GIING'EETA 9
9
Neajeeda ASEETA sea Nuhu
1Iidu ghoadaw ASEETA Nuhu ghawooda sea orjoagaaschi, ak gwayeesha, “Ajiila ak ghoasaang'ayiichi, ak ghoanyiichi ng'eanyiida. 2Gayghoawaleagwa diyeanga sean, ea dariidaka humng'eeda, ea gilinyoo gabadiina jeeda ea ghweayeega sean bea basooda; suh gajoombala. 3Diyeanga sean mideawa eaweega weelweeli gayghoah hamiteang'wa; gawuurji gidaghayi eagoondaneegwa eara seenga nyawiiri, geagoonyeegwa haleanjeeda sean. 4Ak ea adoayaaji banyeega guuyi sea foojeanda aba gideaba foojeanda eaweega. 5Nea foojeandeang'wa was eaweega aba huumwa gaydawalda; dea giliwas diyeayda ea dea siida; ea dea orjeeda gheamata siida gaydagasa eaweega siida. 6Siida ahiida foojeanda siida, gayghoahiida siinuut foojeandaanyi; aba gideaba ASEETA ghayi gwasin siida aba ratoadaanyi. 7Asi ang'iing'i, jiila ak gisaang'ayiidi, jiila ghwasaang'ayiit aba ng'eanyiida.”
8Ng'ata gwayeesha ASEETA Nuhu sea orjoagaaschi, 9“Ng'ula, gaydasin neajeedeanyu sea ang'iing'i ea jeacheangaagu, 10ea gilinyoo ea diyeayda gil indeawi, dariidaka, ea diyeanga siweama, ea diyeanga sean mida muunda ng'eanyiida, heeta indeawi sean aba jeeda maleambooda. 11Gaydasin neajeedeanyu sea ang'iing'i, dea gideaba maygudu dabiikta dalas uhuuda diyeanga sean aba roopta, ak ea maygudu gwanda roopta jea gwanuus ng'eanyiida.” 12Ng'ata gwayi ASEETA, “Nih gwadeagooda neajeeda aayiinnyi dageascheedeanyu ea daang'u ea diyeanga sean mideawa eaweega heeta indeawi, aba seaygoojiga sean jea ghwahidu: 13Gaydayiin ghuweang'deanyu jeeda shamooghooda, ak gayghoah gwadeagooda neajeeda aba dageascheedeanyu ea dea haleanjeeda sean bea ng'eanyiida. 14Iyeanung' ghwahidu shamooghuutka badayda ng'eanyiida ak ghoadaayi ghuweang'da aba jeeda shamooghuutka, 15gaydaapkaat neajeedeanyu mida dageascheedeanyu ea deang'wa ea dea gilinyoo gawoos diyeayda nyooh gwandeawa eaweega ea saseeda; ak ea maygudu gabiigu beega gicha ak ghwaroabwan roopta jea gwanuus diyeanga sean mideawa eaweega. 16Damanda mideewa ghuweang'da jeeda shamooghooda, gaydadiiw uhuuda ak geang'ulayi ak ghaapkaachi neajeeda manda muudeanooda mida dageascheeda ASEETA ea dea diyeanga sean mideawa eaweega mida badayda ng'eanyiida.” 17Gwayeesha ASEETA Nuhu, “Nih gwadeagooda neajeeda ghayi easinyi aba dageascheedeanyu ea gilinyoo gwandeawa eaweega mida badayda ng'eanyiida.”
Nuhu sea orjoagaaschi
18Orjooga Nuhu riteawa jeeda maleambooda Shemu, ea Hamu, ea Yafet. Ak gwaji Hamu Ganaani. 19Fiisu assamwaguun orjooga Nuhu gil; gwaji fiisu buuneeda ea ghwanyiit ng'eanyiida.
20Nuhu abeeda niny siida madeeda bwar ng'eanyi. Ak gwahista sabiibu; 21ak ghwali difaayi, ak gaboogit, ak gwalil nea dawiish aba jeeda maheemajeandaanyi. 22Iidu ghwadaah Hameeda was ghweanda Ganaani dawiishnata ghwaan, ak gwarukusa orjooga ghaamwat asiyeenya mida jarooda. 23Ng'ata gageanu Shemu ea Yafet hang'da, ak goong'ooysa hamarjoojiga nyaawa ak ghabeawa bwadaw ak gookwa dawiishnata ghwaan; nea ghwasach ghaat, ak ea miighwadaah ghwaan nea dawiish. 24Iidu nea ghang'eada Nuhu booktuumeadaanyi gwajeeng'u gidanisin orjeedaanyi mwanang', 25gwayi,
“Simwaashta Ganaani;
ak gayghoah Ganaani soomjeanda soomjooga orjooga ghaamwat.”
26Amang'ata gwayi,
“Eakghaambiida NG'UTAMIIDA was ASEETA Shemu;
ak ghoah Ganaani soomjeandaanyi.
27Gagasa ghoahaat ASEETA Yafet
ak goobiida jeeda maheemajeega Shemu;
ak ghoah Ganaani soomjeandaanyi.”
28Iing'ata roopta haw goobiida Nuhu ng'eanyiida gweanyeew bughalaji samwagu ea haradam ea damanamughuush. 29Gweanyeeka sean bea Nuhu ea bughalaji shageash ea haradam ea damanamughuush; ak ghami.
Currently Selected:
GIING'EETA 9: BG15
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.