Luka 19

1Yesu andefika Yeriko, kaira muṛiń ito. 2Neefo eeifoo nndu irina lyamwi nSakayo. Na nndu to eekee nnini wa vasaṅiṛia kyaalo, eekee na isimba. 3Kalanga nnu ilolia Yesu, amu amanye mikae yamwi. Nta imakii illolia kiimba kya wiingi lwa vandu, fulya ekee wa yumba ifui. 4Karisha na mbele kasaama nriń wa nkuu, amu allolie. Fulya shia ilya (Yesu eekee iira) wwo iiriee. 5Neeli Yesu andefika alya, kalla na ule nriń. Kamwia: Sakayo oloka-fo ree, fulya kyashiwara niń mfike kwafo nnu. 6Nae kaoloka ree kanrwaa kyeń kwamwi kawwaria-fo na ifura. 7Ili vandu vandelolia kuro, vakaṅṅuṅuria woose vakanumbua: Ameenda numba kwa nndu nrekwa na indeimuya-fo. 8Nae Sakayo kasalala kisanguń kya Nndumi kamwia: Lla te Mbee, masaa akwa noore naavanisaa feenga fivili nniinge vakiva kimwi. Na kwakooya nanraya ki do kya nndu niwwiiṛiaa na fiini. 9Na Yesu kamwia: Numba ii yallolia ikiṛwa nnu, amu nae mmwana wa Aburaamu da. 10Fulya Mwana wa nndu ansha iṛuva kilya kikee kireti na ikikiṛa.

11Ili vandeita mboni ito, nae kaengeṛia irera na sumu, amu ye eekee kufui na Yerusalemu. Nawo vakakusaṛa sheeli umangi lwa Iṛuva lulolikaa kwa limwi. 12Kyasia kanumbua: Eeifoo nndu wa numba ya mangi andeimboo kyaaṛo kya uruka lwa kwaasha, andewara-fo umangi, numa auye. 13Kavaanga vandu ikumi kari ka maketi amwi kavaniingia mayana ikumi a fesa. Kavaia: Kabeń nato mbusha kumande nuuyaa. 14Kake vandu va uruka lwamwi vansua. Vakaruma varumi numa yamwi vandenumbua: Tikundie nndu to atishilie ndi. 15Neeli andemaa iwara umangi lua, kauya na kyeń kavavasa, maketi alya avaniingia fesa tilya avaangwa, naamu amanyi kasa nndu woose andekooya mbusha yamwi. 16Kasha ulya wa mbele kanumbua: Nndumi, fesa tilya tafo iyana tindefyaa tingi mayana ikumi. 17Nae kamwia: Nkisha iketi isha, fulya kundeva nsongovisi wa filya fikee fyaangu. Vaań na miitoṛio ya iitoṛo miṛi ikumi. 18Kasha wa kavili kanumbua: Nndumi, fesa tafo iyana tamfyaa tingi mayana araanu. 19Kaia na uu nae: Nawe vaań na miitoṛio ya iitoṛo miṛi iraanu. 20Kasha ulya ungi wawo kanumbua: Nndumi, a ti fesa tilya tafo iyana nndetifingia kiramiń natifisa. 21Amu nndekweṛea, fulya iwe kukee nndu wa kiṅushu. Kwonduaa kindo andu kutakifisie. Kwilulaa kitaare kwaweekia. 22Nae kamwia: Iwe iketi ikasha, kwa firero fafo mfo nkuumisiaa nafo. Ili kwiishii sheeli nkee nndu wa kiṅushu, noondua kindo andu ntakifisie na iilula ntandeveekia, 23kyasia nki ili kutanderwaa fesa takwa kwa vakaba mbusha na fesa ta vandu? Nań ili nuuyaa nshetiwaria andu emwi na mbusha yayo. 24Kaia valya veeyoo: Nsokeń fesa to iyana muniingie ito awore mayana ikumi. 25Vakamwia: Nndumi, awore mayana ikumi tee! 26Nań namuia: Ulya woose awore kindo ee-ngerṛiaa iniingwa. Na ulya atawore kindo na akwaa nkilya awore asokwaa. 27Kake fituva filya fakwa vatakundie washilie vanndeń ia muvawaye mbele yakwa.

28Ili andemaa irera kuro, kaengeṛia iwara shia ya irwa na Yerusalemu. 29Ili andeserikia kufui na Betifage na Betania kulya uroń lwa misenifu, karuma vanalosho vamwi vavili. 30Kavaia: Endeń kimuṛiń kikee kufui neeni. Mukamiira nafo muloliaa-fo kyaashe kya nshungu kyavikie kitandeaṛukio̱ ni nndu. Kiboṛomueń musheendie. 31Na kwakooya nndu amuuṛaa: Nki ili mukee ikyawua? mwień: Ni Nndumi awore nakyo kima. 32Na valya vanderumwa vakaenda vakakooya sheeli eewaiaa. 33Neeli veeboṛomuaa kyaashe kilya kya nshungu, veni vayo vakavaia: Nki ili mukee iboṛomua kyaashe kyo kya nshungu? 34Nawo vakavaia: Ni Nndumi awore kima nakyo. 35Vakakirwaya Yesu vakaala miseto mungo wa kyaashe kya nshungu va-kasaamisa-fo Yesu. 36Neeli aendaa vakaala miseto yawo ifo shień. 37Neeli andefika yolokioń lya uro lua lwa misenifu, vanalosho vamwi veefo kwa wiingi vakabooka iitikisa Iṛuva na ununga unini kiimba kya mitanie yoose ya finya vandelolia. 38Vakanumbua: Eetikiswa ulya asha akee mangi arumwa ni Nndumi! Ifo iṛuvewu luvaa unambwe na nduma uvaa ifo ule! 39Kiindi kya Vafarisayo valya veekee kari ka mamwiingi wa vandu vakamwia: Llosha, naiya vanalosho vafo te! 40Nae kaaṛua kavaia: Namuia: Kwakooya iva vasia do, mmawe aṛoṛongyaa.

41Ili Yesu andefika kufui na Yerusalemu, kalla muṛi ulya kaulilia. 42Kanumbua: Kikooye nawe kwammanya kyeeri ki kya alli kilya kikwendie unambwe! Kake alli nkifise kutakikiloliaa lingi. 43Amu kikaa kishe kyeeri na misa afo akulengetiaa ṛiti na ikuraya deń na ikutuṛua akutuṛuaa taari toose. 44Nawo akukunduyaa ifo si na vana vafo vakee kari kafo na ikufukya kutu, nta iwe limwi areaa likee na lingi, mfulya kitaare kwamanya kyeeri kilya kwansengerwa nakyo ni Iṛuva.

45Yesu kaaka na ifo numba ya Iṛuva kabooka yumbuta-fo valya veekee ikumbia-fo findo eevaiaa: 46Nkitisiṛe: Numba yakwa kyawara ive numba ya iterevia. Neeni mwaiaṛua mbanga ya fisoki. 47Nae kalosha vandu mikonu yoose ifo numba ya Iṛuva. Kake vakohani vanini na vaaria va mitisine na vanini va vandu vakaṛuya mwaanya wa iwwaa. 48Nawo nta ikooya kilya vantaniaa. Fulya vandu woose veekusuranii nae na imwaranya veekee imwaranya.

Currently Selected:

Luka 19: RWK72

Highlight

Copy