Luka 22

1Kyasia ukaserikia nkonu nnini wa mikate itadookie ulya uvaangwaa wa Pasaka. 2Vakohani vanini na vaaria va mitisine vakaraya mwaanya kasa vawwaa. Amu veeṛee vandu. 3Satana kaakia Yuda avaangwaa Isikariote, nae ni umwi wa valya ikumi na vavili. 4Kakwimboo kaenda kandelya kyama na vakohani vaiya vanini na vashili kasa andenrambikiaa maakoń awo. 5Nawo vakafura vakarekiana nae kya fesa vanniingaa. 6Nae kairikia na bata. Kaenda kandeṛuya mwaanya wa inrambikia maakoń awo, amu vandu vatamanye.

7Kyasia nkonu ulya wa mikate itadookie ukafika, nto usumani isikya ngarina ya Pasaka. 8Karama Petiro na Yohane kavaia: Endeń mundetisongosia Pasaka tishelya. 9Nawo vakamwia: Kufurie tindesongosia kwi, Nndumi? 10Nae kavaia: Ili mwakaa muṛiń mukwaniaa na nndu arie nungu ya mura. Nsoṛeń kumande numba ilya andeakaa. 11Ień muni numba: Llosha akuuṛa: Nkwi kiṛi kya yeveṛa kikai, amu lliye-fo Pasaka andu emwi na vanalosho vakwa? 12Nae amworusaa kiṛi kinini kikee ringewu, nakyo kyalie miseto. Mfo kundo mutisongosiaa. 13Nawo vakaenda vakalolia kuro da kasa andevaia vakasongosia-fo Pasaka.

14Kyasia ili kyeeri kindemaa ifika, kashekaa rembo shoongeń na vaseṛo vamwi vakakaa andu emwi nae. 15Kavaia: Niilangiee nnu deń ilya Pasaka ii andu emwi neeni kitaare nandeliswa ukiva. 16Amu namuia: Nkiilyaa lingi kutu ndi kumande indeawutio̱o̱ ifo umangiń lwa Iṛuva. 17Kaimboo umbata kaana Iṛuva kanumbua: Ngyeń kwavień ini mu veni! 18Amu namuia: Kuuka nnu nkinwaa lingi minuye ii ya nsabibu ndi nkumande umangi lwa Iṛuva lwasha. 19Kaimboo nkate kaana Iṛuva. Kaufukyafukya kavaniingia eevaiaa: Uu ni wili wakwa uniingio̱o̱ kiimba kyanu. Neeni taniń kuro amu mushikumbue niń. 20Na umbata lua lwiniwaa numa ya shoonga, katana kuro da eevaiaa: Umbata lu ni mma shiiya yaliwa na usao lwakwa, nalo lwiritwaa kiimba kyanu. 21Kake manyiń: Uko lwa ito ashiṛiingaa lukee ia meseń andu emwi nań. 22Mwana wa nndu ye aendaa shia yamwi da sheeli kideeṛie. Kake ushi nndu ulya andiingaa. 23Vakabooka yuṛana wo veni na veni: Ni i umwi kari keru amakii itana kuro?

24Likava ivingana kari kawo kya ulya alolio̱ akee nnini ifo kwawo. 25Nae kavaia: Mamangi a mikae ya vandu vavaitoṛio, na vafinya vakavaangwa mawoomi manini. 26Kake kwanu ini kitave kuro! Kake ulya akee nnini kwanu ave sha munnya. Na ulya akee iiria vengi mbele ave sha muṛundia vengi. 27Amu ulya akee nnini ni ungau? Ni ulya akee rembo shoongeń ana ni ito akee iṛundia? Ni ulya se akee rembo shoongeń? Kake niń kari kanu nkee sha ulya akee iṛundia vengi. 28Neeni ni ini munderiana andu emwi nań maelelioń akwa. 29Nań namurambikia diṅu ya umangi sheeli Vaava wakwa andeshirambikia niń. 30Neeni mulyaa na inwa meseń yakwa ifo umangiń lwakwa na ikaa rembo fifumbiń fa unini na iitoṛo ngyufari iti ikumi na ivili ta Isiraeli.

31Yesu kanumbua: Iwe Simon, Simon lla te Satana amufurie ini, amwele sha umbi. 32Kake niń nankuterevia kwa Iṛuva, amu ikusura lyafo litaangue. Nawe ili kwamiilashika numa, kaarisa na vanavamae vafo! 33Nae kamwia: Nndumi, nankaa andu emwi nawe nkudeeṛie yenda na akwaa nkifingioń na akwaa ni ufuń. 34Nae kanumbua: Petiro, nakuia: Nta nguku ya shawu iikoroo nnu kitaare kwashikana kararu kwinumbuaa: Mmwishi ndi. 35Kalunga ivaia: Lia nndemuruma mutarie mikusha ana fishawu ana faaru, kiifo kindo mundetuṛa? Vakanumbua: Nta kimwi tindetuṛa. 36Kavaia: Kake ulya arie nkusha alli akurike. Na ulya awore mboloko nkuro da. Na ulya atawore akumbe nseto wamwi wa yeeṛia akuuṛie shombo. 37Amu namuia: Kilya kindetisiṛwa kyakwa kyawara kyawutio̱ sheeli: Antaalio̱ andu emwi na varekwa. Fulya kilya kindefukywa kyakwa kikaa kyawukie. 38Nawo vakanumbua: Nndumi, lla ia tiiyo shombo ivili! Nae kavaia: Kyasia fifile.

