛw ʋ wa. 15A ʋlɔ na tɛrɛ a tobo wono nɩ, ú bɔ̃w cɛlɛ!
16“Babõ ɩ̃ na tʋɔ de a dɩnaa nɩbɛ na manʼɩ̃? Ba wɔ̃ na taa nɩ a bibiir na jɛ a gbulĩ pʋɔ, ɓolo bʋɔlɔ nɩ taa yele nɩ: 17‘Sɩ ŋme na a kʋɔr, a nyaa sɛ wa, a sɩ mɩ ŋme a ko-bɩnɛ a nyaa mɩ kõ wa.’ 18A-na-ɩ a Jã wa na, ma bʋn dɩrɛ lɛ wa, ɩ̃ ma mɩ nyuure a dãa wa, a ba yel á kɔ̃tɔ̃-nɩrɛ ʋ. 19A *Nɩbɛ Bie wa dɩrɛ ƴɔnɔ, ɩ̃ mɩ nyuure a dãa, a ba lɛ yel go: ‘Nyɩ́ nyɛ dɩdɩrɛ nɩ dã-nyuure na ɩ a lãpo-dierbe nɩ a maal-faar deme baraa.’ Ɩ̃-cɛ a Naaŋmɩn tʋmɔ miile na a mɩnɛ a ʋ kpaarfʋ na tor.”
A TEN ALA NA JAAR A JEEJU ƳƐRƖ̃
(Lu 10.13-15)
20A *Jeeju nyɔw na ɩ̃ gala a ten nɩbɛ bala na nyɛ a ʋ nɔ-kofʋ tʋn yaw ɩ̃ ma sɔw lɩɛb a yɛ̃ wa, yele nɩ:
21“Nabier na ta na a nyɩmɩ Kɔrajɩ̃-tẽ-deme! Nabier na ta na a nyɩmɩ Bɛsada-tẽ-deme mɩ! A-na-ɩ a ala ɩ a Tɩɩr nɩ a Sɩdɔ̃ ten deme ɩ̃ dãa nyɛ a nɔ-kofʋ tʋmɔ ala nyɩ na nyɛ, ba naa dãa na lɩɛb a ba yɛ̃ korĩ-cɛ, su nɩ a yel-jaar, ŋme nɩ a tãpɛlɩ̃. 22Ɩ̃-cɛ ɩ̃ yele nyɩ na, a ƴɛrɩ̃ guorfʋ dayen, a Tɩɩr nɩ a Sɩdɔ̃ ten hʋʋr nyɛfʋ na sa na a nyɩ ben. 23Ɩ̃ a nyɩmɩ Kapɛɛnam-tẽ-deme, nyɩ tɩɛr beeka ba na jɛw nyɩ na wa ta nɩ a saꞌlon mɩ? Ɩ̃-cɛ ba na ɛ̃ɛ na suu nɩ nyɩ wa ta nɩ a kpɩɩn tɛ̃w. A-na-ɩ a nɔ-kofʋ tʋmɔ nyɩ na nyɛ, a ala dãa ɩ a *Sɔdɔm-tẽ-deme ɩ̃ nyɛ a lɛ, a tẽw ʋlɔ naa cãa na wa ta nɩ a dɩnaa. 24Ala-ɩ̃-sɔ ɩ̃ yele nyɩ na, a ƴɛrɩ̃ guorfʋ dayen, a Sɔdɔm hʋʋr nyɛfʋ na sa na a nyɩ ben.”
A JEEJU NA BƲƆLƆ A NƖBƐ A PƖƐNFƲ ƖNƐ
(Lu 10.21-22)
25A ʋna daarʼãa a *Jeeju lɛ yelʼã:
“Ɩ̃ Sãa, ɩ̃ puor fʋ na, a fʋ̃ʋ na ɩ a saa juu nɩ a tẽw pʋɔ Nɩ-kpɛ̃ɛ, a mɩnɛ fʋ na sɔɔlɩ̃ a yele ala a yɛ̃-deme nɩ a nɩ-kpaarsɩ jiir, ɩ̃ de kʋ a bibiir. 26Ɩ̃ Sãa, a lɛ ʋ, a-na-ɩ lɛ fʋ dãa bʋɔrɔ.
27“A ɩ̃ Sãa barʼã a yele a jaa a ɩ̃ nurɩ̃. Nɩrɛ ma bɔ̃w a Bie, ɩ̃ ma ɩ a Sãa tɛw ʋ wa. Ɩ̃ nɩrɛ ma mɩ bɔ̃w a Sãa, ɩ̃ ma mɩ ɩ a Bie tɛw ʋ wa, nɩ a bala a Bie na bʋɔrɔ ʋ miil ba.
28“A nyɩmɩ jaa na tuo a to-tɩmɩsɩ mɩ vɔwrɔ nɩ, nyɩ́ wa ka a ɩ̃ sɛ̃, ɩ̃ ɩ̃ na kʋ nyɩ na a pɩɛnfʋ. 29Nyɩ́ ɩ a sɩ lãa tuo a *da-kpile-ŋmãa, a nyɩ bar a nyɩ mɩ̃ɛ ɩ̃ jaan nyɩ. A-na-ɩ ɩ̃ ɩ na nɩ-hɛlɛlɛ ɩ̃ mɩ tɛrɛ a su-ɓaar, ɩ̃ nyɩ na pɔw na a nyɩ suur pʋɔ pɩɛnfʋ. 30A-na-ɩ a ɩ̃ da-kpile-ŋmãa yɔw na a tuofʋ, ɩ̃ a ɩ̃ tuor ɩ̃ na kʋrɔ nyɩ, pe na.”
Currently Selected:
Matie Sɛbɛ 11: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
