Yohane 17

1Mfo firero fo Yesu andefirera. Kaimboo miso amwi kalla na ule iṛuvewu kanumbua: Wui Nde, kyeeri kyamfikań. Kuṅinise Mwana wafo, na Mwana wafo akwitikise iwe. 2Ni iwe kunniingie finya ya ishilia vandu woose, amu woose kwammuniingia avaniinge muu wa miṛere. 3Na muu uu wa miṛere ni ikumanya iwe sheeli ni iwe kukee Iṛuva wa dede, na ito kunrumie yye Yesu Kristo. 4Nań nankwitikisa ia isangeń naawutiaa ishoṛa lyo kwanshilivavasa lya iṛunda. 5Na alli, wui Nde, shiitikisań ifo kwafo kwishiiningaa unini lua niikee nalo kwafo lia kitaare isanga lyeentanwaa.

6Irina lyafo nallirambuya vandu va kundevashiniinga kuvauta kunu isangeń. Veekee vafo nawe kwavashiniinga. Na kirero kyafo vankiwara. 7Alli vammanya sheeli ifo foose kundeshiniinga nkwafo fuukie. 8Amu firero filya kundeshiniinga navvaniinga nawo. Nawo vakafiwara vakamanya dede sheeli nkwafo nuukie. Vakakusura sheeli ni iwe kushirumie. 9Nań wwo nkee ivaterevia. Ni isanga nkee iliterevia ndi. Vvalya kwavashiniinga, fulya wo vakee vafo. 10Na foose fikee fakwa mfafo. Na ifo fikee fafo mfakwa. Nań ifo kwawo naṅṅinisio̱. 11Nań nkikee lingi isangeń ndi. Nawo vakaa isangeń. Nań nkee isha na kwafo. Wui Nde Nsongori, varinge vakaa na irina lyafo ili kushiniingie niń, nawo vave kimwi neese. 12Ili niikee andu emwi nawo niikee iringa iwo kavashiniingie na ivalla niivandamisaa na irina lyafo. Na eefo nta umwi kari kawo andereka ndi kita mwana ulya wa ureti, amu kilya kikee kitisiṛe kyawukie. 13Na alli nkee ishań na kwafo, na firero fi nafirera nkee kunu isangeń, naamu vakaa na ifura li lliwore, nalyo liishue ifo mirimiń yawo. 14Niń navvaniingia kirero kyafo. Na va isanga vakautia-wo ivasua, fulya wo vatakee va mikae ya isanga, sheeli nań ntakee wa mikae ya isanga. 15Nkee ikutereva amu kuvaute isangeń ndi, kake naamu kuvaringe Nkituva to nkasha. 16Wo nta wa mikae ya isanga ndi, sheeli nań ntakee wa mikae ya isanga li. 17Vailise na ikyo kikee dede! Na kirero kyafo nkyo ikyo kikee dede. 18Na sheeli kundeshiruma nafika kunu isangeń, nań nkuro da nndevaruma vafike masangeń. 19Na kiimba kyawo nakwilisa, naamu nawo vailiswa.

20Kake ni iwo tubu nkee ivatervia ndi. Nkee iterevia na akwaa ni iwo vandeshikusuraa kiimba kya kirero kyawo. 21Nawo vave kimwi woose, sheeli iwe Nde kusaangi nań, nań nsaangi nawe, naamu vave kimwi neese na va isanga vautie-wo ikusura sheeli ni iwe kushirumie. 22Na unini lua kundeshiniinga iwe navvaniinga nawo vave kimwi, sheeli neese tikee kimwi. 23Niń vve andu emwi nawo, nawe kuve andu emwi nań, nawo vave vandu va imarisia iva kimwi. Na va isanga vautie-wo imanya sheeli ni iwe kushirumie niń, lingi kwavvakunda sheeli kundeshikunda niń. 24Wui Nde, mfurie na akwaa ni iwo kundevashiniinga vave andu emwi nań io nkai, amu vamakii ilolia unini lwakwa ilo kushiniingie. Amu kwashikunda ilyo kitaare isanga lyeentanwaa. 25Wui Nde nsumani, isanga likwishi ndi, kake niń nndekumanya. Nawo vakamanya sheeli ni iwe kushirumie. 26Nań nawarambuya irina lyafo, na lingi nee-ngeṛiaa ivarambuya. Na ikunda lyo kundeshikunda nalyo likaa ifo mirimiń yawo, nań nkaa nsaangi nawo.

Currently Selected:

Yohane 17: RWK72

Highlight

Copy