Maliko 12

Ishiholanyo sha mugunda wa mampensya

1-12: Mat. 21,33-46. Luk. 20,9-19.

1Pʼahandʼukuyanga navo muṿiholanyo, ahati: Pʼali wokʼumuntu, wʼahavwalʼumugunda wa mampensya, nuluvaga ahazenga, ninchelenje iya kufinyila mumwʼamampensya ahabana, ninganzya ahazenga, ahavaleshelʼavalimi, pʼahavala kunsʼiyinji. 2Ilelo lwe ginzilʼamanda ga mampensya, pʼahatumʼumunyamata uwa kuvalʼukumusendela zimʼinsanga zya mampensya kuvalimi. 3Avene vahamulema, vahamuhoma, vahamuvinga lwe vatamupiye nazimo. 4Pʼuwenʼahavuyizya nohavili, ahatumʼumunyamatʼuwamwavo. We vahamuṿwalazya mwitwe, vahamuliga. 5Havili ahatumʼuwamwavo. We vahamugoga, vahahonzya navo vovulo navamwavʼavinji. Vamo vahavahoma, vamo vahavagoga. 6Ilelo pʼali numwana wakwe umulumendo wokʼimozi, unkundwa kukwakwe, wʼahavatumila pisinda, ahati: Uwenʼumwana wane we valimunyila. 7Avene nyene avalimi vahati: We wa pavupwanʼuno, shushi tumugoje, pe tukuva swe va pavupwano sweneswe. 8Pe vahamulema, vahamugoga, vahamufumwa mumugunda wa mampensya, vahamutaga. 9Alituvuli navo lelo umuhatamugunda wa mampensya? Aliyinzʼukuvagogʼavalimi vanava. Uwenʼumugunda wa mampensya alipwanizyʼavanji pupo. 10Apene pakalata imwe mutapazile nalumo pe pakuti:

Ivwe lye valisufizyʼavazenganyumba,

lye havili liyipezilʼukuva lya pashipembe;

11ShʼahonzizyʼuMwene ukulipela vovulo,

atili live lilyo lya kusukumila kuminso gitu?

12Avene vahati tumuleme, havili vahogopʼimpuga ya vantu. She vashazilʼishiholanyo shinishi, vahati akututaha sweneswe. Pe vahamuleha pupo, vahepa.

Ukuvuzilizyʼizya musonko wa Kesali

13-17: Mat. 22,15-22. Luk. 20,20-26.

13Pe vahavatuma kukwakwe vamo avaFalisayi navantu va Helodi, vahati ve vamwambambe mwilomu lyakwe. 14Ve vahavalʼukuyanga nawo vahati: We Musambilizi, twazile we wa nalyoli, ninsoni nazimo kuvantʼiwe. She numʼumuntu utakumuseva muvwinza kuminsʼiwe ndali, avantu ukuvalanga lye lya nalyoli idala lya Mulungu. Amwe hinza ukusonkʼumusonko kwa Kesali, amwe ndali? Amwe tusonkaje, amwe tutasonkaje? 15Uwene nyene ahamanyʼishifumbo shavo, ahati: Mukundinga shonu? Simumpʼidinali, nenye! 16Pe vahamulanga lwoka. Uwenʼahati: Amwe ishiholanyʼishi sha nanu nuvusimbe vwe vasimṿile pupo? Vahati: Vwa Kesali. 17PʼuYesu ahamula ahati: SimupanjʼuKesali iṿwa pavuKesali vwakwe, wope nuMulungu mumupanjʼiṿwa pavuLungu vwakwe. Pe vahasukumila kuli wuyo.

Ukuvuzilizyʼizya kuzyuha

18-27: Mat. 22,23-33. Luk. 20,27-38.

18Pe vahapalamila navaSadusayi ve vakuhana vakuti ukuzyuha kutalipo. Vope vahamuvuzilizya vahati: 19We Musambilizi, uMose alajizizye mwa kalata wakwe atili: Ingʼumunine wa muntu afuye, alesilʼumushi wakwe lwʼatapafile numʼumwana, pe pakuti umunine amupwanajʼumushi, amupapilʼavana umunine. 20Ilelo pe vali avanamuntu vasano navavili. Pʼumukulu wavo ahasendʼumwantanda, ahafwa lwʼatapafile numo. 21Pʼahamupwanʼuwa vuvili. Wope ahafwa lwʼatapafile numo. Wope nuwa vutatu vovulo. 22Vovulo ve vasano navavili, vonti vahafwa lwe vatapafile navamo. Pisinda kuli vonti pe wope numwantanda ahalandatʼukufwa. 23Inga lumo lelo lwe vazyusile vontʼavantu, pʼakuvʼumushi wa nanu? She vonti vamusenzite ve vasano navavili.

