LUKA 3

Girukwiida Yohaneeda Abaatiisachi

(Mat 3:1-12; Mar 1:1-8; Yoh 1:19-28)

1Aba gweaydeaba damanamuut bea Diberio Gaysari, nea abeeda Bontio Bilato ea sugoocheanda ng'eanyiida Yudeya gil, nea Herode abeeda ea sugoocheanda ng'eanyiida Galilaya, nea orjeeda ghaamwat siguura Filipo ea sugoocheanda Itureya ea Dirakoniti, nea Lisaniya, abeeda ea sugoocheanda Abilene, 2Nea abeeda aba damanda waseewa Anasi ea Gayafa ashoohoodiga heesi, ghwahidu ng'asheanda ASEETA heeda Yohana orjeeda Sakariya aba dareapcheeda; 3Hean ghang'eat gawa ng'eanyiisean neaweesa Yordani, nea gwarukwiida giibaatiisanda samsiinda riing'eega. 4Gawuurji gissing'oarda aba jeeda gitaabooda ng'asheega sibaneeda siguura Isaya gideaba,

“Ghwanya ghuuta siida nyeara dareapcheeda;

nea gwayeena asisina naweeda Ng'utamiida,

ooleapa naweadingaaschi.

5Nea geeng'alsa ghalalayeeka sean,

ak geahiing'u giijeega ea heayeeniga,

nea heeda ghwan gajeatoabiiw

nea naweadinga gudung'unyoojiga gajeesin gamiyeasiidi;

6Ak gilinyoo ea sih gayghwadaah lealnooda ASEETA.”

7Gwarukusa fuga saang'a buwa headaanyi eebaatiisan, ak gwayeesha, “Ea dayeega udang'usheega! Gwareekuseegwa ng'eaha ea amng'awana nyarasta jea ghwahidu? 8Asi ajiila haghweega miisa duukuunooda, nea adooyeeniisi geat, ‘Geendeawi ghweandeanya nea Abrahamu’, aba gideaba geayeeshiineegwa ASEETA ghoamu ghwayam lagheang'su ghoah diibiga Abrahamu. 9Ak ghamneawa joomooda ea siyiin guumsheaka geediga, ak geeta maji haghweega miyaasiin gajealach ak geejaksa jeeda beasta.”

10Ghoanyaash eemeeda nea gwayeesha, “Abeeda gajeesna naaha?” 11Ghwasha niny nea gwayeesha, “Siida mideawa hang'weak iyeenya, daadawa hang'agi siida mandeawana, nea siida mideawa hamita ea dasindunu.” 12Ghapka eara fuga ang'oonyi gwaadi eebaatiisan, ak eara saawa gwayeesha, “Gajeesna naaha aseasa giinealshoocheanda?” 13Gwayeesha saawa, “Adoong'oonyayi gwaadeeda haweewa dea sirukuneegwa.” 14Eara shirikara ghoanyaash nea gwayeesha, “Ama aseasa gajeesna naaha?” Gwayeesha, “Adoareachi siida gidaanyi aba uurda ghana oahaakta aba ng'uyeega, akghusa mushahareedeang'wa.”

15Damanda duu gwandeewa buuneeda jeeda furdeaydean, goonyeari geat buuneassean aba jeesinga nyaawa aba iita Yohana, gideaba gwadeepa ea Gristohi, 16ghwasha Yohana nea gwayeesha buuneesean “Aniini geabaatiisananeegwa beega; nea siida jea ghwahidu gaburdeawean uurda, ak aniini ea mamiisean deatineada deanga geakaaschi; nea niny gaygoobaatiisananeegwa Guroorooda Ghaydit ea beasta. 17Gida aleela booga gwanda geatindaanyi, ak gaygoobuus heeda jea gooleelsa, ak gooweamsa ngaanoadaanyi jeeda gijigooda, nea looyda gayghaghwarda aba beasta maygamis.”

18Gwareekusa nea goobaloola buuneeda ng'asheega saang'a nea gwarukwiida Giijaasta Miy. 19Iidu goowoowsa Herodeyda was sugoocheanda, nea goowoowsiina gheenda Herodiya, was gatmooda orjeeda ghaamwat, ea badayda ng'asheega munyas saang'a sina Herode, 20ea mwaara gil gwasin dea muy nuut gwajaksa Yohana ghealooniga.

Giibaatiisanda Yesu

(Mat 3:13-17; Mar 1:9-11)

21Hit giibaatiisanda buuneeda sean, ea dea Yesu nea ghamwaash ASEETA ghwajaada bugusta humng'eeda, 22ak gwashuubeesa uhuudaanyi Guroorooda Ghaydit nea gawuurji ghariibajeanda, ak ghwanya ghuuta nyaasha humng'eeda nea gwayi, “Ang'iing'i guwoosi Orjeedeanyu aabwariinyi; gwadan jeedeanyu.”

Rooproobanga jiilu Yesu

(Mat 1:1-17)

23Yesu ghoang'eat giinealshoadaanyi nea gaba gweanyeew diktam ea damanamughuush, nea abeeda (geaghay) gideaba niny orjeeda Yosefuheeda Eli, 24Eli gaba Matari, Matari gaba Lawi, Lawi gaba Melki, Melki gaba Yanai, Yanai gaba Yosefu, 25Yosefu gaba Matatiya, Matatiya gaba Amosi, Amosi gaba Nahumu, Nahumu gaba Esli, Esli gaba Nagai, 26Nagai gaba Mati, Mati gaba Matatia, Matatia gaba Shemei, Shemei gaba Yosefu, Yosefu gaba Yuda, 27Yuda gaba Yoana, Yoana gaba Resa, Resa gaba Serubabeli, Serubabeli gaba Shealtieli, Shealtieli gaba Neri, 28Neri gaba Melki, Melki gaba Adi, Adi gaba Gosamu, Gosamu gaba Elmadamu, Elmadamu gaba Eri, 29Eri gaba Yoshuwa, Yoshuwa gaba Elieseri, Elieseri gaba Yorimu, Yorimu gaba Matate, Matate gaba Lawi, 30Lawi gaba Simon, Simon gaba Yuda, Yuda gaba Yosefu, Yosefu gaba Yonamu, Yonamu gaba Eliyakimu, 31Eliyakimu gaba Meleya, Meleya gaba Mena, Mena gaba Matata, Matata gaba Natani, Natani gaba Dawdi, 32Dawdi gaba Yese, Yese gaba Obedi, Obedi gaba Boasi, Boasi gaba Sala, Sala gaba Nashoni, 33Nashoni gaba Aminadabu, Aminadabu gaba Adimini, Adimini gaba Aramu, Aramu gaba Hesroni, Hersoni gaba Beresi, Beresi gaba Yuda, 34Yuda gaba Yakobo, Yakobo gaba Isaka, Isaka gaba Abrahamu, Abrahamu gaba Dera, Dera gaba Nahori, 35Nahori gaba Serugi, Serugi gaba Reu, Rewu gaba Belegi, Belegi gaba Eberi, Eberi gaba Shela, 36Shela gaba Genani, Genani gaba Arfaksadi, Arfaksadi gaba Shemu, Shemu gaba Nuhu, Nuhu gaba Lameki, 37Lameki gaba Metusela, Metusela gaba Henoko, Henoko gaba Yaredi, Yaredi gaba Mahaleli, Mahaleli, gaba Genani. 38Genani gaba Enoshi, Enoshi gaba Seti, Seti gaba Adamu, Adamu gaba ASEETA.

Currently Selected:

LUKA 3: BG15

Highlight

Copy