Mitanie ya varumi 1

1Teofilo wakwa, kitabu kilya kya ibooka nndekusongosia kiwore mboni ta filya foose Yesu andetana na ilosha kuuka mbooko 2kumande nkonu ulya andevavasia vaseṛo vamwi valya eevasauaa mashoṛa awo kwa finya ya Mumuyo Nsongori karoswa iṛuvewu. 3Wwo iva andevakurambuya numa ya mavaviso amwi sheeli akee na muu eevaorusaa firingisio fiingi. Kakulolisa kwawo andu a mikonu makumi aani na irera nawo fa umangi lwa Iṛuva. 4Neeli andemaa ivasandia kavavavasa vatauke kulya Yerusalemu, kake vaverie-fo kirekio kilya kya Vaava. Kavaia: Nkirekio kilya mundeongoywa nniń. 5Amu Yohane abatisa na mura, kake ini mubatiswaa na Mumuyo Nsongori, na kuuka nnu mmikonu myaangu da iseere. 6Na valya veekusandiee-wo vakamwuṛa: A le Nndumi, kyeeri kyo kikamfika Uyo kuwiiṛiaa vandu va Isiraeli umangi lwawo? 7Nae kavaia: Mmashoṛa anu imanya feeri ana kiṛengo kyeendeṛio̱o̱ Vvaava kwa walio lwamwi ndi. 8Kake ini muniingwaa finya ili Mumuyo Nsongori amusheaa. Neeni muvaa varambua vakwa kunu Yerusalemu na Yudaya koose na Samaria na kumande mbaai ya isanga. 9Ili andemaa irera ifi kaimbolo na ule veemullaa na iṛumbe likawwaria likamwuta misoń awo. 10Ili vakirekie illa iṛuvewu kundo eendaa nafo, lia eni vandu vavili vakasalala kufui nawo vaṛee miseto myeelwa. 11Nawo vakavaia: Muṛe womi va Galilaya, nkiki ili muselele ia mwillaa iṛuvewu? Yesu uu, autwa kwanu karoswa iṛuvewu, nkuro akaa ashe lingi sheeli mwammulolia eerwaa iṛuvewu.

12Kyasia vakauya veendaa Yerusalemu vauka kulya uroń ivaangwaa lwa misenifu lukee kufui na Yerusalemu. Nalo lukee weendo lusumani lwa yenda kyeenga kya saa imwi. 13Neeli vandemaa yaka numba vakasaama kai alya veekaa. Nawo ni Petiro na Yohane na Yakobo na Anderea na Filipo na Toma na Baritolomayo na Matayo na Yohane wa Alufayo na Simon Selote na Yuda wa Yakobo. 14Iva woose veekuumbiee andu emwi na ngoo imwi nsi veeterevaa andu emwi na vaka valya na Maria mae wa Yesu na vanavamae.

15Kyasia mikonu ilya Petiro kasalala kari ka vanavamae — nawo veekee andu emwi sha vandu iyana limwi na makumi avili — kanumbua: 16Muṛe womi na vamwanama, kyawara mitisine ilya ifitwa Mumuyo Nsongori anderera ilyo mbele na kana ka Davidi kiimba kya Yuda ulya andeorusa valya vandewara Yesu shia. 17Fulya eekee ntaalie andu emwi neese kaniingwa kyeenga sheese kya uṛundi lu. 18Yuda uu kauṛa nrema na fesa tilya ta ukasha lwamwi kawa si na nrwe kariika ndewu na maala woose akaiṛuka-fo. 19Kikamanyika kwa vandu woose va kulya Yerusalemu. Na nrema ilya ikavaangwa na mirerie yawo Akelidama, nkimwi na nrema ya usao. 20Fulya kikee kitisiṛe kitabuń kya fiimbo fa Davidi: ”Kirembo kyamwi kive kidenge, ateere nta nndu aruaa-fo“. Na lingi: ”Mashoṛa amwi awario̱ ni nndu ungi“. 21Kyasia kyawara nseṛo ungi asaulwa ave nrambua wa iṛuka lya Yesu andu emwi neese wa valya, veekee iṛuyana neese kyeeri kyoose, 22ili Nndumi Yesu andeaka kweru na isomuka kuuka ubatiso lwa Yohane kumande nkonu ulya andesaamiswa iṛuvewu. 23Vakaseṛeesa vavili. Ulya umwi ni Yosefu Barisaba eevaangwaa lingi Yusto, na wa kavili mMatia. 24Vakatereva Iṛuva veenumbuaa: Wui Nndumi, ni iwe kwishi ngoo ta woose. Kutooruse ulya kwansaua kari ka iva vavili, 25awarie mashoṛa a uṛundi lua lwa varumi, Yuda andekasheesa kakureta muni. 26Vakakaba wuuku na wuuku lukawoya Matia. Nae kalunganiswa na varumi valya ikumi na umwi.

Currently Selected:

Mitanie ya varumi 1: RWK72

Highlight

Copy