GADIYEEDA GIIJASOODIGA 3

Giiheapta siida badeeda

1Ng'ata gaweay Betaro ea Yohana gheeda sibata ASEETA damanda simwaasha ASEETA nea gaba aseeta shageash. 2Hean geesareenu siida badeeda ng'eada deaghayi sijiila, nea iissa gamuchu ak geayiin gidaghuuta gheeda sibata ASEETA siguura Gidaghuuta miy ak gamus haleanjeeda sisapa geadi bea ghadooweeda aba heeda fuga weay jeeda gheeda sibata ASEETA. 3Iidu nea ghwadaah siidida Betaro ea Yohana nea ghwariikghta gaweay jeeda gheeda sibata ASEETA, gamus eataw haleanjeeda sisapa geadi bea ghadooweeda. 4Ng'ata goohang'ooysa Betaro ghaang' niny sea Yohana, ak gwayeesha, “Heapi ng'uleasa.” 5Goofursa geaw saawa, nea ghaghay gilijea ghwanyas gil aba heanyaawa. 6Ghwalamda Betaro ak gwayeesha, “Aniini meandeawani lapiya ghana dahaabu, ak gaydagoonyi gideandeawi; aba gheawunga Yesu Gristoyda Nasareti, ng'eada ak guwi.” 7Ng'ata ghoang'waay aba geatinda dugwa ak gagatkat ghamiinaada; deagheata ghwanyas geeshangaaschi ea gheatkweaka geeshangaaschi uurda. 8Gootkweala ng'eanyi ak ghamiinaada ak gawa jeeda gheeda sibata ASEETA nea goodeayi saawa, nea gootkwealeada aba hooseaneega nea gwaduumsheesa ASEETA. 9Nea abeeda ghwadaahaada buuneesean gidaweeda siida, ea gidaduumsheesiinda ASEETA, 10gwajeeng'u buuneeda gideaba nih siidida eawoojisu musiisachi abiita ghuuta gheeda sibata ASEETA siguura, Gidaghuuta Miyiin; hean ghabeal nea ghahamng'eanyi aba ng'asheega bussa siidida.

Gidargweachta Betaro aba jeeda gheeda sibata ASEETA.

11Damanda neawsiina geaw siidida Betaro ea Yohana, gwasalda buuneesean gaweay heanyaawa aba doodooni siguura doodooda Sulemani nea ghahamng'eanyi. 12Daah Betaro fugiga goorgweaksa buuneeda, “Ea fuga Israeli, anda agooga ghahameagwa ng'eanyi aba ng'asheanji, ak ghwasaan anda goong'uleasa, nea ghoaghanyi gideaba siisi ghoahaap uurdeanya ghana doobiiwnateanya ak geenung' gawa? 13ASEETA Abrahamu ea Isaka ea Yakobo, ASEETA ghweanigaasa, nighaambiit soomjeandaanyi was Yesu ak siisi ea dea ghayi ooyiinyi geatinga fuga hees gil ak goodardeaysi aba madeeda Bilato, eara aba damandida gasa gwasiksiina ninyiin. 14Amadu ghoashaang'nyi dea Ghaydit was dea Asagi Doabiiwaat, ak googasayi siida nuusa buuneeda eegooneegwa, 15ak goonuuschi Siidida goona eaweegean, ak gooduudu ASEETA aba jeeda miyeeda. Ak aseasa geawooschi muushoodigeaba ng'asheanji. 16Nea gheawungaaschi, ak aba masaweega aba gheawungaaschi, ea niidaw siisi majeeknata was siida noadaayi ak ghoanali; nea masaweegiga sinyasa naweeda Yesuun ea niidaw siida majeeknata hit aba madeedeang'wa oogasean.

17“Asi ghamneawa, fuga eaduupcheewi, ghoanali gideaba iissa goosinyi ng'asheega aba leendeeda, gawuurji gida sinda fuga ahaaghwaneegwa. 18Nea ng'asheanda ghayi bay ghwaramoar ASEETA aba ghuusiga sibangaaschi, nea gideaba Gristoheani gaygwasawana gil ak ea nisa. 19Asi aduukuunana, ak goobiikti ayamni geat, ak abeeda geegeanda riing'eegeagwa, ak abeeda ghwahidu damanda hawdeayda jea gwaleabu heeda Ng'utamiida, 20ama abeeda goojeagu Gristoyda ghayi siloat aba badahuukeagwa, was Yesu, 21was dea gasa goobiida humng'eeda ea ghwahita damanda jea eang'eada ng'asheega sean ghayi rugu ASEETA aba ghuusiga sibangaaschi ghaydidi ghang'eada dea waas. 22Aba gideaba gwayi Musa, ‘Ng'utamiida was ASEETA gaygageanu sibaneeda aba jeeda fuga ooduupcheewi gawuurji gidaloatanaan. Ak gooleeysiit niny aba ng'asheega wassean jea gwarukuneegwa. 23Ak abeeda giliwas sih meeleeysiina iit sibaneeda gajeenuus gwaheeli buuneeda.’ 24Nea sibanga sean balool, ng'eada Samweli ea gea duubu geeshtaanyi, earaga gwarugu iiteaba askwearjoojisu. 25Agooga goowooschi orjooga sibanga ea heeleesiinda ghayi adaw ASEETA ghweanigeagwa, nea gwayeesha Abrahamu, ‘Aba jeataang'u gayghwanyas fuga sean bea muunda ng'eanyiida ghawooda.’ 26Iidu nea niduudu ASEETA soomjeandaanyi, goojeakta niny gaweesa fuga madeeda, ak abeeda gabadiischeesa giliwas sih aba jeedeang'wa arinana jeeda munyasnacheekeagwa.”

Currently Selected:

GADIYEEDA GIIJASOODIGA 3: BG15

Highlight

Copy