Yohane 7

1Numa ya ifi Yesu eekee iṛua kulya Galilaya. Fulya atakifurie iṛua kulya Yudaya kiimba kya Vayuda veeriee iwwaa. 2Na kisuku kinini kya Vayuda kilya kya matengo kikee kufui. 3Kyasia vanavamae vakamwia: Kwimboo kunu kwende Yudaya, amu na vanalosho vafo valolie mashoṛa wo afo kukee itana. 4Amu eefo nndu amakii itana kindo kiṛisi neekai afurie amanywa na baa ndi. Kwakooya kufurie itana mashoṛa a mikae ii, kworuseń kwa va isanga li. 5Amu na akwaa wanavamae vvandu vatandenkusura ndi. 6Kyasia Yesu kavaia: Kyeeri kyakwa kyamfika ndi. Kake ini kyeeri kyanu kiifo mikonu yoose. 7Isanga limakii imusua ini ndi. Kake niń lishisule, fulya niń nkee irambua sheeli mashoṛa ayo mmakasha. 8Kwendień ini rweń kisukuń. Niń nkee irwa nndelya kisuku ki ndi, amu kyeeri kyakwa kyamfika ndi. 9Ammaa ivaia ifi ye muni kakaa ifo Galilaya. 10Ili vanavamae vandemaa irwa kisukuń, Ilyo nae arwe da, kake nkwa baa ndi, nkwa kiṛisi. 11Kyasia Vayuda vakanduya kisukuń kilya. Vakanumbua: A ye nkwi akai naań? 12Likava inunua iingi kari ka isyamu lia kiimba kyamwi. Kiindi vakunumbua: Ye ni nndu nsha. Kiindi vakanumbua: Wode, ye aretaa vandu. 13Kake nta nndu andensenda na baa, fulya veeṛee Vayuda.

14Kake karikari ka mikonu ya kisuku Yesu karwa kaira na numba ya Iṛuva kaloshia-fo. 15Vayuda vakariika veereraa: Uu amanya are mitisine, nae atakee lloshe? 16Yesu kavaaṛua kavaia: Miloshie yakwa yyakwa niń ndi, yya ito ashirumie. 17Nndu kafura itana kilya ye afurie, amanyaa akwaa miloshie yo yukie kwa Iṛuva ana akwaa mfirero fakwa feni nkee irera. 18Ulya akee irera kya mifurie yamwi akee iṛuya unini lwamwi muni. Kake ulya akee iṛuya unini lwa ulya anrumie ito wwa dede ana awore ukavili kari kamwi ndi. 19A Mose yye se amuniingia mavavaso? Ana nta umwi wanu aindiaa mavavaso wo. Nkiki ili mufurie ishiwaa? 20Vandu valya veekuumbiee-fo vakaaṛua: Ako! Kuworwa ni uketo! Ni i akee iṛuya kya ikuwaa? 21Yesu kaaṛua kavaia: Niń ni ishoṛa limwi nndetana kunu Yerusalemu neeni mukaṛiikiswa mu woose. 22Mose yye amuniingie llimu wa irinwa. Kake nkwa Mose uukie ndi, kake nkwa vakuuku va mbele. Neeni na akwaa ni nkonu wa Sabato murinaa nndu. 23Kyasia kwakooya nndu arinwaa nkonu wa Sabato, amu ivavaso lya Mose litafukywa, nkiki ili ini mwashituṛukia niń, ili naaṛua nndu kava nsha deń nkonu wa Sabato? 24Manya mutafukye mwaandu kwa kikundia, kake fukyeń mwaandu na usumani! 25Kyasia vandu kiindi va Yerusalemu vakanumbua: A uu yye se vakee induya vawwaa? 26Nae a uu akee irera na baa vataare nta kindo vakee imwia! Kitakooye vandu wo va nrwe vammanya dede sheeli uu yye Kristo naań? 27Kake nndu uu timwishi kundo aukie nafo. Kake Kristo ili ashaa, nta nndu eeshi kundo aukie nafo ndi.

