Yohane 4

1Kyasia Nndumi kamanya sheeli Vafarisayo vamiita, Yesu amiira vanalosho veengi na ibatisa veengi kita Yohane. 2Kake Yesu ye muni abatisa vandu ndi, wanalosho vamwi. 3Llyo alakana na kulya Yudaya kaenda lingi kumande Galilaya. 4Nae kalolia sheeli kyawara aire kari ka Samaria. 5Kafika muṛiń umwi wa kulya Samaria uvaangwaa Sikari ukee kufui na nrema ilya Yakobo andeniinga mwanamwi Yosefu. 6Neefo lwiifoo usokwa lua lwa Yakobo. Yesu kakooya amaareeswa nkyaaṛo kakaa rembo io mbaai ya usokwa. Kikee kyeeri kya saa isasaru. 7Kasha na-wo nndu nka wa Kisamaria isheraya mura. Yesu kamwia: Shirita mura nnwe. 8Amu vanalosho vamwi veemeendaa muṛiń indeuṛa-fo shoonga. 9Nka ulya wa Kisamaria kamwia: Naare kyava iwe kukee nndu wa Kiyuda kwashoomba mura, nań nkee nka wa Kisamaria? Amu Vayuda veeitanaa na Vasamaria ndi. 10Yesu kamwaṛua kamwia: Kikooye kwimanyaa wavi lwa Iṛuva na imanya nndu uu akuia: Shirita mura nnwe, llyo nawe kwinterevaa, nae eekuniingaa mura uwore muu. 11Nka ulya kamwia: Nndumi, a ili kutawore nta kindo kya iraa mura na usokwa lu lwa mura lwolokie nnu. Nkwi kuutaań mura to uwore muu? 12Eewe kukee nnini kita nde yeru Yakobo? Yye andetiniinga usokwa lu lwa mura. Nae muni aniya-fo mura ye na vana vamwi na findo famwi eefilimiee. 13Yesu kamwaṛua kamwia: Ulya woose anwa mura uu awarwaa nnyura lingi da. 14Kake nndu kanwa mura uu ninniingaa niń, akiwarwaa nnyura lingi ndi na kumande miṛeṛe. Kake mura uu niń ninniingaa kari kamwi ushevaa-fo iriso lya mura, nalyo lyeekaa lifike muuń ulungani. 15Nka ulya kamwia: Nndumi, shiniinga mura to ntakiliwa lingi nnyura ana ntakishe ia nnderaa mura. 16Yesu kamwia: Enda ivaanga mmi wafo kuuye nae ia! 17Nka ulya kaaṛua kamwia: Noore mmi ndi. Yesu kamwia: Kwarera dede, ili kwanumbua: Noore mmi ndi. 18Amu kweeriwaa wwomi varaanu, ana uu kukee nae alli ni mmi wafo ndi. Ikyo kwarera nkya dede. 19Nka ulya kamwia: Nndumi, llolie sheeli kukee nndu mwauya. 20Vaande yeru veetereviaa Iṛuva uroń ilu. Neeni mukanumbua: Yerusalemu mfo kundo kyawara kuterevio̱ Iṛuva. 21Yesu kamwia: Iwe nka, amu kikaa kishe kyeeri mutakiindiaa Nde kunu uroń ilu ana nta kulya Yerusalemu. 22Ini mukee iindia kindo mutakiishi, neese tikee iindia kindo tikiishi, fulya kwa Vayuda mfo ikia lya vandu lyukie. 23Kake kyeeri kishaa, nakyo kiifo alli da, ili va iindia Iṛuva va dede vairiaa Nde windi luriwa mMumuyo na udede. Amu na Nde afurie vandu sha iwo vakee imwindia kuro. 24Iṛuva mMumuyo na iwo vakee imwindia kyawara vamwirie windi luriwa mMumuyo na udede. 25Nka ulya kamwia: Niishi sheeli Mesia ashaa ulya avaangwaa Kristo. Nae ili ashaa yye atimanyisaa findo ifi foose sheeli fikai. 26Yesu kamwia: Nniń ito nkee irera nawe. 27Lia eni vanalosho vamwi vakauya vakariika, ili vallolia akee irera na nndu nka. Kake nta umwi andemwuṛa: Nkiki kukee iṛuya kwamwi ana nkiki ili kukee irera nae. 28Kyasia nka ulya katia-wo nungu yamwi. Kaenda muṛiń kandeia vandu: Oṛeshoń mushella nndu ashoongoya foose nantana. Kikooye yye Kristo se naań? 30Vakakwimboo vauka muṛiń vakamwendea.

