Mariko 3

1Numa kaaka lingi ifo numba ya iterevia. Neefo eeifoo nndu wa uko lutoṛokombye. 2Nawo vakallaya si valle, akwaa ankiṛaa nkonu wa Sabato, amu vandiinge. 3Kaia nndu ulya wa uko lutoṛokombye: Kwimboo kusalale io karikari! Kavauṛa: Nkisumani nkonu wa Sabato itana fisha ana ni itana fikasha? Ni ikiṛa muu wa nndu ana iuwaa? Nawo vakasia do. 5Kavalla koroo taari toose aworwa ni ituṛuka kalolia unaari kiimba kya uumu lwa ngoo tawo. Kaia nndu ulya: Seṛeesa uko lwafo! Nae kaseṛeesa uko lwamwi lukava lingi usha. 6Lia eni Vafarisayo valya vakasomuka vakaenda kyama andu emwi na vandu va Herode vakalliya kyama kya immamisa.

7Yesu kalakana nawo ye na vanalosho vamwi vakaenda na taari ya nruveń. Vandu veengi vakansoṛa vauka Galilaya na Yudaya 8na Yerusalemu na Idumaya na kwa kulya ya Yoridane na taari ta Tiro na Sidon, nsyamu nini. Nawo vandeita mboni ta mitanie yoose andetana vakanshea. 9Kaia vanalosho vamwi, ngalava ilya shinnya ishe kufui nae, amu isyamu lia litashe imwidiṅa. 10Amu ifi akiṛa veengi, na valya veeworee mavavio awo vakaraya mwaanya wa inserikia, amu vambaani. 11Neeli mimuyo ilya mikasha indellolia, ikawa si mbele yamwi iishiṛaa iinumbuaa: Iwe ni iwe kukee Mwana wa Iṛuva! 12Nae kavakandara nnu, amu vatanrambue.

13Kyasia karwa uroń kavaanga valya avakundie ye muni. Nawo vakasha na io akai. 14Karwaa vandu ikumi na vavili vave andu emwi nae, amu avarami indekwanisa mboni. 15Lingi vave na finya ya yumbuta mimuyo mikasha. 16Karwaa-fo valya ikumi na vavili. Kafukiya Simon irina lyamwi Petiro. 17Na Yakobo mwana wa Sebedayo na Yohane mwanamae wa Yakobo, wo kavafukiya irina Boanerigesi, nkimwi na vana va kiṛuṛumo. 18Na valya vengi ni Anderea na Filipo na Baritolomayo na Matayo na Toma na Yakobo wa Alufayo na Tadayo na Simon Nkananayo 19na Yuda Isikariote yye ashendiinga.

20Numa kaenda kaaka numba. Vandu vakakusandia fingi mamwiingi. Nawo veni nta ilolia mwaanya wa ilya shoonga. 21Ifi valya va kyeń kwamwi vandeita mboni tamwi, vakaenda indewwara. Amu vandenumbua: Ankilyo̱ ni uṛango. 22Na vaaṛia va mitisiṛie vandesama vauka Yerusalemu wo vakanumbua: Aworwa mBelisebuli, na kwa finya ya nnini ulya wa mimuyo mikasha akee yumbuta mimuyo mikasha. 23Nae kavavaanga karera nawo eevakabiaa sumu kanumbua: A Satana naare amakii yumbuta Satana ungi? 24Na kwakooya umangi lwakuraua na ikabana lo weni na weni, umangi lo lusalalaa ndi. 25Na numba ikankuraua yo sheni na sheni, numba yo isalalaa ndi. 26Na kwakooya Satana akwaṛuka kakukaba ye muni, amakii ikaa ndi, aṛoṛokaa kulu. 27Nta eefo nndu amakii yaka numba ya nndu awore finya na iwara fiya famwi kitaare afinga mbele nndu ulya awore finya ndi. Kammaa llyo awaraań numba yamwi na finya. 28Nkue namuia: Mareko woose a vana va vandu alilyo̱o na nrumu tawo toose vakee irumaruma. 29Kake kwakooya nndu aruma Mumuyo Nsongori na imwila, ito akooyaa itio̱ lya mareko kutu ndi kumande miṛeṛe. Kake ireko lyo linkayaa miṛeṛe. 30Andevaia kuro kiimba kya lia vandenumbua: Aworwa mmumuyo nkasha.

31Mae na vanavamae vakasha vakasalala wooṛo. Vakanrumia nndu awaange. 32Na isyamu lia likee rembo lillengetye. Vandu vakamwia: Yeyo wafo na vana vamaa veefo wooṛo vakee ikuṛuya. 33Nae kavaaṛua kavaia: A yeyo wakwa na vanavama wa ki? 34Kalla valya vakee rembo vallengetye taari toose kanumbua: A va yeyo wakwa na vanavama. 35Amu nndu woose atanaa mifurie ya Iṛuva ito yye mwanama na mfwama na yeyo wakwa.

Currently Selected:

Mariko 3: RWK72

Highlight

Copy