39Kakwimboo kaenda kumande uroń lwa misenifu kasa aishivie. Na vanalosho vamwi vakallatia. 40Neeli andefika andu o kavaia: Tereveń Iṛuva amu mutawe nreyoń! 41Kalakana nawo kafika kwaasha sha andu nndu eeṛaa iwe. Kafwiria nri katereva eenumbuaa: 42Wui Vaava, kwakooya kivaa umbata lu lushuuke. Kake nsheeli niń mfurie ndi, nsheeli kufurie kitanike iwe. 43Malaika kanshea auka iṛuvewu kashenniinga finya. 44Nae sheeli eekee matuṛuloń kaengeṛia nnu itereva. Na nrike wamwi ukava sha maroń a usao akee ishololokia si. 45Neeli andeuka itereva, kashea vanalosho kavakooya vallala kiimba kya unaari luvawore. 46Kavaia: Naamu ki ili mulele? Kwimbooń mutereve Iṛuva, amu mutawe nreyoń!

47Kyasia ili eereraa kuro, lia eni mamwiingi wa vandu vakasha na-wo. Na umwi wa valya ikumi na vavili, irina lyamwi yYuda, eevairiee mbele. Kaserikia Yesu amu amwonge mimo. 48Yesu kamwia: Yuda, kwaṛiinga Mwana wa nndu kwimwongaa mimo? 49Na valya veekee kufui nae ili vandelolia kive kuro, vakanumbua: Nndumi, tikavakaba na shombo? 50Na umwi wawo kakaba iketi lya nkohani nnini kamminya kuri kwa uko usha. 51Yesu kaaṛua kanumbua: Vatień vaawutie kyawo. Kambaana kuri kanshiisa. 52Yesu kaia vakohani valya vanini na vanini va numba ya Iṛuva na masiingo vandellengetia: Mwansha murie shombo na ndata sha vandu vakee iwara kisoki. 53Na nkonu woose niikee andu emwi neeni numbeń ya Iṛuva nta ishisaaṛia maako. Kake iki nkyo kyeeri kyanu na ushili lwa llema.

54Vakawwara vakankurika vakanrwaa numba kwa nkohani nnini. Na Petiro kallatia numa eendeaa kwaasha. 55Vakaata muro io wooṛo vakakaa rembo veeoraa. Na Petiro kakaa rembo karikari kawo. 56Llyo iketi limwi lya kika likallolia akee rembo iṛaseń lya muro. Kamulla koroo kanumbua: Na uu eekee andu emwi nae. 57Nae kankana kanumbua: Woi, shimanya mmwishi ndi toto. 58Kwa numa kinnya nndu ungi kallolia kanumbua: Nawe kukee umwi kari ka iwo. Petiro kanumbua: Wode nndu, nniń ye ndi. 59Numa ikaira sha saa imwi, nndu ungi kakaarisa eenumbuaa: Nkya dede nndu uu eerianii nae, amu wwa Galilaya. 60Petiro kamwia: Iwe nndu, niishi iki kukee irera ndi. Na ilyo eni ili eereraa, nguku ya shawu ikaikoro. 61Nndumi kaaṛuka kalla Petiro. Nae Petiro kakumbua kirero kilya kya Nndumi kasa eemwiaa: Nnu kitaare nguku ya shawu yamiikoro, kushikanaa kararu. 62Kasomuka na wooṛo kaiya nnu kutu.

63Na vandu valya vandewara Yesu vakanteenda na inkaba. 64Vakantumuṛa miso vakamwuṛa veenumbuaa: Rambuań, nndu to akukaba ni iń? 65Vakarera na firero fingi fiingi fa inrumaruma.

66Kyasia ili kundekya, masiingo alya a vandu akakusandia na vakohani vanini na vaaria va mitisine. Vakanrwaa andu a kikwena kinini kyawo. 67Vakanumbua: Kwakooya iwe kukee Kristo tiie! Nae kavaia: Kwakooya namuia, nta mushiirikiaa ndi. 68Na lingi namuuṛa kindo, nta mushaaṛuaa ndi. 69Kake kuuka alli Mwana wa nndu avaa akaa rembo ukoń usha lwa Iṛuva muni finya. 70Kyasia woose vakanumbua: A iwe kukeeń Mwana wa Iṛuva? Kavaia: Ni ini mwanumbua nniń ye. 71Nawo vakanumbua: Tikisokodiaań ki kingi? Amu ise ti veni tamiita sheeli arera na kana kamwi.

Currently Selected:

Luka 22: RWK72

Highlight

Copy