24PʼuwenʼuYesu ahamula ahati: Zye zizyo mukupuva, she nukalata mutawumanyile namaha ga Mulungu mutagamanyile. 25Shʼukuzyuha lwe vazyusile kuvafwe, pe nukusenda vatalisendaga, nukusendwa vatalisendwaga ndali, valiva fwe ve vahavizya va kumwanya. 26Ukwene nyenʼukuzyuhʼavafwe— mutalyazile mwa kalata wa Mose, mwʼakutuvuzyʼizya palwangwa pala, lyʼuMulungu ayanzile nawo lyʼatili: Nene ne Mulungu wa Abulahamu, ne Mulungu wa Yisikaka, ne Mulungu wa Yakobu? 27UwenʼuMulungu ate Mulungu wa vafwe ndali, wa valanzi! Mukupuva nkani.

Ukuvuzilizya izya luhomelezyo ululusyʼuvupiti

28-34: Mat. 22,34-40. Luk. 20,39; 40. Luk. 10,25-28.

28Pʼahapalamila wokʼumumanyakalata, wʼahatejelezyaga lwe vakudalinkana nawʼamadali, wʼawenyi pakuti ayamula ahinza, ahamuvuzilizya ahati: Uluhomelezyo ululusyi kunkomelezyo zyonti lwe luli kwi? 29UwenʼuYesu ahamula ahati: Uluhomelezyo ululusyi lwe lunulu: Tejelezyaga we Yisilayili, shʼuMulungu uMwene witu wʼuMwene wuyo weka, 30umukundajʼuMwenʼuMulungu nawe mwoyo waho wonti, ninsingo yaho yonti, nukusiva kwaho kwonti, namaha gaho gonti. 31Ulwamwavo ulunine lwe lukuti: Wope nuwamwinyu umukunde inza shʼuyikunzite wenewe. Uluhomelezyo ulwamwavʼulupiti kulʼizi lutalipo nalumo. 32Pʼumumanyakalata ahitiha ahati: Nalyoli we Musambilizi, uyanzile ulovosizye lwʼutili, alipo Wuyo weka, atalipo numʼuwunji kuluvazu kukwakwe. 33Nishikunzi sha kumugunda Wuyo nawe mwoyo waho wonti, nakwe kusiva kwaho kwonti, nage maha gaho gonti, nishikunzi sha kumukunda nuwamwinyu inza shʼuyikunzite wenewe—she shilusizyʼuvwinza nimputilʼindungulizu nimputile izinji zyonti. 34UwenʼuYesu lwʼayazilʼayamuyʼahinza izya njele, pʼahamuvuzya ahati: Iwe utʼapatali pavumwene vwa Mulungu. Pe vahamunyila lelo ukumuvuzilizya zimo vonti mwe vavaliye.

UChilisiti uMwana-Davidi

35-37: Mat. 22,41-46. Luk. 20,41-44.

35UwenʼuYesu lwʼavasambilizya mwa tempeli, pʼahavavuzilizya ahati: Lye vatili vayangaje vuli avamanyakalata lye vakuti uChilisiti umwana-Davidi? 36ShʼuwenʼuDavidi lwʼakuyanga mwa MupepʼuMufinjile pʼakuti:

UMwene ayanzile kwa Mwene wane atili:

Tendamaga kumuhono wanʼumulilo, uhafishe pupo pʼavalugu vaho ndivapelʼukuva hatengo aha kuviha pupʼiṿinama ṿwahʼiwe.

37UwenʼuDavidi akumuyangʼukuva wʼuMwene wakwe. Pe havili avanjʼumwana wakwe vuli? Pʼavantʼimpugʼimpiti vahaseshela lwe vakumwiṿwa.

Insoshe kuvamanyakalata

38-40: Mat. 23. Luk. 20,45-47.

38Havili munsambilizyo zyakwe ahati: Mwandajʼavamanyakalata, ve vakwanzʼukuzwalʼinkanzu intali lwe vakujendanga munkaya nukulamukwa mumasolo, 39namumasinagogi mwope niṿitengo ṿwa vupiti, nashenga vakuvalʼukutendama ukulyʼiṿintu pope vakuyisevela pavwimishilwʼavene. 40Vakulinga valiyʼinyumba zya vantandʼavafwile, pe havili vakuputʼimputʼintali izya shifumbo. Avene valisundwʼisunde ilusyi lwe vakulongwa.

Iṿwa shikuku ṿwa mwantandʼumuzishe

41-44: Luk. 21,1-4.

41PʼuYesu ahatendama ahalungamana nimbogoso iya kutajila mumwo iṿwa kusangulizanya. Ahenyʼavantu lwe vakutajila mumwo impiya zyavo mumbogoso. Ahenyʼavadumbwe ve vinji vahatajila mumwʼimpiyʼinyinji. 42Pe wope numwantandʼumuzishe umupina ahatajila mumwo twahelanyusu tuvili, twe tukupelʼihela lyoka. 43PʼuYesu ahavitʼavasundikwa vakwe ahavavuzya ahati: Nalyoli, nkuvavuzyʼine nkuti: Umuzishʼumupinʼuno avalusizyʼukutajila vonti ve vatajila mumbogoso ya kutajila mumwo iṿwa kusangulizanya. 44She vonti vanava lwe vakutajila mumwo, pe vakusenda mwe ṿivatangaliye, uwene wununo nyene muvupina vwakwe atajiye ṿiṿwo ṿwʼali naṿwo iṿwa nzala.

Currently Selected:

Maliko 12: NYi1965

Highlight

Copy