LUKA 10

Yesu goojeakta fih laadam ea damanamughuush

1Ng'ata ng'asheesu ghwaloat Ng'utamiida fih suuk laadam ea damanamughuush, ak goojeakta gabadiina iyeenya, goosheedeawa niny, gaweay gil nyooh ea mujiini gil ea heeda wassean gasa niny gawa. 2Gwayeesha saawa, “Booga aasaang'a ak ea ng'ay fuga gadiyeeda, amwaasha Ng'utamiida bea booga goojeakta buuneeda jea ghwalach boagaaschi. 3Asi aweayeena; nea goong'ulayi aba gideaba geajeakteaydaneegwa dayeega gisilga jeeda suuyeeka. 4Adiidu ghoayaadi geadi shageeda, ghana sandakwajeanda, ghana geeka; nea adoakeacheewi siida aba naweeda. 5Nea gheeda wassean ooweayi jeeda gidamadeeda ayeena, ‘Daba gheawi hoyyoo!’ 6Abeeda iimida orjeeda hoyyoo hoowa, gayghwanyas hoyyooydeang'wa; ama mandana, abeeda gaygabiikseegwa. 7Ak goopiidi gheawi, ak gooyeagiischi nea ghoaleayi gisigooneegwa, aba gideaba siida gadiiyi gahaguuw gidageatindaanyi; adooriteawi gheawi ak gooweayi gheaw nuut. 8Iyoahiti mujiineeda wassean sideaptaneegwa, ayaaga gisigooneegwa; 9oahaabwa fuga miyean mida jeedida nea goorukusi fugiga gideaba, ‘Sugoocheanduumeeda ASEETA nineekiiseegwa.’ 10Nea aba mujiineeda ooweayi sean ak ea mwadeaptaneegwa, goosikchi naweadingaaschi nea gooyeenyi, 11‘eara birjeanda mujiineedeang'wa noas geeshangaasa geelalaksi iheengeagwa; ak goobiissi anala gideaba sugoocheanduumeeda ASEETA nineekiit.’ 12Gaydayeeshiineegwa, gayghoamu ghamilikghta muuchi Sodoma eaweedida ea ghang'al mujiineedida.

Mujiinajeega mandeawana masaweega

(Mat 11:20-24)

13“Shageada, Gurasini! Shageada, Betsayda! Aba gideaba deamdeamanga ghayi sisin aba heedeang'wa inyeeda ghayi geesin aba Diro ea Sidoni, gajea goola gwaduukuuna nea gookwa guniyajeega ak goobiitpiida deareeda. 14Nea abeeda gayghoamu ghamilikghta girgweaksiinda Diro ea Sidoni ea ghang'aleagwa. 15Nea ang'iing'i Gapernaumu, gigasayi adiing'da geaw ea hita humng'eeda? Gajeahiing'daneey ea hita uuta ng'eanyiida. 16“Siida aleeyseegwa iit, gooleeysean iit aniini, nea dea heawaneegwa, ghaheawanaan aniini, nea dea heawanaan ghaheawa dea ghayi ajeakneani.”

Biiknooda fuga alaadam ea damanamughuush

17Gabiigu fuga alaadam ea damanamughuush nea gahoosan, nea gwayeena, “Ng'utamiida, eara meangeenda ghoawal gheanyangaasa aba gheawungaagu!” 18Gwayeesha saawa, “Ghaadaahaanyi Shataani nea ghang'adaana humng'eeda gawuurji dadamandeeda. 19Asi ang'ula, neagoonyeegwa gheambalmeeda jea ooleapsiinana ng'eanyi ichipkeega ea udagilbajeega, ea uurda jea oopalana weajoocheanda; nea manda gichea gwahisseegwa. 20Asi adiidu goohoosanyi aba gidawalda gheang'deang'wa meangeenda, ahoosana aba gideaba sing'waar gheawungeagwa aba humng'eeda.”

