Mariko 1

1Nrumi shisha ya Iṛuva sheeli indenndwa ni Yesu Kristo Mwana wa Iṛuva, indebooka kuri 2sheeli yatisiṛwa mmwauya kisuku ulya Yesaya: ”Manyiń niń nrumaa mumbele wakwa akwirie mbele, asongosie shia yafo“. 3”Lwifo ununga lwa nndu akee ivaanga ṅṅaloń: Songosień shia ya Nndumi! Seṛeeseń miko yamwi!“

4Nkuri Yohane mbatisa andesha eebatisaa vandu kulya ṅṅaloń. Kakwanisa ubatiso lwa iilashika, amu vatio mareko awo. 5Vakanshea va uruka loose lwa Yudaya na va Yerusalemu woose vakabatisyo yye kulya mureń wa Yoridane veerambuaa mareko awo. 6Na Yohane eeṛee miseto myoke na mafuli a ngamia na kitati kya shoni kisiń kyamwi. Na shoonga yamwi ikee nrie na uki wa mbakoń. 7Kakwanisa eenumbuaa: Ito ashaa numa yakwa awore finya kita niń. Nań nta nkaṛiaa ikwinika neelelise ngyuṛuumu ta faaru famwi ndi. 8Kyakwa niń ni ibatisa na mura, kake ye ashemubatisaa na Mumuyo Nsongori.

9Na mikonu ilya llyo Yesu ashe auka Nasareti wa Galilaya kabatisyo ni Yohane mureń wa Yoridane. 10Neeli auka ifo mureń, kalolia iṛuvewu liiruukaa kalolia Mumuyo wa Iṛuva eemoolokyaa sha mbuku. 11Na ununga lukauka iṛuvewu lwireraa: Iwe ni iwe Mwana wakwa nkunde kushisenye.

12Lia eni Mumuyo wa Iṛuva kankurika bateń. 13Kakaa ifo bateń andu a mikonu makumi aani eelelyoo nSatana. Nae eekee andu emwi na mafisi a bateń. Na vamalaika vakandundia.

14Ili Yohane andemaa ifingwa, Yesu kasha Galilaya kakwanisa nrumi ya Iṛuva ya ifura 15eenumbuaa: Mikonu yamfika na umangi lwa Iṛuva lwansha kufui. Ilashikeń mirimiń mukakusura nrumi ii shisha.

16Neeli eeiraa mbaai ya nruva ilya ya Galilaya, kalolia Simon na Anderea mwanamae wamwi veeolotaa mireyo ifo nruveń. Fulya wo veekee vareya makunga. 17Yesu kavaia: Oṛeshoń shisoṛeń! Nań mmuaṛuaa muve vareya vandu. 18Na lia eni vakatia-wo mireyo yawo vakansoṛa. 19Neeli andeenda mbele kinnya, kalolia Yakobo mwana wa Sebedayo na Yohane mwanamae wamwi. Nawo veekee ngalaveń veesongosiaa mireyo yawo. 20Lia eni kavavaanga. Vakatia nde yawo Sebedayo ngalaveń andu emwi na vaṛundi. Vakaenda vakallatia.

21Vakawara shia vakafika Kaperinaumu. Neeli tindefika nkonu wa Sabato, kaaka numba ya iterevia kalosha-fo. 22Na vandu vaka-ṛiikiswa mmiloshie yamwi. Amu eekee ivalosha sha muni ivavaso, nta nsha vaaṛia va mitisiṛie ndi. 23Neefo numba yawo ya iterevia eeifoo nndu eeworwaa mmumuyo nkasha. Karosa ununga 24eenumbuaa: Nkiki toore nawe, Yesu wa Nasareti? Kwansha itireta! Tikwishi sheeli ni iwe i. Ni iwe Nsongori wa Iṛuva. 25Na Yesu kaunaya eenumbuaa: Sia do do mwuke! 26Mumuyo ulya nkasha ukansikasika ukaishiṛa na ununga unini ukamwuka. 27Vakawarwa ni utaṛawu woose vakauṛana wo veni na veni veenumbuaa: Nkyo ki iki? A ii miloshie miiya iwore finya yuka kwa Iṛuva. Akee ivavasa na mimuyo mikasha, nayo ikamwirikia. 28Mboni tamwi tikakwana ree koose urukeń loose lwa Galilaya na miyanuń.

29Vakasomuka numba ya iterevia vakafika numba kwa Simon na Anderea variani andu emwi na Yakobo na Yohane. 30Na mae wa nka wa Simon eelelee kiraań araywa ni iseńu. Na lia eni vakamwongoya mboni tamwi. 31Kanserikia kawwara uko kamwimboo. Na iseńu lia likava isha. Nae kavaṛundia.

32Neeli kundeva ukwawuń na saa immaa yakia, vakamwendye woose valole na iwo vaworwa mmimuyo mikasha. 33Na muṛi woose wikusandyee io mwaangoń. 34Nae kakiṛa vandu veengi veelolee saka ta mikae miingi. Kaumbuta mimuyo mikasha miingi eeiimaa iireraa, fulya imwishi.

35Neeli lya ndesi ngama kio kakwimboo kasomuka numba. Kaenda kyaanya kyamwi andu vatayo vandu kandeterevia-fo Iṛuva. 36Simon na vaaroe vamwi vakansaṛikia. 37Ili vandenkooya vakamwia: Vandu woose vakee ikuniya. 38Nae kavaia: Ndefoń teende kundo kungi fyunguń ifo fikee miyanuń, amu nndekwanisa-fo nafo. Amu ikyo nkyo kindeshinnde. 39Kawara shia kaenda eekwanisaa kulya Galilaya koose eeakaa ifo numba tawo ta iterevia na yumbuta mimuyo mikasha. 40Kashewa ni nndu aworwa ni ivave. Kantereva eefwiṛyaa nri si kamwia: Kwakunda kumakii ishiaṛua vve nsha. 41Nae kallilya kasaaṛa uko lwamwi kambaana. Kamwia: Mfurie, va nsha! 42Lia eni ivave lia likamuuka kava nsha. 43Kamwikimba eemwimaa na finya kansomuta lia eni. 44Kamwia: Manya kutaie nta nndu kindo! Endań kundekworusa nkohani ulya. Kuniingie na kindo kya iniinga Iṛuva kiimba kya ishia lyafo, kasa Mose avavasa, kive nkyo mirambuye ifo kwawo. 45Kake ili andelakana-wo, kabooka yongoya firero fiingi na ikwanisa mboni ilya. Na Yesu andekimakii lingi iṛua muṛiń wa vandu na baa ndi. Kakaa kyaanya andu vatayo vandu. Kake vandu vakanshea vauka taari toose.

Currently Selected:

Mariko 1: RWK72

Highlight

Copy