SAKARIYA 10
10
Ng'utamiida gwarugu neajeeda ghuhooda
1Amwaasha NG'UTAMIIDA roopta,
aba damani bea muweedean,
NG'UTAMIIDA gwasina shamooghuutka,
ak gaygagooneegwa shiishiiyda roopta,
nea gaba siisi siitaw nyeega.
2Aba gideaba sanaamajeega gabaloola haleanjeeda mwadaagha;
nea fuga bara lagheanga ghwadaah ng'uyeega,
ak gweadu giirgweatka ng'uyeega,
nea ghwanung' ghahawda buuneeda mwadaagha,
aba seareeni gaweay nea gawuurji gisilga
sisawan mandeawana jeagiischoocheanda.
3“Nyarasteanyu gwanda badayda jeagiischoodiga,
ak gaydawa dalas uhuudeaba saawa,
aba gideaba NG'UTAMIIDA bea lugweega ning'ula hawandaanyi, nea gheeh Yuda gil,
ak gayghwanung' gawuurji faraasajeagaaschi miyaasiin bea ng'ucheeda.
4Bugusta nyaawa gaygwarina fuga jea goombaliischi,
ea gea mida madeedeaba suurja,
ea shirikarajeega,
ea gea jea goombal fugeasu.
5Ak saawa gaygawuurji fuga meanyi,
aleapsa ng'eanyi weajoodiga nyaawa aba jeeda sheang'weeda naweeda ng'ucheeda,
ak gaygang'uchi aba gideaba gwandeayi sea NG'UTAMIIDA,
nea giika ding'da faraasajeegean gajeenung' gwahirbiban.
6“Gaydanung' ghwanyas uurda fuga Yuda,
ak gaydalealu fuga gheeh Yosefu,
ak gaydaadealda, aba gideaba ghaabwaydi
ak gaygawuurji gili miidajakta,
aba gideaba aniini geawooschi NG'UTAMIIDA was ASEETA nyaawa, ak gaydealeeysiit saawa.
7Fuga Efraimu gayghwanyas uurjeenga,
nea gahoosan jeesinga nyaawa gawuurji fuga leabu leeshooda difaayi;
ak gayghwadaah diibiga nyaawa ng'asheesu, ak gahoosan,
nea gahoosasa jeesinga nyaawa NG'UTAMIIDA.
8“Gaydeajuursa saawa, nea ghaabwadi geat,
aba gideaba nealealu,
ak gayghoahaada gawuurji gidaghayi bea mwadi.
9Ak gaydaadaarda saawa gaweay jeeda eemoojiga,
ak gayghoapkaadan nea gwanda darooraka sheagi;
ak gaygoobiida hoowa sea diibiga nyaawa ak iidu gabiigu.
10Ak gaydeadeelu ghoah ghang'eada ng'eanyiida Misri,
gaydabwadageat saawa ak gearuuteawi jeeda ng'eanyiida fuga Ashuru,
ak ghaanung' gaweay ng'eanyiida Gileyadi ea Lebanoni,
ak ghwanyiit ng'eanyiisean buuneeda ea ghoareat heechea goobiida.
11Nea niny abeeda gaygwasik jeeda basooda Misri
nea laweajajeega basooda gajealas,
nea beega sean sheagi jih bea eenda Nayli gayghwajaam.
Ak gajeenung' ghwahiing'aan ghwarjeeda fuga Ashuru
nea goosha uurda fuga Misri.
12Ak gaydanung' ghwanyas uurda aba heeda NG'UTAMIIDA,
ak gaygaweelweel gaweay heechea gaweay aba gheawungaaschi,”
gwarugu NG'UTAMIIDA.
Currently Selected:
SAKARIYA 10: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
