Yohane 15

1Niń nniń kiri kya mfinyo kya dede na Nde yakwa yye nremia. 2Na iṛamba lyoose likulungie nań likara litavika nunda alyutaa-fo. Na lia likee ivika nunda alyarambuyaa, amu lyengeṛie ivika. 3Ini mwammaa iiliswa kiimba kya kirero kyakwa namuia. 4Kaań mukulungie nań, nań nkaa nkulungie neeni! Na sheeli iṛamba litamakii ivika nunda likee kyaanya kyayo litakee kiriń kyayo, mfo kuro neeni da nta kindo mumakii mutakulungie nań. 5Niń nkee kiri kya mfinyo, neeni mukee maṛamba. Ulya akaa akulungie nań, nań nkaa nkulungie nae, ito avikaa nunda shiingi. Amu kwakooya mukurauaa nań nta kindo mumakii itana. 6Kwakooya nndu atakaa akulungie nań, akumbwaa wooṛo sha iṛamba, ifi lyauma. Na vandu vakaasaṅiṛia andu emwi vakaeeṛa muroń arongore. 7Mukankaa mukulungie nań na firero fakwa likankaa mirimiń yanu muterevaa kindo kyoose mufurie nakyo mwawutio̱o̱. 8Kuro llyo Nde yakwa eetikiswaa mukawika nunda shiingi na iva mukava vanalosho vakwa.

9Sheeli Nde andeshikunda niń, nkuro nań nammukunda ini. Kaań na ikunda lyakwa! 10Mukawara mavavaso akwa mukaa na ikunda lyakwa, sheeli nań nndewara mavavaso a Nde yakwa nakaa na ikunda lyamwi. 11Namuia ifi, naamu ifura li lishiwore limwake mini na ifura lyanu lyawukie lyoose. 12Ivavaso lyakwa llyo ili: Kundaniń mu veni na mu veni, sheeli nndemukunda ini. 13Nta eefo nndu awore ikunda inini kita ito aniingiaa muu wamwi kiimba kya ndoo tamwi ndi. 14Kyasia ini mukee ndoo takwa mukantana kilya nammuvavavasa. 15Nkimuvaangaa lingi maketi ndi, fulya iketi liishi kilya nndumi wamwi atanaa ndi. Namuvaanga ndoo, amu foose nndefika kwa Nde yakwa mfo nammurambuya ini. 16Nta ni ini mundeshisaua ndi. Nniń nndemusaua na imuvavasa mwende mundevika nunda. Na nunda to tanu muvikaa tikaa matika woose. Na kyoose muterevaa Nde na irina lyakwa amuniingaa. 17Llyo ili ivavaso lyakwa: Kundaniń mu veni na mu veni!

18Kwakooya isanga li lyamusua, manyiń sheeli nniń lindebooka ishisua kitaare lyamusua ini. 19Kifo mwikee va isanga li, isanga liimukundaa sha kindo kyayo. Kake ili kitaare mukee va isanga, nań nammusaua namuuta kunu isangeń, nkyo kiimba isanga likamusua ini. 20Kumbueń kirero kilya nndemuia: Iketi ni inini kita nndumi wamwi ndi. Kwakooya vandeshiumbuta niń, neeni nkuro da vashemuumbutaa. Kifo veewaraa kirero kyakwa, veewaraa na kyanu. 21Kake ifi foose vamutaniaa kiimba kya irina lyakwa, fulya vateeshi ulya ashirumie. 22Kifo kitaare nashe na irera nawo, veevaa na urekwa ndi. Kake alli vawore kindo kya ikuuta mareko awo ndi. 23Nndu kashisua niń asua na Nde yakwa. 24Kifo kitaare neendundaa mashoṛa kwawo atandeṛundwa ni nndu ungi kuuka, veevaa na mareko ndi. Kake alli valolie na ishisua vakashisua niń na Nde yakwa. 25Kake kyawara kirero kilya kikee kitisiṛe ifo uvavasoń lwawo kyawukie sheeli: Vandeshisua kya ruu kuṛań. 26Kake ili muwolisa mirima ashaa ulya ninrumaa auka kwa Nde akee Mumuyo wa dede aukaa kwa Nde, yye ashirambuaa. 27Neeni da muvaa varambua vakwa, amu kuuka mbooko mwikee nań.

Currently Selected:

Yohane 15: RWK72

Highlight

Copy