31Ili kikikee kuro vanalosho vamwi vakantereva vakamwia: Llosha, lyań te! 32Nae kavaia: Niń noore shoonga mutaiishi ini. 33Kyasia vanalosho vamwi vakakurera: Eefo nndu amwendie shoonga naań? 34Yesu kavaia: Shoonga yakwa yyo ii: Ni itana mifurie ya ito andeshiruma na yawutia mashoṛa amwi. 35A ini mukee inumbua se, sheeli iseere miiri iini llyo iilula lishaa? Niń namuia: Imbooń miso anu mulle manrema kasa antondoṛa anserikia iilulwa. 36Na mwilula alli akee iwaria maṛe kiimba kya mashoṛa amwi a isanyiṛia filimu finnde muu wa miṛeṛe, na ito muveekya mbeu andu emwi na mwilula vafure andu emwi. 37Amu sumu ilya yarerwa ia dede: Muveekya mbeu ni ungi na mwilula kava ungi. 38Niń mmurumie mundeilula kindo mutakikwataria. Vvengi vakwatarie, neeni mwawwaria ngatara tawo. 39Na ifo muṛiń ulya Vasamaria veengi vakankusura kiimba kya kirero kya nka ulya andevarambuya sheeli: Anshiia foose nndetana. 40Kyasia ili Vasamaria valya vandenshea vakantereva akaa kwawo. Nae kakaa-fo mikonu ivili. 41Na vandu veengi kilanya vakankusura kiimba kya miloshie yamwi. 42Vakaia nka ulya: Alli tankusura nta nkiimba kya filya kwarera ndi, fulya tamiita ti veni tikamanya sheeli uu yye nkiṛa wa isanga dede.

43Kyasia mikonu yo ivili yansia kakwimboo-fo kafika Galilaya, 44lla kasa Yesu ye muni eerambuyee sheeli: Mwauya kisuku akooyaa tikisi urukeń lwamwi muni ndi. 45Kyasia ili andefika Galilaya, vandu va Galilaya vakawwaria kisha, fulya veelloliaa foose andetana kulya Yerusalemu nkonu wa kisuku, fulya nawo veekee kisukuń. 46Numa Yesu kasha lingi muṛiń wa Kana wa kulya Galilaya alya aaṛua mura ukava mfinyo.

Neefo eeifoo ndundi wa kwa mangi awore mwana wamwi wa iseeka alole kulya Kaperinaumu. 47Nae ili andeita Yesu ansha na kulya Galilaya auka kulya Yudaya, kaenda kwamwi kandentereva ainame kwamwi andenkiṛia mwana wamwi, fulya eekee kufui anutuke. 48Yesu kamwia: Kitaare mwaoruswa findo finini fa maṛiikiso mukusuranaa nań ndi. 49Ndundi ulya wa kwa mangi kamwia: Wui Mbee, inama da kitaare mwana wakwa annutuka. 50Llyo Yesu amwia: Kwendień, mwana wafo eefo na muu. Kyasia nndu ulya kakusura kirero kilya Yesu amwia kaenda. 51Ili akee shień eeinamaa na kyeń, vaseṛo vamwi vakakwania nae veendemwongoyaa vakamwia: Mwana wafo eefo na muu. 52Nae kavasokoda kyeeri andebooka iva ṅwana. Vakamwia: Nkwawu saa imooroka llyo muro undesia wiliń. 53Kyasia ndee kamanya nkyeeri kilya kyeni Yesu andemwia: Mwana wafo eefo na muu. Kakusurana na Yesu andu emwi na woose va kyeń kwamwi. 54Na kindo kilya Yesu andetana kya iṛiikisa vandu kiikee kya kavili, ili andeuka kulya Yudaya kasha na kulya Galilaya.

Currently Selected:

Yohane 4: RWK72

Highlight

Copy