Matayo 19

1Kikava ili Yesu andemaa firero fo foose, kawara shia auka kulya Galilaya kafika miyanuń ya Yudaya kwa kulya ya Yoridane. 2Syamu shiingi ya vandu ikansoṛa nae kavakiṛa. 3Kyasia Vafarisayo vakanshea vakamwelelya veemwiaa: A naań wifo muumu nndu alakani na nka wamwi kwa kiteveto kya mikae yoose? 4Nae kaaṛua kavaia: Mwansoma se sheeli ito andeumbaumba vandu, mbooko andeumbaumba nndu nndumi na nndu nka? 5Kanumbua: Kiimba kya iki nndu atiaa ndee na mae alungani na nka wamwi, nawo vali vavili vavaa vvili umwi. 6Kwa ikyo vakikee lingi vavili ndi, kake ni vvili umwi. Kyasia kilya Iṛuva ankilunga ye muni, manya nndu atakilakanise. 7Vakamwia: Kyavaań are, ili Mose avavasye sheeli nndu aniingye nka kirami kya llakanu alakani nae? 8Kavaia: Nkiimba kya uumu lwa mirima yanu nkyo kikangio Mose kamuniingya muumu wa ilakana na vaka vanu. Kake kuuka mbooko nkuro ndi. 9Nań nkee imuia ini: Nndu woose alakanaa na nka wamwi kitaare nkwa kiimba kya waaisi kaora ungi, ito amaaika. 10Vanalosho vamwi vakamwia: Mboni ta nndu na nka wamwi tikawa kuro, kivaa yora ndi. 11Kake ye kavaia: Nta wwoose vamakii iwaria kirero ki ndi kita valya vakee vaniinge. 12Amu veefo vakee fuumba vandeiriwa na mikae yo kuuka ndewuń ta mayawo. Lingi veefo vakee fuumba vandeaṛulwa fuumba wandu. Lingi veefo vandekwaṛua fuumba wo veni kiimba kya umangi lwa iṛuvewu. Ulya amakii iwaria kirero ki akiwarie.

13Llyo aendewa vana vannya, amu avaekeṛye maako na ivaterevya kwa Iṛuva. Na vanalosho vamwi vakanaya valya veevariee. 14Kake Yesu kanumbua: Tień vana va vannya vashe kwakwa, manya mutaveemi! Amu valya vavakanaa na iwo, umangi lwa iṛuvewu llwawo. 15Kaekeṛya maako amwi kwa ule yawo. Kakwimboo kaenda.

16Eefo nndu umwi ashea Yesu kamwuṛa: A le Llosha, mfisha fingafi ntanaa, amu nkooye muu utakisiaa? 17Yesu kamwia: Kwa-shuuṛya ki filya fikee fisha? Ni umwi tubu akee nsha, nae ni Iṛuva. Kake kwakooya kufurie ikooya muu utakisiaa, indya mavavaso a Iṛuva. 18Kamwuṛa: Wwo angava? Yesu kamwia: Wwo iva: Manya kutawaa vandu, manya kutaaike, manya kuteeve, manya kutafingye nndu ungi kindo atatanye. 19Kwindye ndeo na maa kwiveeryaa sonu. Na lingi: kukunde vandu vengi sheeli kukukundye iwe ku muni. 20Nseṛo ulya kamwia: Mavavaso va woose nameendya. Kikiifo kindo kingi kikiseere naań? 21Yesu kamwia: Ee da, kwakooya kufurie iva nndu nsumani deń, endaań andekumba foose kuwore kwavye vakiva. Amu llyo kuwaraa masaa a iṛuvewu. Kwammaa kusheń kushisoṛe! 22Neeli nseṛo ulya andeita kirero kilya, kafikwa nndewu kaenda aṛiikye, fulya eeworee masaa meengi. 23Na Yesu kaia vaseṛo vamwi: Namuia kya dede: Nkyuumu nndu isimba afike umangiń lwa iṛuvewu. 24Na lingi namuia: Nkyaangu ngoye iitwa mbueń ya sindano kita nndu isimba ifika umangi lwa iṛuvewu. 25Neeli vanalosho vaita kuro, vakaṛiika koṛoń veenumbuaa: Kwakooya nkuro, ni i akiaań? 26Yesu kavaaṛua kavaia: Kwa vandu wo veni kimakii iva ndi, kake kwa Iṛuva kiifo kindo kilemikaa ndi. 27Llyo Petiro aaṛua kamwia: Lla te Mbee! Ise tindeburuya-wo findo foose tikakusoṛa iwe. Nkiki naań tikooyaań? 28Yesu kavaia: Nkya dede namuia: Kyeeri isanga lyaṛulwaa iiya, ili Mwana wa nndu akaa kifumbiń kya unini lwamwi, io llyo neeni mundeshisoṛa niń mukooyaa fifumbi ikumi na fivili, mushilye ngyufwari tilya ikumi na ivili ta Isiraeli. 29Na nndu woose andetia numba ana mwanamae ana mfwamae ana ndee ana mae ana vana ana nrema kiimba kya irina lyakwa, awiiṛyoo na yengeṛyo kya mmwasi na iwaria muu wa miṛeṛe. 30Kake valya vakee va mbele veengi vavaa va numa, na valya va numa vavaa va mbele.

Currently Selected:

Matayo 19: RWK72

Highlight

Copy