Mariko 8

1Mikonu ilya lyakusandia lingi isyamu iingi lya vandu, nawo veeworee shoonga ya ilya ndi. Nae kavaanga vanalosho vamwi kavaia: 2Navavyo̱ mmuu kiimba kya vandu va, fulya vansinda kwakwa mikonu iraru sele vataare kindo valya. 3Na kwakooya navaotoṛa kuri vaende kyeń kwawo vataare kindo vakomba, vamamiaa ifo shień! Na kiindi kyawo vaukie kwaasha. 4Vanalosho vamwi vakamwaṛua: Aukaań kwi nndu amakii iwuurusa vandu va na shoonga kunu bateń! 5Kavauṛa: Mmikate inga muwore? Vakamwia: Ni mfungare. 6Kavavasa isyamu lia likaa rembo. Kawaria mikate ilya mfungare kaana Iṛuva. Kaifukyafukya kaniingia vanalosho vamwi vavaavie. Vakaavia isyamu lia. 7Lingi veeworee na tukunga twaangu. Katuniinga mboṛa kanumbua: Na itu vaavień. 8Vakalya vakawuura. Vakasaṅiṛia nsaaṛo ulya undesaa ukaishua mikusha mfungare. 9Na vandu valya veekee sha fiku fiini. Kavaniinga muumu vaende.

10Lia eni kasaama ngalaveń andu emwi na vanalosho vamwi kafika miingoń ya Dalimanuta. 11Vafarisayo vakanshea vakabooka ivingana nae. Vakaṛuya myorusie yukie iṛuvewu kwamwi veemweleliaa. 12Kanaria ifo nrimiń wamwi kanumbua: Naamu ki ili kishuku ki kikee iṛuya myorusie? Nkya dede namuia: Kishuku ki nta kyoruswaa myorusie ndi. 13Kavatia-wo kaaṛukia ngalaveń kaṛuka kwa kulya.

14Vanalosho vamwi vakakooya vanrekyo̱ iimboo mikate ya kishawu. Na ifo ngalaveń nta kindo kiifo kita nkate umwi tubu. 15Nae kavaikimba eenumbuaa: Manyiń mukusembeke ndooka wa Vafarisayo na ndooka wa Herode! 16Vakavingana wo veni na veni: Mfulya titarie mikate. 17Na Yesu kamanya kavaia: Naamu ki ili mukee ivingana kya fulya mutarie mikate? Mwamaaṛukio̱ ana mwammanya ndi? A ngoo tanu nshuumu kumande alli? 18Moore miso mutalolie. Moore marwi muteesile. Ana mukikumbuye ndi? 19Lia nndeavia vandu valya fiku firaanu mikate ilya iraanu, a mikusha yaishua fisaaṛo filya fa fibeṛeshu ni inga? Vakamwia: Ni ikumi na ivili. 20A lia nndeavia valya fiku fiini mikate ilya mfungare, mmikusha inga indeishua fisaaṛo filya findesaa? Vakamwia: Ni mfungare. 21Nae kavaia: Niikai mutandeitumuso?

22Numa vakafika kulya Betisaida. Vakamwendee nndu ndoń vakantereva ambaani. 23Kawara uko lwa ndoń ulya kanrwaa wooṛo ya muṛi. Kamishia mare misoń amwi. Kamwekeṛia maako amwi kamwuṛa: Kulolie kindo? 24Nndu ulya kataṛambua miso kanumbua: Llolie vandu da, kake vakee sha miri ikee yenda. 25Llyo amwekeṛia maako lingi misoń amwi. Nae kalla koroo kashia kalolia findo foose na baa. 26Nae kavvikia muumu aende kyeń kwamwi kamwia: Manya kutaakie nta muṛiń.

27Llyo Yesu akwimboo ariani na vanalosho vamwi. Vakafika fimiṛiń fikee kufui na kulya Kaisaria ya Filipo. Neefo shień kauṛa vanalosho vamwi: A te vandu vanumbuaa nkee i? 28Vakamwaṛua vakamwia: Veefo vanumbua: Iwe ni Yohane mbatisa, na vengi: Iwe ni Elia, na vengi: Iwe ni umwi wa vaauya fisuku. 29Nae kavauṛa: A ini munumbuaa niń nkee iń? Petiro kaaṛua kamwia: Iwe ni iwe Kristo. 30Nae kavaikimba, kaaṛa vataie nndu ikyo kyamwi.

31Numa kabooka ivalosha sheeli kyawara Mwana wa nndu aliswa ukiva wiingi vvandu na ilewa vvakohani vanini na vaaṛia va mitisiṛie na iwalwa, na numa ya mikonu iraru aṛuke. 32Kavaia kirero kyo na baa. Petiro kanrwaa kyaanya kannaya. 33Nae kaaṛukia vanalosho vamwi kavalla. Kanaya Petiro kanumbua: Uya numa yakwa Satana! Amu iwe kukee ikusaṛa fa Iṛuva ndi, mfa kivandu!

34Kavaanga isyamu andu emwi na vanalosho vamwi kavaia: Nndu kakunda ishisoṛa niń, kyawara akwimi mifurie yamwi, akurike nsalaba wamwi ashisoṛe. 35Amu nndu woose akundie ikiṛa muu wamwi auretaa. Na ulya woose asuaa muu wamwi kiimba kyakwa na kiimba kya nrumi ilya shisha ya Iṛuva, ito aukiṛaa. 36Ana nkiki kyelekaa nndu, kwakooya awaraa isanga lyoose na mbusha kareta nrima wamwi? Ana nkiki nndu aniingiaa ataue nakyo nrima wamwi? 38Amu nndu woose ashiiriaa sonu na firero fi fakwa kari ka kishuku ki kya waaisi na mareko, na Mwana wa nndu amwiriaa sonu, ili ashaa na unini lwa Ndee andu emwi na vamalaika vasongori.

Currently Selected:

Mariko 8: RWK72

Highlight

Copy