Luka 16

1Yesu kaia vanalosho vamwi: Eeifoo nndu isimba awore nshili wamwi mulla masaa amwi. Nae kaṛiingwa kwamwi kiimba kya inyanyata masaa a nndumi wamwi. 2Kawaanga kamwia: Mmboni ki iti nkee iita tafo? Shoorusa itaala lya ulla lwafo te, amu kukimakii lingi iva mulla masaa akwa ndi. 3Nshili ulya kakurera ngooń yamwi: Naare ntanaa, ili nndumi wakwa ashiutaa ushiliń lwakwa? Irema mmakii irema ndi, na yeṛeṛia vandu noore sonu. 4Alli nammanya kilya ntanaa, ili namuutwa ushiliń, amu vashiwarie ifo kyeń kwawo. 5Kyasia kavaanga vandu veeworee sile ta nndumi wamwi umwi umwi. Kaia ulya wa mbele: Kuwore sile ki ya nndumi wakwa? 6Nae kamwia: Mmafura nravi iyana. Kamwia: Nnde kirami kyafo kya sile, kwakaa rembo kwatisiṛa-wo nravi makumi araanu. 7Numa kaia ulya ungi: A iwe nsile ki kuwore? Kamwia: Ni umbi miringa iyana. Kamwia: Nnde kirami kyafo kya sile, kwatisiṛa miringa makumi nyaanyi. 8Kyasia nndu ulya kaṅinisa nshili ulya llembi, fulya andetana kya uṛango. Fulya valya vakusurani na findo fa isanga li waṛango kita valya vakusurani na fa iṛuvewu. 9Nań namuia: Wareń ndoo na masaa iva a isanga awore ulembi, mwiṛundiaa nawo vandu kisumani, amu muwario̱ ifo firemboń fa miṛeṛe, masaa iva akawa mmando. 10Ulya akee wa usuro lwa kilya kikee kinnya, avaa na wa usuro lwa kilya kikee kinini. Na ulya awore wiiṛi lwa kilya kikee kinnya, avaa na mwiiṛi wa kilya kikee kinini. 11Kyasiań kwakooya mutava na usuro lwa masaa va a ulembi, ni i amuniingiaa masaa a dede? 12Na kwakooya kitaare mundeva va usuro lwa masaa a nndu ungi, ni i amuniingaa masaa akee anu mu veni? 13Nta nndu amakii iṛundia woomi vavili ndi. Amu amakii isua uu na ikunda uu ungi. Lingi akusuranaa na umwi, aile ito wa kavili. Nta mumakii iṛundia Iṛuva andu emwi na iṛundia masaa ndi.

14Vafarisayo vakaita ifi foose anumbua. Nawo veekee vandu valangie nnu fesa. Vakannaṅaṛia. 15Kavaia: Ini mukee vandu nkikuniingaa usumani mu veni mbele ya vandu, kake Iṛuva eeshi mirima yanu. Amu kilya kikee kiitikise kunu vanduń, ifo kisanguń kya Iṛuva nkya usutu. 16Mboni ta mavavaso na ta vaauya fisuku tiifoo kumande Yohane asha. Kuuka kyeeri kyo mboni shisha ta umangi lwa Iṛuva tikwaniswaa. Na nndu woose akwataa-fo na finya. 17Kake nkyaangu mmwasi iṛuvewu na isanga fisie kita ili kirero na akwaa nkimwi kya mavavaso kirekaa. 18Ulya woose alakanaa na nka wamwi na yora nka ungi amaaika. Na ulya aoraa ito andetio̱-wo ni mmi wamwi amaaika.

19Yesu kakabia vandu sumu kanumbua: Eeifoo nndu isimba eeṛaa miseto minuru ya utoṛe kakaa na ifura mikonu yoose ya muu wamwi. 20Eeifoo na nndu nkiva, irina lyamwi avaangwaa Lasaro, eekee rembo ifo mwaangoń wa nndu ulya, alole maṛonda meengi. 21Kalanga ikuliya fibeṛeshu filya fa shoonga fiwaa fuuka meseń ya isimba lia. Na makite akasha akankombakomba maṛonda amwi. 22Kyasia nndu ulya nkiva kafwa kaimbolo vvamalaika vakanrwaa ṅundeń ya Abraamu. Na nndu ulya isimba nae kafwa kaṛikwa. 23Ili eekee kundo kwa vafu eevavio̱o̱ nnu, kaimboo miso amwi kalolia Abraamu akee kwaasha na Lasaro akee ṅundeń yamwi. 24Karosa ununga lwamwi kanumbua: Wui nde yakwa Abraamu, kushililie, kurume Lasaro aolote kisangu kya nni wamwi mureń, ashirelelise ulumi lwakwa, fulya nkee iliswa nnu ukiva muroń uu. 25Abraamu kamwia: Mwanakwa, kumbua sheeli kwawaria fa usha lwafo lia kukee na muu. Na Lasaro ye kalya ukiva. Kake alli ye akee iwiiṛio̱ muu kunu, nawe kukee iliswa ukiva. 26Na kilanya ya ifi foose kunu karikari keru na kanu lwifo waanga waasha lwanrawa-fo, amu valya vafurie isha na ifo kwanu vauka kunu kweru, vatamakii, na valya va ifo kwanu vatamakii irambuka vashe kweru. 27Nae kamwia: Akwaa kyava kuro, nde yakwa, nakutereva nnu, ruma Lasaro kulya kyeń kwa vaava wakwa. 28Amu noore-fo vanavama varaanu, avaikimbe, amu vatashe nawo kundo ku kwa ukiva. 29Abraamu kamwia: Vawore firero fa Mose na fa vaauya fisuku valya, vavaaranye wo. 30Nae kamwia: Wode nde yakwa Abraamu, nta vavairikiaa ndi. Kake kwakooya nndu auka kunu kwa vafu aende kwawo, Uyo vaaṛukaa mirimiń yawo. 31Abraamu kamwia: Kwakooya kitaare vaaranyaa Mose na vaauya fisuku valya, na akwaa nndu aṛuka auka kwa vafu vamwirikiaa nta ndi.

Currently Selected:

Luka 16: RWK72

Highlight

Copy