Mariko 15

1Kwankya ngama vakohani vanini vakafukya kikwena andu emwi na masiingo a vandu na vaana va mitisiṛie na vayakyama woose. Vakafinga Yesu vakankurika vakandenrambikia kulya kwa Pilato. 2Pilato kamwuṛa: Iwe ni iwe mangi ya Vayuda? Nae kaaṛua kamwia: Ni iwe kwanumbua. 3Na vakohani vanini vakamfingia findo fiingi. 4Pilato kamwuṛa lingi: Kwaṛuaa nta kirero se? Lla te findo fo fiingi vakee ikufingia! 5Ana nta yaṛua kirero lingi. Kikaṛiikisa Pilato.

6Neeli kisuku kinini kiifikaa, eevaboṛomuyaa mfungwa umwi, ulya vankundie wo veni. 7Eeifoo nndu eevaangwaa Baraba, eefingiee andu emwi na vaṛiingi. Na kari ka uṛiingi lo vakava vawaa. 8Syamu ilya ikarwa nafo ikabooka intereva avatanie sheeli eeishiviee. 9Llyo Pilato avaaṛua eevauṛaa: Naare? Mufurie mmuboṛomuye mangi ii ya Vayuda? 10Fulya eeishii sheeli vakohani vanini vandiinga kiimba kya imwiria iriso. 11Kake vakohani vanini vakakuria syamu ilya, sheeli llyo ṅwana avaboṛomuye Baraba. 12Pilato kaaṛua lingi kavaia: Ntaniaa ki uu mukee ivvaanga mangi ya Vayuda? 13Vakaṛoṛongya lingi: Nkabie nsalabeń! 14Kyasia Pilato kavaia: A ni ukasha lungalu atanie? Nawo vakaengeṛia nnu iṛoṛongya: Nkabie nsalabeń da! 15Kyasia Pilato eefuriee ikushiisa na syamu ilya kavaboṛomuya Baraba. Kavavasa Yesu akabwa na ngova. Numa kanrambikia andekabio̱ nsalabeń.

16Na vasikari vakankurika vakamwata ifo wooṛo ya numba ya mwitoṛo. Vakavaanga ikamba lyoose lya vasikari vakusandie-wo. 17Vakawika nseto utondoṛie vakaoka uṛeto lwa miinga vakawika nrweń. 18Vakabooka imwisana: Mangi ya Vayuda kia! 19Vakankaba ireko lya nrwe vakammishia manyiiri. Vakafwiṛia nri vakawwoya si na kisangu. 20Neeli vandemaa imweetia kuri, vakamwambua nseto ulya utondoṛie vakawika miseto yamwi meni.

Vakansomuta wooṛo vandenkabia nsalabeń. 21Vakakooya nndu eekee iira auka nremiń, nae nSimon wa kulya Kirene, nae nndee wa Alekisandiro na Rufo. Vakankabiṛia antaṛe nsalaba wamwi. 22Vakamunnde kumande andu eevaangwaa Goligota, nkimwi na Kiboṛoń kya nrwe. 23Vakafura inniinga mfinyo usaandi na nri wa inanga, nta iwaria. 24Vakankabia nsalabeń. Vakaava na miseto yamwi veekabiaa wuuku sheeli nndu woose arwaa ki. 25Kyasia kyeeri kya saa isaru llyo vankabia nsalabeń. 26Iifoo na mitisiṛie ya indiinga ye iitisiṛio̱o̱ kwa ule: Mmangi ya Vayuda.

27Vakansanda na fisoki fivili vakankabia nsalabeń andu emwi nawo, umwi taari ya uko usha na ungi taari ya uko lwamwi umuso. 28Kyasia llyo kindefika kirero kilya kiirerio̱o̱: Antalio̱ andu emwi na varekwa. 29Na valya veekee iira vakanruma veesenisasenisaa mirwe yawo veereraa: A ba! Iwe muburua numba ya Iṛuva na iitana lingi kari ka mikonu iraru! 30Kukiṛe ku muni kwaoloka nsalabeń! 31Mfo kuro na vakohani vanini vakanredia wo veni na veni andu emwi na vaaṛia va mitisiṛie. Vakanumbuaa: Andekiṛa vengi, nta imakii ikukira muni. 32Yye Kristo, yye mangi ya Isiraeli! Kyasia aolokeń nsalabeń alli kuri. Neese tilolie na imwirikia. Na akwaa vvalya veekabiee nsalabeń andu emwi nae vakamweetia.

33Ili indefika saa isasaru, ukawa llema urukefi loose kumande saa kyeenda. 34Na kyeeri kya saa kyeenda Yesu karosa ununga lwamwi na finya: Eli, Eli lama sabaktani? misendie yayo nkimwi na: Wui Iṛuva wakwa, wui Iṛuva wakwa, nki ili kwanshirea? 35Na kiindi kya valya veeselelee-wo vakaita kuri vakanumbua: Akee ivaanga Elia. 36Na umwi kaenda eerishaa kandennde kimiminda mura kakiishuṛa mura udooka. Kafingia irekoń kafura inrita eereraa: Shitień! Tille akwaa Elia ashaa imwolota-fo. 37Kyasia Yesu kaṛoṛo-ngya lingi na ununga unini kanutuka.

38Na isulia lia inini lyavanisie ifo numba ya Iṛuva likaranduka kuuka ule kumande si likava feenga fivili. 39Na nshili ulya wa vasikari eeselelee io andesumana nae ili andelolia anutuka kuro, kanumbua: Nkue nndu uu eekee Mwana wa Iṛuva dede. 40Veeyoo na vaka veeselelee-wo veellaa vakee kwaasha. Kari kawo eeyoo Maria Magidalena na Maria mae wa Yakobo mwanawo wa Yose na Salome. 41Iwo wwo veerianii nae lia akee kulya Galilaya na indundia. Veeyoo na vengi veengi varwe nae kumande Yerusalemu.

42Neeli kuve ukwawuń, na nkonu ulya ni nkonu wa ikusongosia, nto nkonu usoṛwa nSabato, 43kasha na-wo Yosefu wa kulya Arimatia, eekee nnini awore tikisi. Nae ni nndu averea umangi lwa Iṛuva. Kakaṛia kaaka kulya kwa Pilato kantereva vvili wa Yesu. 44Pilato kaṛiika ili andeita amfwa. Kavaanga nnini ulya wa vasikari kamwuṛa, akwaa amfwa kyaambo kyaasha. 45Neeli andemaa isunundio̱ ni nsikari ulya, kaniingia Yosefu nnyiṅa ulya. 46Nae kandeuṛa nseto wa bafuta kamwolota-fo. Kamwiṛina na nseto ulya kamwaṛa mbangeń ivashie iweń. Kabiṛingitia-wo iwe lya iraya mwaango wa mbanga ilya. 47Na Maria Magidalena na Maria mae wa Yose vakalla alya aṛikwa.

Currently Selected:

Mariko 15: RWK72

Highlight

Copy