Mateo 11

1Na yakwilaga aho Yesu wamalaga kuvalagila vahemba vakwe ikumi na vavili, wafumaga kwenuko na wajaga kukahembeka na kukatanizya mu makaya gavo.

2Alisi aho Yohana waliwayigwa mu jela milimo yamwa Kristo wavatumizaja vahemba vavili kukamuvuzya: 3Veve uli mwenuyu homwene aliza, ninga tumulindile ungi? 4Na Yesu witavukaga na wavawilaga, Jagi mukamuwile Yohana genaya muligwa na muligavona: 5vahofu valivona, valema valiyumba, va mbizi valipiziwa, vakiva matwi valigwa, vafwile valihembuka, na vapina valitaniziwa Mhola ya Chelu. 6Na welukilwa homwene akangayilizizye nene.

7Na aho venavo vajaga, Yesu wavukizaja kuyiwila mbuto ya vanhu kunguno yamwa Yohana: Mwajaga kwibalangu kukilolelaki? Idete holyene lilihungeziwa 8na muyaga? Ninga mwajaga kukavonaki? Munhu azwalile myenda mikondu? Lolagi, venava vazwalile myenda mikondu valimo mu manumba ga vatemi. 9Ninga kuki mwajaga? kukamuvona mufumbuzi? 10Ahene, ndimuwila inwe, kukila mufumbuzi! Ali mwenuyu kunguno yakwe yatonilwe,

Lolaga, nene ndimutumizya mutumwa hambele na vusyu wako,

Homwene akuyivezelezya nzila yako hambele naʼho.

11Yalole ndimuwila inwe, mugati na venavo vavyalilwe na vakima akavukile umo muhanya kukila Yohana Moja; alisi mudomudo mu vutemi wa mwilunde ali muhanya kukila uyu. 12Alisi kufuma nsiku zyamwa Yohana Moja kusika lelo vutemi wa mwilunde vulikowa 13na nguzu, na va nguzu valivusampuzya. Kwisi vafumbuzi vose na ngʼhama zyafumbulaga kusika hʼitungo lyamwa Yohana. 14Na ulu mulikova kuyisanizya, mwenuyu ali Elia homwene alakiza. 15Homwene ali na 16matwi ga kwigwa, adegeleke. Alisi nawikolanizye naki vuvyalwa wenuvu? Vulivikola vayanda hovene valikala hʼigulilo na valivahamukila vichavo, vuhaya, 17Twamufulilaga inwe filimbi na mukanegulile; twalilaga makungwi na inwe mukalilile kililo. 18Kwisi Yohana wizaga, akalyaga na akanwaga, na vanhu vayombaga, Ali na mugavo. 19Mwana wa Munhu wizaga, akulyaga na akunwaga, na valiyomba, Munhu wa kalya na kanwa, munwani wa vʼihongo na vakenaguzi! Alisi ngelo yagololagwa na milimo yayo.

20Haho wavukizaja kugasemelela makaya genayo mugati nago milimo yakwe mingi ya nguzu yitagwa, kunguno gakapilukile moyo. 21Musyolo kuwako Korazini, musyolo kuwako Betsaida, kwisi ulu migaka hoyene yitagwa mugati ninwe mbe yitagwa mu Tiro na Sidoni mbe vapilukile moyo kale na kuzwala magunila na kwikala mu mavu. 22Alisi ndimuwila: Ago galakwilile Tiro na Sidoni ha kitanga galave mabuhu kukila ginwe. 23Na veve Kapernaumu, ukalihilizivilwe kusika mwilunde? Ukukandamiziwa kusika hamizimu; kwisi ulu migaka yavezivagwa mu Sodoma hoyene yavezivagwa muwako, 24mbe yavagiho kusika lelo. Alisi ndimuwila inwe: Ago galayikwilile Sodoma ha kitanga galave mabuhu kukila gako.

25Hʼitungo lyenilo Yesu witavukaga, uhaya, Ndikulumbila Vava, Guku wʼilunde na wa liwelelo, kwisi wagavisaga genayo hambele na va ngelo na va masala, na wagafumbulaga hambele na vana vado. 26Ahene Vava, kwisi hosyene yakutogezaja veve. 27Gose gatavulilwe hawane na Vava, na kuduhu ungi alimumanicha Mwana sumbwa Vava; ninga kuduhu ungi alimumanicha Vava sumbwa Mwana na mwenuyo homwene Mwana akumufumbulila. 28Mwize hawane inwe vose muliduka na mwidwikile miligo, na nene nkumupa inwe kisuho. 29Muvagalage mudala gwane na muhembekwe na nene, kwisi nene ndi mudekanu na mukondu wa moyo, na mukuvona kisuho ku myuye yinwe. 30Kwisi mudala gwane guli mukondu na muligo gwane mubuhu.

Currently Selected:

Mateo 11: Nym51

Highlight

Copy