MALAKI 2
2
1“Ak ghamneawa, Ea ashoohoodiga, asi nih diigheandeang'wa. 2Iimoaleaydani iit, ak ea meayiini jeesinga gurooruunatkeagwa ak ghoaghaambiit gheawungeasu, aba girugu NG'UTAMIIDA bea lugweega, abeeda gaydanung' ghwahidu mooshteayda badahuukeagwa ak gaydamwaashta ghawoodeang'wa; nea aba huumwa ea nigeawiit damwaashta saawa, aba gideaba mii ayiina ng'asheesu gurooruunatkeagwa. 3Ng'ula, gaydala jeacheengeagwa ak gaydayeasha gheamamuunatkeagwa heelga, heelga haleanjeedeang'wa oaghadoawandi, ak gaydaang'aamwaneegwa madeedeanyu. 4Abeeda gajanala gideaba diigheanji geagoonyi, ak abeeda gamajeegiit neajeedeanyu aba heeda Lawi, nih gwarugu NG'UTAMIIDA bea lugweega. 5Neajeedeanyu sea niny neajeeda manda muudeanooda ea hoyyoo, ak ghaadawji saawa niny, ak abeeda ghaabeali; ak ghoawalan aniini, ak ghamiinaada nea ghabwat gheawungeasu. 6Ghuutaanyi gwanda diigheanda huumwa, ak ea manda ng'asheanda muy nirina ghuutaanyi. Iissa geadeayeewi aba hoyyoo ea doobiiwnata, ak ghwayam fuga saang'a ea ghwanung'waada ng'asheega munyas. 7Aba gideaba ghuuta ashoohoocheanda gagasa gwarugu ng'asheega fughareeda, ak gagasa buuneeda giinealshooda aba ghuutaanyi, aba gideaba niny giijasoocheanda NG'UTAMIIDA bea lugweega. 8Ak ea noasajaadawi naweeda; ak ea noanung' ghwaschoarda fuga saang'a aba deaweedajeegeagwa; ak ea naabwari darari neajeeda Lawi, gwarugu NG'UTAMIIDA bea lugweega, 9ak ghaanung' eefooleegwa nea geesawaneegwa aba madeeda buuneesean, gawuurji gidameang'waaydani ng'asheegeasu ak ghoahiimu shiitmeeda aba jeeda deaweedajeegeagwa.”
Nyoota doobiiwnata buuneeda aba heeda ASEETA
10Neada aseasa eesa sean ea meebeahi ghwaanagi? Neada ea masineasa ASEETA asakaleala? Abeeda ghwasaan inyas meendeawani masaweega aba hichpa nuudiini, ak goofooli neajeeda ghweanigaasa? 11Abeeda fuga Yuda nijakta mureeda, ak gwasin ng'asheanda muy aba jeeda Israeli ea jeeda Yerusalemu; aba gideaba Yuda niibwara darari heeda ghaydit bea NG'UTAMIIDA, was heeda bwariiy, ak ghaghi huda bada aseecheeka eemoojiga. 12Gagasa ghwasach NG'UTAMIIDA aba jeeda maheemajeega Yakobo, aba gideaba siida wassean sina ng'asheesu ghana gamuuwu ghana ghwasha, ghana gweadu haleanjeeda ghadooweeda heeda NG'UTAMIIDA bea lugweega!
13Ak goobiikti asina ng'asheanji. Goodukuteawi dabeaka heeda wagiida hean NG'UTAMIIDA, aba shooka ea giiseaneega aba gideaba mudu gagasa haleanjeeda ghadooweeda ghana ghamwas bariinyeega haleanjeeda geatingeagwa. 14Ak ghoanyaashti gideaba, “Ghwasaan inyas mamwasa?” Gweagu gideaba NG'UTAMIIDA muushoocheanda neajeeda gil aba dageascheadaang'u ea dea gatmooda gheareemaneanduumeadaang'u, amadu ea mudu sisiina mureeda, earapeadi was dea indeawi was gatmoadaang'u bea neajeeda. 15Neada ea masineegwa ASEETA ahuwa siyagi ak gagooneasa guroorooda ea eaweega? Ak gabaysiina naaha niny? Gagasa ahuwa haleanjeeda ASEETA bea ghadooweeda. Asi ashageada, adagwanda siida masisiina mureeda gatmooda gheareemaneanduumeadaanyi. 16“Aba gideaba aniini ghaasichi nung'ooda, gwarugu NG'UTAMIIDA was ASEETA Israeli, ak ea meagassi iimida jeedeang'wa siida sima gatmoadaanyi ng'asheega munyas, gwarugu NG'UTAMIIDA bea lugweega. Asi ashageada geat ak ea adagabayseegwa mureeda.”
Eaweeda girgweaksiinda nineekiit
17Ang'iing'i niibuuri NG'UTAMIIDA aba ng'asheagaagu. Ak gooyeenyi, “Neada aseasa geepuurdiin niny?” Iisiyeenyi, “Siida sina ng'asheega munyas aamiy aba madeeda gheanyanga NG'UTAMIIDA, ak ghabwariiy.” Ghana ghoanyaashta gideaba, “Gwanda yeenu ASEETA doabiiwaat?”
Currently Selected:
MALAKI 2: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
