GIING'EETA 7
7
Roopta haw
1Ng'ata gwayeesha NG'UTAMIIDA Nuhu, “Una jeeda maleambooda, ang'iing'i sea fugeaba gheang'u, aba gideaba naadaayi gideaba guwoosi doabiiwaat aba madeedeanyu aba jeedeaba seaygeani bea ghamneawean. 2Geanda diyean iyeenya niba ispwa, miyaasiin was jurukta ea gheamata; ea diyeanga mii miyaasiin nung' gabadiina iyeenya, jurukta ea gheamata; 3ea dariidaw damanang'wan bea humng'eeda badiina iyeenya, jurukta ea gheamata, ak ghaghu heeluutka nyaawa aba badayda ng'eanyiisean. 4Aba gideaba iing'ata askwearjooji ispwa gaydanung' ghwahidu roopta badayda ng'eanyiida askwearjooji haradam eawa ea askweari; ak abeeda gilinyoo gwandeawa eaweega gaydageandeawa badayda ng'eanyiida.” 5Hean gwasin Nuhu ng'asheega sean rukusa NG'UTAMIIDA.
6Abeeda Nuhu gaba gweanyeew bughalaji lah damanda roabwana roopta haw bea guldeayda aba badayda ng'eanyiida. 7Gawa Nuhu jeeda maleambooda sea orjoagaaschi ea gadeemga orjoagaaschi, nea gamng'awa guldeayda roopta haw. 8Ea diyeanga miyaas, ea diyeanga mii miyaas, ea dariidaka, ea gili wasean badiina jeeda aba ng'eanyi, 9gabadiina iyeenya iyeenya, jurukta ea gheamata ak goodeayi sea Nuhu jeeda maleambooda, gawuurji gidarukusiinda ASEETA Nuhu. 10Ng'ata eawooji ispwa ghwaroabwan roopta haw aba badayda ng'eanyiida.
11Iimuchu nea gaba Nuhu gweanyeew bughalaji lah, sheedeaba iyeenya, nea askwearjeandeaba damanispwa bea sheeda gil, gwasim geat beega mida uuta ng'eanyiida ak ghwajaada seawuutka humng'eeda. 12Ak ghwaroabwan aba badayda ng'eanyiida askwearjooji haradam eawa ea askweari. 13Eaweedida gawa Nuhu jeeda maleambooda sea orjoagaaschi Shemu ea Hamu ea Yafet, ea gatmooda Nuhu ea gadeem samwagu bea orjoagaaschi, 14gaweay saawa jeeda maleambooda sea giliwas diyeayda aba heeluutka nyaawa, ea dugwa sean aba heeluutka nyaawa, ea diyeanga badiina jeesinga aba badayda ng'eanyiida aba heeluutka nyaawa, ea giliwas dariideanda aba heeluutka nyaawa. 15Hean goodeayi sean sea Nuhu jeeda maleambooda, gabadiina iyeenya iyeenya gilinyoo gwandeawa eaweega. 16Gaweay jeeda maleambooda, gilinyoo ea diyeayda gawuurji gidarukusiinda ASEETA niny; ng'ata ghwajap NG'UTAMIIDA gidaghuuta.
17Ghwaroabwan askwearjooji haradam aba badayda ng'eanyiida; ghoahaada beega, ea gagatkat maleambooda, ea gwaheeli ng'eanyi. 18Hean gwaheedu uurda beega aba seang'ayda aba badayda ng'eanyiida; ak gwaneayi maleambooda aba badayda beega. 19Ghwasaang'ayiit beega muuchi aba badayda ng'eanyiida ea gwadukuta giijeega geawi mida jeeda ng'eanyiida; 20ghwasaang'ayiit beega dukuta giijeega, ea gageanu geatin damanamuut aba geawunda. 21Ak goosha diyeanga sean weelweel aba badayda ng'eanyiida, dariidaka, ea dugwa, ea diyeanga, ea hawanyoojiga diyeanga sean mida badayda ng'eanyiida, ea buuneesean; 22ak gameewa diyeanga sean gisa jeameeda sareenuuka. 23Ng'ata gwaduulu gilinyoo gwandeawa eaweega mida badayda ng'eanyiida, buuneeda ea diyeanga ea diyeanga badiina jeesinga ea dariidaka humng'eeda; geeduulu sean aba badayda ng'eanyiida. Ak geapuut Nuhu ak ghwahit, sea fugiga mideayeesa jeeda maleamboodean. 24Hean goobiida beega badayda ng'eanyiida eawooji bughala ea haradam ea damanamughuush.
Currently Selected:
GIING'EETA 7: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.