Matayo 21

1Ili vandeserikya kufui na Yerusalemu, vakafika muṛiń uvaangwaa Betifage ukee uroń lua lwa misenifu. 2Llyo Yesu aruma vaseṛo vamwi vavili kavaia: Endeń muṛiń ulya ukee mbele yanu. Mukooyaa-fo nshungu wavikye na kyaashe kyayo. Ibo-ṛomueń musheendee! 3Na kwakooya eefo nndu amuuṛaa: Murwaa kwi? Mwień: Ni Nndumi afurie. Nae amwotoṛyaa. 4Na kiteveto kikava kuro, naamu kifike kilya kyeemaauywaa mmwauya kisuku ulya eereraa: 5Ień sambuṛa yo ya Sion: A ii mangi yafo yakushea na uwoo, ikee rembo mungo wa nshungu na kyaashe kya nshungu wingaa maṛio. 6Na vaseṛo valya vakaenda vakatana, sheeli Yesu andevavavasa. 7Vakannde nshungu ulya na kyaashe kyayo vakaala miseto yawo ifo mungo wa nshungu vakamwaṛutya-fo. 8Na syamu kinga vakaala miseto yawo ifo shień. Na vandu kiindi vakaminya maṛamba a miri vakaala ifo shień. 9Na vandu valya veekee mbele yamwi na valya veekee numa yamwi vakankabya nndoṛo veereraa: Osiana iwe Mwana wa Davidi! Eetikiswa ulya asha na irina lya Nndumi! Osiana iwe mangi ya iṛuvewu! 10Neeli andeaka kulya Yerusalemu, muṛi woose ukaushana ukanumbua: A nndu uu ni i? 11Isyamu lia lya vandu likanumbua: Uu yye Yesu mwauya fisuku ulya wa Nasareti ya Galilaya.

12Kyasia Yesu kaaka ifo numbeń ya Iṛuva kaumbuta valya veekee ikumbya-fo na yuṛya-fo woose. Kafuluta mesa ta valya veekee iilasha fesa na fifumbi fa valya veekee ikumba mbuku. 13Kavaia: Nkitisiṛe: Numba yakwa ivaangwaa numba ya iterervya, kake ini mwaiaṛua ikava mbanga ya fisoki. 14Llyo ashewa vvandu vafu miso na vakee manketenkete ifo numba ya Iṛuva. Nae kavakiṛa woose. 15Kake vakohani vanini na vaaṛia va mitisine ili vandelolya maṛiikiso wo na vana veekabaa mindoṛo ifo numba ya Iṛuva veenumbuaa: Tikiṛe, Mwana wa Davidi, vakatuṛuka. 16Vakamwia: Kwisile sheeli iva vakee inumbua? Yesu kavaia: Ee. Mwansoma se nta limwi kirero ki: Kaniń ka vana vannya na vakee yonga kwamaawutya tikisi yafo? 17Kavatia-wo kasomuka wooṛo ya muṛi kaenda Betania kandelala-fo.

18Neeli lya ndesi ngama eeriee shia ya yuya na kulya muṛiń kaliwa nsoto. 19Kalolya nri wa nkuu ukee mbaai ya shia. Kandeulla nta ikooya-fo kindo uwore kita maru meni. Nae kauia: Kukivikaa lingi nunda kumande miṛeṛe na miṛeṛe ndi. Na nkuu ulya ukauma lia eni. 20Ili vanalosho vandelolya kive kuro vakaṛiika vakanumbua: A kyava are ili nri uu wauma limwi nsi? 21Yesu kaaṛua kavaia: Nkue nkue namuia: Kwakooya mukusuṛaa Iṛuva mutaare inunua, nta ni iki mutanaa sha kya nkuu uu ndi. Na akwaa mwaia uro lu: Iṛuka ia kukai kundekweeṛa ifo nruveń, kyasia kivaa kuro da. 22Na kyoose muterevaa Iṛuva mukusurye, muniingwaa.

