Matayi 11

UYohani umwozyi

1Ayazile lelʼuYesu lwʼamazilʼukuvalajizyʼavasundikwa vakwe ishumi navavili, pʼahavuha ahepa pupo ahavalʼukusambilizya nukukumusyʼintumi mwonti munkaya zyavo. 2UwenʼuYohani lelo mujela, lwʼayiṿuye zizyo zyʼahavombagʼuChilisiti, pʼahatumʼavasundikwa vakwe vavili kukwakwe, 3ahamuvuzya ahati: Amwe wewe we vatinji akwinza, ingavanga tumugulililajʼuwunji? 4UwenʼuYesu ahamula ahati: Simuvale muhamuvuzyʼuYohani nazye mukwiṿwa nazye mukwenya: 5Avantonko vakwenya, ve vakudyogolela ukujenda vakujenda vakugolosya, avamambombo vakupela, avakutwi vakwiṿwa, avafwe vakuzyuha, avasamusu vakwiṿwʼintu-mʼinyinza; 6havili nkuti: Musangalusu wengʼatakupunula mulʼine.

7Lwe vavala vanava, pʼahanda pupʼuYesu ahamuyangʼuYohani kuvantu ve vahomine pupʼimpuga ahati: Mwavalʼukwenya shonu mulwugwa? Mwavalʼukwenyʼitete lye likuyihana kunkungu? 8Amwe muvazilʼukwenya shonu lelo? Umuntu wʼakuzwalʼamendʼamatinyu? Vuvo ve vakuzwalʼamendʼamatinyu ve vali munyumba zya vamwene. 9Amwe muvazilʼukwenya shonu lelo? Ukwenyʼumukuvwi? Ena, nalyoli nkuvavuzyʼine nkuti: Mupiti nakuvakuvwi. 10She we wuyo wʼayanzilwe namwa kalata lwʼakuti:

Yenya nkukutumilʼuhavizya wane

uwa kulongola kwilongolela kukwaho,

wʼaliyananizyʼidala lya kujenda pupʼiwe.

11Nalyoli nkuvavuzyʼine nkuti: Muli vonti ve vapafilwe kuvantanda atalolesile numo kuvʼumupiti kwa Yohani umwozyi. Nkandʼumunsi kuli vonti ava mushinamwene sha kumwanya, wʼamulusizyʼuvupiti. 12Vwanzite mumanda ga Yohani umwozyi ukufiha nakushinishʼuku uvumwene vwa kumwanya vukuṿijilizilwa, havili vuvo ve vakuṿijilizya ve vakuvusompola. 13Shʼavakuvwi vonti ninkomelezyo vakuvwilwe ukufiha pa-Yohani. 14Pʼinga mukwitiha ukuposhela, uwene wʼuEliya we vatili aliyinza. 15Uno wengʼamakutwi ali nago wʼatejelezyaje. 16Imbaholanye nishonu avantu vashinishʼiva? Vali fwe twana twe tutendime pamusolo, twe tukuvilishilana tukuti: 17Nilonji twavahomeye, imwe nyene mutahashima; nilosyo twalosizye, imwe nyene mutahakutʼamansozi. 18ShʼayinzilʼuYohani ahasita nukulya nukungʼwela, pe vahati: Ali nimpepʼimbivi. 19AyinzilʼuMwanamuntu ahalya nukungʼwela, pe vahati: Ye, musukumilʼumuntʼumuluṿʼuno, wʼushingʼwezi wʼipele lya mampensya, mujenzi wa vasonkolamusonko navatalamalandu! Nkandʼizyenʼinjele zya Mulungu zikuloleha mwe mumbombo zyakwe ukuva ngolosu zizyo.

Ye mayi we kunkaya insita kwitiha

20-24: Luk. 10,12-15.

20Pʼahanda pupʼuYesu ahapililʼinkaya zila mwe gapezilwe ge minjʼamamfindango gakwe she zitapindusile: 21Ye mayi we, we Kolazini! Ye mayi we, we Betisayida! shengʼamamfindango ge gapezilwe mumwinyʼumu, inga gapezilwe namu-Tili namu-Sidoni, pe nkandi vapindusile he hali nukuyipinyʼinkusʼinyezya nukutendama mwilota. 22Ilelo nkuvavuzyʼine nkuti: Pisiku lya vulonzi, pe nizya mu-Tili nizya mu-Sidoni ziliva mpupusu kuzyinyu. 23Nawe we Kapelinahumu! Ukuti uhafishe kumwanya ukwimishilwa? Uliyishilwa ukufiha kuvuzimu. Shʼamamfindango ge gapezilwe mumwahʼumu, inga gapezilwe mu-Sodomu, pe nkandʼilipo nashinishi insʼila. 24Ilelo nkuvavuzyʼine nkuti: Pisiku lya vulonzi, pʼizya munsi ya Sodomu ziliva mpupusu kuzyahʼiwe.

Insivo zya shana

25-27: Luk. 10,21-22.

25Musanya wuyo pʼuYesu ahamula ahati: Nkukutiniha we Tata we Mwene wa kumwanya napansi, shʼuzyisile nakuvanjele nakuvamanyinsanyi, nkandʼuzigwinkuye kuvagolo. 26Ena we Tata, zye nyinza zinizi kuminso kukwaho.

Imbombo ya Yesu wuyo

27YwontʼampiyʼinʼuTata. NuMwana numʼatamumanyile, weka we Yise wʼamumanyile, nuYise numʼatamumanyile, weka we Mwana wʼamumanyile, nuno wengʼuMwana atili: Imugwinkulilaje. 28Nzagaji kukwane mwenti mwe muṿunzisile mwe vanyatulʼamaligo, pʼine mbapanjʼuvutuzyo. 29Musendʼulwanʼulutunyulilo lwa kutunyulilʼumuligo, musambilile kukwane, she ne mutelefʼine, njisizye mumwoyo wane, pe namoyo ginyu muligalonchelʼuvutuzyo. 30Shʼulwanʼulutunyulilo lutonsu, wope numuligo wane mupupusu.

Currently Selected:

Matayi 11: NYi1965

Highlight

Copy