Hooseaneega Yesu

(Mat 11:25-27; 13:16-17)

21Aba damandida goohoosan Guroorooda Ghaydit ak gwayi, “Geabadiischooweey Bwaabwa, Ng'utamiida bea humng'eeda ea ng'eanyiida, aba gideaba gifunyi ng'asheesu fuga mideawa weaghuumeeda ea gea mideawa fughareenga ak giihiimsi diibiga manang'i; Asaha Bwaabwa, ada gida igassiidi gil. 22Haleanjeeda sean nigoonan Bwaabwa; ak ea manda siinal Orjeeda geaghus Bwaabwa, ak ea manda siinal Bwaabwa geaghus Orjeeda ea siida wassean gasa Orjeeda goohiimsa.” 23Gwayamsa geaw ginealangaaschi ak goobalool aba makcheameeda nea gwayeesha, “Ghang'wana gheanyanga dea ng'asheega oadaayi agooga! 24Aba gideaba geayeeshiineegwa, sibanga ea sugoodiga ghayi gagasa ghwadaah ng'asheesu oadaayiin ak ea mwadaaha, nea gagasa ghwayiiy gea oayiinyi ak ea mwayiinya.”

Gida sigala siida miy bea Samariya

25Hean ghamiinaada diinagiida ak gwasimsim nea gwayeesha, “Giinealshoocheanda, gay dasin naaha iijea danyas eaweega manda muudeanooda?” 26Gwayeesha niny, “Geang'waar naaha aba jeeda deaweeda? heapi giisoamwandiin?” 27Ghwasha nea gwayeesha, “Bwariinya ASEETA was Ng'utamiidaang'u aba gurooroadaang'u sean, ea aba jeadaang'u sean, ea aba uurdaang'u sean, ea aba fughareadaang'u sean; ea giischeewoocheandaang'u gawuurji gida ibwariiydi geaw.” 28Gwayeesha niny, “Asi girgu huumwa; una sina ng'asheesu, abeeda gaynyasa giibinda.” 29Hean gagasa ghoahiimda doobiiwnataanyi ak gwayeesha Yesu, “Neada giischeewoocheandeanyu ea ng'eaha?” 30Ghwasha Yesu nea gwayeesha, “Ghayi ghwararang'aana sih Yerusalemu nea gawa Yeriko, ak goobissa geatinga mareanghooga, ak geareat hang'weaka nea geabwar, ak gaweay nea gwanung'usa heeda nea niriikghta ghami. 31Aba gheamamda ghwararang'aana naweedida ashoohoocheanda diineeda Yahudi; dea siidida ghwasajaadawa, 32eara siispa Lawi was bareanyeanda gweadu naweeda, ama hita hooweani ghwadaah ak ghwasajaada. 33Ghwahidu siispa Samariya was bareanyeanda, gweadu naweeda ama hita hoowa mida siidideani; ghwadaah ak ghabwayda, 34gaweesa ak ghwayeasha deaneaduutka nagheeda nea ghwayiin difaayi ak ghwarat ama hit goodiing'da badayda digeeda ak ghwaat ea ghoahiita gheeda roocha rabasta ak ghoarear. 35Iimuchu gageanu lapiyeeda siguura dinaari iyeenya ak ghoadaw siida bea gheeda ak gwayeesha, ‘Areara siisi, ama shoada gil aba giireerda, abeeda gaydaanyiit iyeabiigu.’ 36Iing'ulayi heapi aba jeedeaba fiisu asamwaguun, giischeewoocheandeaba siisi abissa geatinga mareanghoogean aneeda?” 37Gwayeesha, “Dea ghwanyawa bwayda gil.” Gwayeesha Yesu niny, “Eara ang'iing'i una ak gisindunu.”

Yesu gabareasa Marta ea Mariya

38Iidu nea gudeenda naweeda, gaweay ak ghwahita jeemba gharang'i, mida gatmooni siguura Marta, ghwadeapta ak ghwaat Yesu gheanyi. 39Abeeda gwanda hutpa ghaamwat siguura Mariya, apteada aba madeeda Yesu nea gooleeysiit giinealshoadaanyi. 40Nea abeeda gwadeawiit Marta muuchi aba gadiyoojiga saang'a; gaweesa niny ak gwayeesha, “Ng'utamiida miduupi gideaba ghwanung'wanaan hudiyya gadiyeeda nea gabwageawi? Rukusiina ghwaan ghaweadan.” 41Ghwasha Ng'utamiida nea gwayeesha, “Marta, Marta gihashi nea giideawiidi aba ng'asheega saang'a; 42gidasigasa ea agi ak ghwahit. Mariya ea niloat gidamiy majeamu eegeandeawa.”

Currently Selected:

LUKA 10: BG15

Highlight

Copy