23Kyasia ili vandemaa ifika ifo numba ya Iṛuva eevaloshaa, kashewa vvakohani vanini na masiingo a vandu. Vakanumbua: Nkwa muumu wa ngata ingai ili kwatana findo sha ifi? Na ito akuniingye muumu to ni i? 24Yesu kaaṛua kavaia: Na akwaa nniń mfurie imuuṛa kirero kimwi: Mukanshiia, nań mmuiaa nkwa muumu wa i nkee itana ifi. 25A ubatiso lwa Yohane luukye kwi? Luukye iṛuvewu ana nkwa vandu? Nawo vakakuuṛa wo eni na veni veenumbuaa: Kwakooya tanumbua: Luukye iṛuvewu, llyo atiiaa: Naamu ki kitaare mwakusuraań? 26Na kwakooya tanumbua: Luukye kunu vanduń. Teeṛee wiingi lo lwa vandu. Amu woose valolya sheeli Yohane mmwauya fisuku. 27Vakaaṛua Yesu vakanumbua: Tiishi ndi. Nae kavaia: Na akwaa nniń mmuiaa ini sheeli nkwa muumu wa i nkee itana ifi ndi. 28Naare mukusaṛye? Eeifoo nndu eeworee vana vavili. Kaenda kwa ulya wa mbele kamwia: Mwana wakwa, nnu enda iṛunda mashoṛa kulya nndeń. 29Nae kaaṛua kanumbua: Neendaa ndi. Numa kakurra kaenda. 30Kaenda kwa ulya wa kavili kamwia kilya kyeni. Nae kaaṛua kanumbua: Ee nndumi, nkee yenda, nta ikyenda. 31A kari ka vandu va vavili nuungau andetana kilya kindesenya ndee naań? Vakanumbua: Ni ulya wa mbele. Yesu kavaia: Nkue nkue namuia: Vasańiṛya kyaalo na vaka va shia wwo vamubookyaa ini yaka umangiń lwa Iṛuva. 32Amu lia Yohane mbatisa ashe kwanu, alatya shia ya usumani, neeni nta ikunda imwirikya. Kake vasaniṛya kyaalo na vaka va shia wwo vakunda inkusura. Neeni ili mundelolya kive kuro, nta ikurra numa ana ikunda iilashika munkusure.

33Aranyiń sumu ingi! Eeifoo nndu muyanumba, nae eeroongyee nnda wamwi wa misabibu. Kaulengetya na uvarile karema-fo na andu a ikamya nunda. Katanya-fo nganga ya iringa karwaa-fo varemi kaenda kyaaṛo. 34Kyasia ili kyeeri kindefika kya iyaa nunda, karuma maketi amwi kulya kwa varemi valya vandewaria nunda tilya tamwi. 35Kyasia varemi valya vakawara maketi alya amwi. Umwi vakankaba na ungi vakawwaa na ungi vakankaba na mawe. 36Karama lingi maketi engi meengi kita alya a mbele. Vakavatanya sha lia da. 37Na lya ifurumya kavarumya mwana wamwi kanumbua: Ye mwana wakwa muni vamweṛeaa. 38Kyasia ili varemi valya vandelolya mwana ulya, vakakurera wo veni na veni: Uu mmuyadińu. Sień tiwwaa tiware dińu ise ti veni. 39Vakawwara vakansomuta woṛo ya nnda ulya vakawwaa. 40Kyasia ili muni nnda ulya wa misabibu ashaa, nkiki atanyaa varemi valya naań? 41Vakamwia: Aretaa vakasha valya, nae aruusaa varemi vengi nndeń ulya wa misabibu. Nawo vashenrwayaa wavi lwa nunda tamwi, ili feeri fayo fifikaa. 42Yesu kavaia: Mwansoma se karikari ka mitisine sheeli: Iwe lia lindelewa watana numba llyo lindeva iwe inini lya wembe? Mfo kindeva kuro kyuka na kwa Nndumi muni kikava kindo kya iṛiikisa misoń eru. 43Kiimba kya iki namuia: Umangi lwa Iṛuva lusokwaa kwanu tanniingwa ufwari lungi taa luvikaa nunda tayo. 44Na ito awaa iweń ilyo afikafikaa. Na ulya woose awoywaa ni iwe lyo limwesaa na ivviṛisa deń. 45Vakohani vanini na Vafarisayo ili vandeita sumu tamwi, vakamanya sheeli nkyawo kyeni akee irera. 46Nawo vakaraya mwaanya wa iwwara. Vakaeṛea isyamu, fulya wo veelolyee sheeli mmwauya.

Currently Selected:

Matayo 21: RWK72

Highlight

Copy