Matayo 23

1Kyasia Yesu karera na syamu ilya ya vandu na vaseṛo vamwi eenumbuaa: 2Kifumbiń kilya kya Mose waaṛia va fitabu vakee-fo rembo na Vafarisayo. 3Kyasia kilya kyoose vamuiaa kitaniń na ikiwara na ikiringa. Manya mutasoṛe mitanye yawo, amu vareraa vatatane kuro. 4Nawo vafingaa maṛio meemeri vakae-keṛya vandu vengi meeveń awo. Kake wo vabaanaa nta na nni ndi. 5Na mitanye yawo yoose vakee itana, naamu valolyo wandu da. Na fingova fawo vaṛaa ili veeterevaa vakafeelelisa, na mise ya miseto yawo ya yeeṛya vakayengeṛya. 6Na isaua firembo fa mbele andu a shoonga na fifumbi fa mbele ifo numbeń ya iterevya. 7Na iisanwa wandu ifo singiṛeń na ivaangwaa valosha vanini wandu. 8Kake ini manya mutavaangwa valosha vanini wandu, amu llosha wanu ni umwi, yye Kristo. Neeni mu woose mukee vana va nka. 9Na lingi manya mutavaange nndu Nde yanu kunu isangeń, amu Nde yanu ni umwi tubu, ni ito akee iṛuvewu. 10Manya mutavaangwa vaṛongoṛi! Amu ndongori wanu ni umwi, yye Kristo. 11Na ulya akee nnini kwanu ave mumuṛundya ini. 12Ulya akufunisaa ye muni akaa anyiiswa, na ulya akunyiisaa ye muni akaa ańiniswa.

13Ushi ini vaaṛia va mitisine na Vafarisayo, mukee vamakavili! Ini murayaa vandu umangi lwa iṛuvewu. Fulya ini mu veni nta mwakaa-fo ndi ana iwo vafurie yaka nta mutakee ivaotoṛya vaake. 14Ushi ini vaaṛia va mitisine na Vafarisayo, mukee vamakavili! Fulya mwawa vamiṛa numba ta misikeeti na kwa ukavili mukatereva fiterewo faasha. Kwa ikyo mukooyaa uumisyo lukee unini kya mmwasi.

15Ushi ini vaaṛia va mitisine na Vafarisayo, mukee vamakavili! Fulya ini mukee ilengetya nruva na si shuumu, amu mukooye-fo nndu umwi amulatye. Na ili mumaa inkooya, mukee imwanta mwana wa vayavaṛumu kita ini kavili. 16Ushi ini vaṛongoṛi midoń! Ini munumbuaa: Nndu kalya ikite na numba ya Iṛuva, kiwore mwaandu ndi. Kake nndu alyaa ikite na saabu ya numba ya Iṛuva, ankuumisya. 17Ini mukee varińani na vafu miso. A kinini nkingaki, nsaabu ilya ana nnumba ilya ya Iṛuva ikee ishiisa saabu ilya? 18Lingi munumbuaa: Nndu kalya ikite na kiraa kya iterevya, kiwore mwaandu ndi. Kake kwakooya nndu alyaa na nsimbika ukee kwa ule yayo ankuumisya. 19Ini mukee midoń! A nkingaki kinini, ni nsimbika ulya ana nkiraa kya iteṛevya kikee ishiisa nsimbika? 20Kyasia ulya alyaa ikite na kiraa kya iterevya, alya ikite nakyo andu emwi na foose feekeṛye-wo. 21Na ulya alyaa ikite na numba ya Iṛuva, alya ikite nayo kasandya na ito akaa-fo. 22Na ulya alyaa ikite na iṛuvewu, alya ikite na kifumbi kya unini kya Iṛuva kasandya na ito akikaaye.

23Ushi ini vaaṛia va mitisiṛie na Vafarisayo, mukee vamakavili! Fulya ini muniingyaa kyeenga kya ikumi kya findo fo fa kisaamu na fa ilorisa na fa ilunga shoonga. Kake mukatia filya finini ifo mavavasoń mfilya feelekyaa fa uumisyo na fa ililya na fa ikusura. Ifi fawara mutani kita itia na filya fingi mutafitie ndi. 24Ini vaṛongoṛi midoń! Mukee iirya vengi mbele, mukee imisha nrii, kake mukamiṛa ngamia.

25Ushi ini vaaṛia va mitisiṛie na Vafarisayo, mukee vamakavili! Fulya ini mukee isangya umbata na faasho kwa wooṛo, kake kari kayo fiishule soka na iṛemisa. 26Iwe Mfarisayo ndoń, sangya mbele kyaasho kari, Ilyo kiilaa na kya wooṛo.

27Ushi ini vaaṛia va mitisiṛie na Vafarisayo, mukee vamakavili! Amu muvakani na mbanga shaambe mboṛongo, nayo ikalolika kiwooṛo sheeli nshinuru, kake kari kayo iishule mafua a minyińa na makasha woose. 28Neeni nkuro da, mulolikye kiwooṛo sheeli mukee vasumani, kake kari kanu lwishule-fo ukavili na ureti.

29Ushi ini vaaṛia va mitisine na Vafarisayo, mukee vamakavili! Amu musongosyaa mbanga ta vaauya fisuku, lingi mwambikaa iṛikwa lya vasumani 30na inumbua: Kifo ise tiifoo kyeeri kya vaande yeru, tiilyaa kyama nawo kya iwaa vaauya fisuku ndi. 31Kuro mukee ikurambua mu veni sheeli mukee vana va valya vawaa vaauya fisuku. 32Kyasia neeni ishuṛeń kilya kinderewa waande yanu kya ngyukasha tawo. 33Mukee shoka na mawore a saru! Murishaa are uumisyo lwa yeeṛwa iriniń lya muro! 34Kiimba kya iki lleń mmurumyaa vaauya fisuku na vandu veeshi sewu na vaaṛia va mitisiṛie. Neeni iwo kiindi muvawaa na ivakabya nsalabeń na kiindi muvakabaa na ngova ifo numbeń tanu ta iterevya na ivaumbuta ifo miṛiń na miṛiń. 35Na kuro llyo muvavyoo nngyusao tilya toose mundetiirita ta vandu vasumani kuuka usao lwa Abeli ulya nsumani kumande usao lwa Sakaria mwana wa Barakia ulya mundewwaya kari ka numba ya Iṛuva na andu a irasya Iṛuva. 36Nkue namuia: Ifi foose fiviaa kishuku ki.

37Wui Yerusalemu! wui Yerusalemu! Muwaa vaauya fisuku, na valya kundevarumyo kwavakaba na mawe! Nsha keenga nallanga ishukuṛya vana vafo andu emwi sheeli nguku ishukuṛaa mawore ayo ikaasikia na maaro! Neeni mukalema fukyu! 38Lleń mukaa mutiywa numba ii yanu ikee irama. 39Kwa ikyo namuiań: Kuuka alli mukishilolyaa lingi ndi kumande munumbuaa: Eetikiswa ulya asha na irinalya Nndumi!

Currently Selected:

Matayo 23: RWK72

Highlight

Copy