Lukasi 15

1Na vʼihongo na vakenaguzi vose vamwegelaga, vamwigwe. 2Na Vafarisayo na vamanicha fitabu vingʼungʼulaga na vayombaga, Mwenuyu alivanukula vakenaguzi na alilya hamohene navo.

3Alisi wavawilaga mukolani ugu, uhaya, 4Nani mugati ninwe ali nazyo ngʼholo igana, na ulu mugati nazyo wayizimizya yimo kuzileka ngʼo makumi kenda na kenda mwibalangu na kuyilondezya iyo yazimilaga kusika wayivona? 5Na aho wayivonaga aliyivagala ku mavega gakwe na kudeha; na ulu alingila mu kaya alivitana viye na vazenganwa, uvawila, 6Mudehe hamohene na nene, kwisi nayivonaga ngʼholo yane yazimilile. 7Ndimuwila inwe, sisyo kukuviho kudeha kwilunde kunguno ya mukenaguzi umo alipiluka moyo, kingi kukila vagololoku makumi kenda na kenda hovene vakafundile kupiluka moyo.

8Ninga mukima ki homwene ali na shilingi ikumi, na ulu wayizimizaja yimo kuyivacha ngʼo tala na kuyipyagula numba na kuyikova munogwene kusika wayivona? 9Na aho wayivonaga alivitana viye na vazenganwa, uhaya, Mudehe hamohene na nene, kwisi nayivonaga shilingi hoyene nayizimizaja. 10Sisyo ndimuwila inwe, kukuviho kudeha hambele na malaika va Mulungu kunguno ya mukenaguzi umo homwene alipiluka moyo.

11Na wayombaga, Munhu mbati wavagi na vana vavili. 12Na mwana mudo mugati navo wamuwilaga ise, Umpe nene ifungu lya nsavo holyene likuviho kuwane. Na wavagavulilaga nsavo. 13Na hanuma na nsiku ndo mwana mudo wagakumingaga gose na wajaga ku chalo kule, na kwenuko wazitagagulile nsavo zyakwe na kalya na kanwa. 14Na aho wagamalaga gose nzala nhanya yingilaga mu chalo chenicho, nawe mwene wavukizaja kutuva nzala. 15Na wajaga wisugaja ha umo muna chalo icho, na uyo wamutumizaja ku malale 16gakwe kuzidima nguluve; na watamanilagwa kuyokazya nda yakwe na mapalala hogene nguluve zikulyaga, na kuduhu umo wamupa kinhu. 17Alisi aho wiyinamilaga mu moyo gwakwe na wayombaga, Vatumami vanga vamwa vava vali na chakulya kingi na 18kulekela, alisi nene ndifwa na nzala. Nkuvuka na nkuja kumwa vava na nkumuwila, Vava, nakenagulile hambele nʼilunde na hambele naʼho, nkasikile isima 19kwitanwa hangi mwana wako, umbezye kitisi umo wa vatumami vako. 20Na wavukaga na wajaga kumwa ise. Alisi aho wavagi atali kule ise wamuvonaga na wasativagwa lusungu kuwakwe, na wapelaga na wamukumbataga ha nhingo yakwe na wamunonelaga. 21Alisi mwana wamuwilaga, Vava, nene nakenagulile hambele nʼilunde na hambele naʼho, nkasikile isima kwitanwa hangi mwana wako. 22Alisi ise wavawilaga vakumba vakwe, Mulete mwenda musoga gwa mbele na mumuzwike, na mumuzwike pete ha kukono kwakwe na 23filatu ha magulu gakwe, na mulete kadama kanelezu 24mukasike, na tulye na twisinye; kwisi mwana wane mwenuyu wavagi wafwile, alisi wapembukaga hangi; wazimilile na wavonagwa hangi, na vavukizaja kwisinya. 25Alisi mwana wakwe muhanya wavagiko ku mugunda, na aho wizaga na wayegelaga numba, wigagwa mizwi zya nimbo na kwisinya, 26na wamwitanaga umo wa vakumba na wamuvuzaja nguno ya genaya. Na uyu wamuwilaga, Muzunayo wizaga, na nso wakasikaga kadama kanelezu kunguno wamupivagwa hangi mupanga. 27Alisi uyu wakilagwa na wakanaga kwingila. 28Haho ise wafumaga na wamulombaga. 29Alisi uyo witavukaga na wamuwilaga ise, Lolaga, myaka yose nakutumamilaga veve na ntali kugukenagulila mukumo gwako, na utali kumpa nene kagulati kigele nisinye hamohene na vanwani vane. 30Alisi aho mwana wako mwenuyu wizaga, homwene wazilile nsavo zyako na 31vangʼhya, wamusikilaga kadama kanelezu. Alisi uyo wamuwilaga, Mwana, veve nane tuli hamohene hanahana, na gose gane gali gako. 32Alisi yatudima iswe twisinye na tudehe, kwisi muduguyo mwenuyu wafwile na wapembukaga hangi, wazimilile na wavonagwa hangi.

Currently Selected:

Lukasi 15: Nym51

Highlight

Copy