Maliko 11

UYesu akwinjila mu-Yelusalemu nuluseshelo ulupiti

1-10: Mat. 21,1-9. Luk. 19,29-38. Yoh. 12,12-16.

1Lwe vasenjeleye naku-Yelusalemu naku-Betifage naku-Betaniya lwe vamakufiha nakwIgamba lya Mavula, pʼuYesu ahavatumʼavasundikwa vakwe vavili, 2ahavavuzya ahati: Muvale munkayʼila ye mulungamine nayo. Lwe mukuvalʼukufiha, pe mutalihavʼukwagʼinyana ya ndogovi ye vakunzile, ye numʼumuntu atalimbiye nalumo. Ye musatule muhaletʼuku. 3Ingʼumuntu wumo akuvavuzilizya akuti: Mukuhonzya vuli? pe muhatinji: ShʼuMwene akuyanza, pʼaliyigalusya naluvilo uku. 4Pe vahavala, vahagʼinyana ya ndogovi, vayikunzile kushilyango kunzi pidala. Pe vahayisatula. 5Pe vamo ve vimiliye pupo vahavavuzilizya vahati: Mwe shonu, mukusatula yashʼinyana ya ndogovʼino? 6Avene vahayanga lilyo lyʼavavuzizyʼuYesu, pe vahavaleha. 7Pʼinyana ya ndogovi vahayitwala kwa Yesu. Pe vahalʼamenda gavo pamwanya pandogovi, pʼuwenʼahalimbila. 8Vamo nyenʼavantʼavinji vahalʼamenda gavo mwidala, avamwavo insamba zye vahapanyulaga mumakwi. 9Pe vonti ve valongoleye kwilongolela nave valandite mwisinda vahavilishila vahati: Hosyana, mulotwa wʼakwinzila mwizina lya Mwene. 10Vulotwa uvumwene vwa Tata uDavidi, vwe vukwinza. Hosyana kumwanya. 11Pʼahavalʼukufiha mu-Yelusalemu, ahinjila mwa tempeli. Ilelo lwʼatalanginye mwonti ukwenyelezya zyonti, pʼahaga vwiliye. Pʼahafuma ahavala mu-Betaniya navasundikwa vakwe ishumi navavili.

Ituvu isita nsanga

12Isiku lya ndavi lelo lwe vakufuma mu-Betaniya, pʼuwenʼahaga yikumulumʼinzala. 13Ilelo lwʼawenyʼituvu lya matundʼaminji ukutali, pʼahavala ahati nenye inga lihomilʼamakunyu. Ilelo lwʼafisile pʼahaga gamezile ge matundu geka. Shʼamanda ga kuhomʼamakunyu gashili. 14Pʼahalivuzya ahati: Ilelo pe shima numo atalyanje nalumo insanga papaho. Avasundikwa vahiṿwa zinizi.

UYesu akuzelufwa mwa tempeli

15Pe vahavalʼukufiha mu-Yelusalemu, ahinjila mwa tempeli, pʼahavavinga mumwo nave vahakazyaga nave vahakalaga mwa tempeli, niṿitala ṿwa vuvo ve vahatananyagʼimpiya niṿitengo ṿwa vakalankunda ahaṿibenulanya. 16Ahavalesya nave vahatinji vatushe ilya mwa tempeli lwe vanyatuye yimo. 17Ahavalanganizya ahati: Amwe litasimṿilwe lye likuti: Inyumba yane yilitashilwa ukuva ye nyumba ya kuputila mumwo vontʼavakunzi? Nkandʼimwe muyipezilʼukuva ninga ya vapumaṿintu. 18Zye vahiṿwa navashiputʼavapiti navamanyakalata zinizi, pe vahanzʼizya kumugojela; havili vahogopʼavantʼimpuga yonti, she vahasukumila munsambilizyo zyakwe. 19Shima ahalinga lwe vwiliye shamazuva, pʼahafuma munkaya mumwo.

Amaha ga lwitiho

20Shanzanche lwe vakutuha, pe vahagʼituvu lila lyumile nage mazi. 21Pʼahakumbuha UPeteli ahamuvuzya ahati: Labi, yenya, ituvu lila lyʼulitifile lyumile. 22PʼuYesu ahamula ahati: Muve nulwitiho lwa kumwitihʼuMulungu. 23Nalyoli, nkuvavuzyʼine nkuti: Uno wengʼakuyanga kwigamba linili akuti: Vuhagʼuyitaje mwa sumbi, ilelo asite nukuganagana mumwoyo wakwe, nkandʼali nulwitiho lwe lukuti zikwinza zizyo zyʼayanzile zikuyipela, wʼaliva nazyo. 24Mwe mumwo nkuvavuzya nkuti: Vwonti ṿwenga mukulava lwe mukuputa, muvanje nulwitiho lwe lukuti tukuposhela, pe muliposhela. 25Inga mwimiliye mukuputa, pe muswilʼamalandu ga muntu wengʼali nago kulʼimwe; pe wope nuSo kumwanya ukuti agaswile namwʼamalandu ginyu. 26Ingʼimwe mutakuswilʼamalandu ga vamwinyu, pe wope nuSo kumwanya atakuswila namwʼamalandu ginyu.

Vahamuvuzilizyʼu Yesu amaha gakwe

27-33: Mat. 21,23-27. Luk. 20,1-8.

27Pe vahafiha mu-Yelusalemu nohavili. Ilelo lwʼakujendanga mwa tempeli, pe vahapalamila kukwakwe avashiputʼavapiti navamanyakalata navasongo. 28Vahamuvuzilizya vahati: Zyʼukuvomba ukuvombelʼamaha vuli? Unanʼakupiyʼamaha ganaga atili uvombaje zinizi? 29UwenʼuYesu ahamula ahati: Nane mbavuzilizyajʼizwi lyoka. Inga mwambuzya lyenelyo, pe nane nkuvavuzyʼamaha ge nkuvombela zinizi kwe gafumile. 30Ulwozyo lwa Yohani lwafumile kumwanya amwe kuvantu? Simumbuzye. 31Pʼavene vahanongʼonelana lwe vayelelesile, vahati: Inga tukuti lwafumile kumwanya, pʼuwenʼalitinji: Pe mwali nishonu ukumwitiha? 32Amwe tutinji valwasite ve vantu?—Havili vahavogopʼavantu, she vonti vamulemilʼuvukuvwi uYohani. 33Pe vahanawamulʼuYesu vahati: Tutalumanyile. Pe wopʼuYesu ahamula ahati: Pe fwane lelo nane ntakuvavuzya kwe gafumilʼamaha ge nkuvombela zinizi.

Currently Selected:

Maliko 11: NYi1965

Highlight

Copy