28Kyasia Yesu karosa ununga lwamwi kulya numba ya Iṛuva eeloshaa kanumbua: Ee mushiishi na kundo nuukie nafo mwishi da. Nań nta nndesha kwa mifurie yakwa shi muni ndi. Eefo wa dede andeshiruma kitaare mumwishi ini. 29Niń mmwishi, amu nkwamwi nuukie, nae yye ashirumie. 30Kyasia vakaṛuya mwaanya wa iwwara, nta nndu andensaaṛia uko awware, fulya kyeeri kyamwi kitaare kyeemfikaa. 31Na vandu veengi kari ka syamu vakautia-wo inkusura. Vakanumbua: Ili Kristo ashaa, naań atanaa findo finini kita ifi nndu uu andetana? 32Vafarisayo vakaita vandu veereraa kyamwi kiviṛiviṛi. Llyo vakohani vanini andu emwi na Vafarisayo vakaruma vaseṛo vandewwara. 33Yesu kanumbua: Mmikonu myaangu nkikaa neeni, numa neende kwa ito andeshiruma. 34Mushiruyaa mutashilolie. Neeni kundo nndekaa mumakii ifika-fo ndi. 35Vayuda vakakurera wo veni na veni: A uu afurie yenda kwi neese titalloliaa? Asoṛaa valya vanyanyate ngyurukeń ta Vagiriki aloshie-fo Vagiriki wo? 36Nkirero ki ikyo akirera: Mushiṛuyaa mutashilolie, neeni kundo nndekaa niń mutamakii ifika-fo?

37Na nkonu to wa imarisia kisuku ukee nnini kita ilya ingi Yesu kasalala-wo karera na ununga unini kanumbua: Nndu aworwa nnyura ashe kwakwa anwe! 38Ulya ashikusurie niń kiwiaa sheeli mitisine irerie: Nndu uu ifo wiliń wamwi iṛukaa-fo mira ya yeeka iwore mura wa muu. 39Neeli arera kuro nkiimba kya Mumuyo Nsongori. Nto valya vankusurie vakaa vawwarie. Amu kyeeri kilya Mumuyo Nsongori eenshaa ndi, fulya Yesu atandefika uniniń lwamwi. 40Kyasia kari ka isyamu lia veefo vandu vandeita firero fo vakanumbua: Nkya dede uu yye mwauya fisuku ulya. 41Vengi vakanumbua: Yye Kristo. Vengi vakanumbua: Naare? Kristo ashaa aukaa ifo Galilaya? 42Mitisiṛie irerie se sheeli Kristo ashaa aukie ufwariń lwa kwa Davidi na kulya muṛiń wa Betileemu ulya Davidi eekaa? 43Kyasia vandu vakakufukya kari kiimba kyamwi. 44Kiindi kyawo vakafura iwwara, kake nta nndu andeseṛeesa uko lwamwi awware.

45Kyasia vaseṛo valya vakauya kwa vakohani vanini na Vafarisayo. Nawo vakavauṛa: Naamu ki ili mutamunnde? 46Vaseṛo valya vakaaṛua: Kuuka mbooko nta nndu anrera sheeli uu akee irera ndi. 47Vafarisayo vakavaaṛua: Naare? Ini neeni mwallembika? 48Eefo nndu wa nrwe na akwaa ni umwi tubu ana Mfarisayo umwi ankusurie? 49Kitaare ni isyamu lyo liteeshi uvavaso, nawo vakee vadenge. 50Kakwimboo Nikodemo ulya eensheaa Yesu kyeeri kya kio, nae eekee umwi wawo. Kavaia: 51A mavavaso eru aumisiaa nndu kitaare amaaranywa mbele, kimanyike kilya atanie? 52Vakaaṛua vakamwia: Iwe nawe kukee nndu wa Galilaya? Ṛuya kulolie sheeli kulya Galilaya antandelolika-fo mwauya fisuku. 53Vakalakana vakaenda nndu woose kyeń kwamwi.

Currently Selected:

Yohane 7: RWK72

Highlight

Copy