Mitanie ya varumi 11

1Kyasia varumi na vaaroe vawo vakee kulya Yudaya vakaita sheeli na vayavaṛumu vawwaria kirero kya Iṛuva. 2Neeli Petiro anderwa Yerusalemu, valya vakee varini vakavingana nae 3veenumbuaa: Kundeaka kwa vandu vatakee varini kwalya nawo. 4Petiro kabooka ivaongoya kwa useli eereraa: 5Niikee muṛiń wa Yope niiterevaa nailashika makusaṛo nalolia myorusie ya kindo kivakani na nseto nnini kiiolotwaa kyuka iṛuvewu na mikyendu yayo iini kikashifikia. 6Nakilla koroo niikusaṛaa nalolia mafisi a urukeń awore marende aani na mafisi a usakeń na aafuafuaa na si na ndee ta kwa si ya iṛuvewu. 7Naita ununga lwishiaa: Kwimboo Petiro, sikya kulye! 8Nanumbua: Wode Nndumi, amu kindo kyoose kikee kikasha na kitakee kisongovisi kyamiira kaniń kakwa ndi. 9Ununga lukashaaṛua lingi lya kavili luuka iṛuvewu: Filya Iṛuva amfiilisa manya iwe kutafaaṛue mfikasha. 10Kindo ki kyatanika kararu. Numa Uyo findo fo fiwiiṛwa iṛuvewu. 11Na lia eni vandu vararu vakasalala mwaangoń wa numba yo niikaii varumwa kwakwa vauka Kaisaria. 12Mumuyo kashiia neende andu emwi nawo ntawore inunua. Na vanavamae iva varindaru vakaenda variani nań. Tikaira na numba ya nndu ulya. 13Nae katoongoya sheeli alolia malaika aselele numba kwamwi na imwia: Ruma vandu vaende Yope vavaange Simon avaangwaa Petiro. 14Yye akuṛuiyaa firero fa ikukira iwe andu emwi na va numba yafo yoose. 15Ili nndebooka irera, Mumuyo Nsongori ka vaolokia sha lia atoolokia neese ilyo mbooko. 16Nań nakumbua kirero kilya kya Nndumi akirera: Yohane abatisa na mura, kake ini mubatiswaa na Mumuyo Nsongori. 17Kyasia kwakooya Iṛuva avaniinga wavi lua weni andetiniinga ise tikusure Nndumi Yesu Kristo, niń nniń i mmakii iima Iṛuva? 18Ili vandeita firero fo vakasia do vakaṅinisa Iṛuva veenumbuaa: Kyasia Iṛuva allilia na vayavaṛumu vakooye ikurra nawo vakooye muu.

19Kyasia valya vandetaṛakana kiimba kya ukiva lundevavia lwa mboni ya Stefano vakaenda kumande Foinike na Kipiro na Antiokia nta yongoya nndu mboni yo kita Vayuda da kyaanya kyawo. 20Kiindi kyawo veekee vandu va Kipiro na va Kirene. Iwo ili vandefika Antiokia vakakwanisia na Vagiriki mboni shisha ya Nndumi Yesu. 21Na uko lwa Nndumi lwikee andu emwi nawo na vandu veengi vakailashika vakakusura Nndumi. 22Na mboni to ta vandu wo tikafika marwiń a siṛi ilya ikee kulya Yerusalemu. Vakaruma Barinaba aende Antiokia. 23Nae ili andemaa ifika kalolia wavi Iṛuva awaavia kafura nnu kaikimba woose vakuware na Nndumi na ngoo toore finya. 24Amu eekee nndu nnuru eeshule Mumuyo Nsongori na nndu wa ikusura. Na vandu kinga vakaaṛukia Nndumi. 25Numa Barinaba kakwimboo kaenda Tariso indeṛuya Saulo. Ili andemaa illolia kamunnde Antiokia. 26Nawo vakakaa ifo siṛiń ilya andu a mwaka umwi vakalosha vandu veengi. Na io Antiokia wwo vanalosho vandebookia ivaangwa Vakristo. 27Mikonu yo vaauya vakainama vauka Yerusalemu vakafika Antiokia. 28Kakwimboo umwi wawo irina lyamwi ni Agabo kaorusa eeitikwaa mMumuyo Nsongori sheeli ishaa soto nini isangeń koose. Nayo ikasha kyeeri kya Kaisari Kilaudio. 29Na Vakristo valya vakakurera oo nndu aute weleki kisumani na masaa amwi lurikio̱ vanavamae valya vawo vakee kulya Yudaya. 30Vakatana kuro vakarikia vasuṛi va siṛi ilya kwa maako a Barinaba na Saulo.

Currently Selected:

Mitanie ya varumi 11: RWK72

Highlight

Copy