Matayo 14

1Feeri filya llyo mangi Herode andeita mboni ta Yesu tiirerwaa. Kaia vaṛundi vamwi: 2Uu yye Yohane mbatisa. Anduka kwa vafu. Nkyo kikangio katana findo fi finini. 3Amu Herode eemmaa iwara Yohane kanrwaa kifingyoń kiimba kya Herodia eekee nka wa mwanamae Filipo. 4Fulya Yohane amwia: Nkisumani kumwore ndi. Nae eefuriee iwwaa, kake kaeṛea vandu, amu valolya sheeli Yohane mmwauya kisuku. 6Neeli undefika nkonu nnini wa ikumbua iiriwa lya Herode, mwana ulya wa sambuṛa wa Herodia kaara mbele ya vandu na yara lyamwi likasenya Herode. 7Nae kanrekya eelyaa ikite kindo kyoose anterevaa anniingaa na kikava ki. 8Nae kiimba kya yaywa mmae kanumbua: Shiniinga nrwe wa Yohane mbatisa wekeṛe ia kyaashoń. 9Na mangi kaṛiika. Kake kiimba kya ilya ikite mbele ya vandu valya eekee nawo shoongeń kavavasa andeniingwa. 10Karuma nndu kandeminya nrwe wa Yohane kulya kifingyoń. 11Nrwe wamwi ukanndwa ukee kyaashoń. Ukaniingyo sambuṛa ilya. Nae kawaria karwaya mae. 12Vanalosho vamwi vakasha vakandeimboo nnyińa ulya vakandeuṛika. Vakaenda vakafitya Yesu mboni.

13Neeli Yesu andeita kuro, kakwimboo kaaṛukya ngalaveń kafika kyaanya kyamwi muni andu atawore vandu. Neeli syamu ya vandu indeita, vakansoṛa na marende kuuka miṛiń yawo. 14Yesu kasomuka kalolya vandu kinga veensheaa. Kavavaviywa mmuu kavakiṛya vandu vawo valole. 15Neeli kundeva ukwawuń, vanalosho vamwi vakanshea vakanumbua: Ia tikai mbateń shuumu na saa ta nsanyiń tamiira. Vikya vandu va kana vaende miṛiń yawo vandeuṛa-fo shoonga. 16Yesu kavaia: Vaendaa are? Vaniingeń ini shoonga! 17Nawo vakanumbua: Nta kindo toore ia kitaare mmikate iraanu na makunga avili tubu. 18Nae kavaia: Sheeridyeń findo fo na ia! 19Kavavasa vandu vakaariswa rembo ifo maṛeń. Kawaria mikate ilya iraanu na makunga alya avili. Kalla iṛuvewu kaana Iṛuva. Kafukyafukya mikate ilya kaniingya vanalosho na vanalosho vakandeavya vandu. 20Vakalya woose vakawuura. Vakaitiṛimu fibeṛeshu filya findesaa fikaishua mikusha ikumi na ivili. 21Na valya vandelya wwomi veefikyee fiku firaanu vateefo vaka na vana.

22Kyasia Yesu kaitika vanalosho vamwi vaaṛukye ngalaveń vaire mbele yamwi vaṛuke kwa kulya, kumande ye amaa ilakana na syamu ilya ya vandu. 23Neeli andemaa ilakana na vandu, kasaama uroń kandeterevya-fo akee kyaanya kyamwi. Kakaa-fo ye muni kumande kwaila. 24Neeli ngalava indefika karikari, ikaatarwa nnu nnruva, fulya ikee ikwola kiimba kya mburaato. 25Neeli kindefika ikamba lya kaani lya iringa kio, Yesu kavashea eendaa na marende kwa ule ya nruva. 26Neeli vanalosho vandellolya eendaa na marende kwa ule ya nruva, vakataṛaaka vakanumbua: Nkiṛishwe. Vakaishiṛa kiimba kya weṛei. 27Lia eni Yesu karera nawo kavaia: Uywań mmuu! Nniń, manya mutaeṛee! 28Petiro kamwaṛua kamwia: Nndumi, kwakooya ni iwe, shivavasaań nshe na ifo kukai niiraa kwa ule ya nruva. 29Nae kamwia: Oṛesho! Petiro kaoloka ngalaveń kaenda na marende kwa ule ya mura eeshaa na kulya Yesu akai. 30Kake ili andelolya mburaato, kaeṛea. Kabooka yoloka nruveń kaṛoṛongya eereraa: Nndumi shikiṛa! 31Lia eni Yesu kasaaṛa uko kawwara. Kamwia: Iwe nndu wa ikusura yaangu, naamu ki ili kwanunua nrwe? 32Neeli vandeaṛukya ngalaveń, mburaato ikamanda. 33Na valya veekee ngalaveń vakawwoya veenumbuaa: Nkya dede iwe kukee Mwana wa Iṛuva.

34Neeli vandemaa iṛuka kwa kulya, vakafika urukefi lwa Genesareti. 35Na veni va uruka lo ili vandemanya yye, vakaruma vandu vaende kulya kwifwitanii na muungo wawo woose. Vakamwendye woose valole. 36Vakantereva vabaani nkyendu wa nseto wamwi da. Na valya woose vandebaana vakava vesha deń.

Currently Selected:

Matayo 14: RWK72

Highlight

Copy